"Rus və erməni işğalı kompromislər limitini bitirib" "Edvard Halbəndyan qorxur ki, baza prinsiplərinin mətni açıqlansa, Azərbaycan xalqı qəzəblənəcək" Ermənistanın xarici işlər naziri Edvard Halbəndyan bəyanlayıb ki, Dağlıq Qarabağ münaqişəsinin həlli üzrə ATƏT-in Minsk qrupunun həmsədrlərinin irəli sürdüyü Madrid təkliflərinə hər hansı dəyişiklik edilməyib. Hazirin sözlərinə görə, Madrid təkliflərinə yenidən baxılacağı və onlara dəyişikliklərin olunacağına dair məlumatların əsası yoxdur: "Madrid təkliflərinə edilən dəyişikliklərlə bağlı guya Ermənistanın Xarici İşlər Hazirliyinə sənədin daxil olmasına dair yayılmış xəbərlər doğru deyil. Biz yalnız Madrid təkliflərinə dair kağız almışıq ki, orada təkliflərin mahiyyətinin dəyişdirilməsindən söhbət getmir. Danışıqlar prosesində belə kağızların göndərilməsi adi haldır. Əgər biz hər aldığımız kağızda yazılanları açıqlasaq, o zaman danışıqlar aparmağın mahiyyəti qalmayacaq. Biz dialoqu Madrid təklifləri əsasında davam etdiririk". Tural Bu arada ATƏT-in baş katibi Mark Perren de Brişambo təmsil etdiyi qurumun xarici işlər nazirlərinin Helsinkdə Dağlıq Qarabağ üzrə qəbul etdikləri bəyanatı yüksək qiymətləndirib: "56 xarici işlər nazirinin qəbul etdiyi bu bəyanat mühüm sənət və zirvədir. Ümumiyyətlə, Minsk qrupunun dekabrın əvvəlində Qarabağ münaqişəsinə dair qəbul etdiyi sənədlər bir ruhda tərtib olunub və bir-birinə zidd deyil". Məsələ ilə bağlı fikirlərini öyrəndiyimiz politoloq Qabil Hüseynli söylədi ki, artıq Dağlıq Qarabağ danışıqlarında razılaşdırılan və ya müzakirə olunan sənədin mətninin açıqlanması zamanıdır. Onun sözlərinə görə, hətta bu barədə ATƏT-in Xarici İşlər Hazirlərinin son iclasında da məsələ qaldırılması ciddi siqnaldır. Əhali bilməlidir ki, sülh sazişi hansı istiqamətdə irəliləyir və son nəticədə bu müqavilə öz ölkəsinin maraqlarını necə təmin edəcək. Ona görə də Edvard Halbəndyanın danışıqların mətninin "üzə çıxması"nı tövsiyə etməsindən asılı olmayaraq bu baza və çərçivə prinsipləri açıqlanmalıdır. Hətta indiyə kimi aparılan Praqa prosesinin məğzi və Madrid bəyannaməsinin özü də kompleks şəkildə əhalinin nəzərinə çatdırılmalıdır: "Bilinməlidir ki, Qarabağ probleminin həllini ATƏT və onun Minsk qrupu necə görür. Yəni Dağlıq Qarabağın statusu, referendum məsələsinin necə olacağı əvvəlcədən xalqa məlum olmalıdır. Sülhməramlı qüvvələrin regiona nə zaman yerləşdiriləcəyi, Laçın koridoru və onun ətrafının taleyinin necə olacağı da ictimaiyyətə açıqlanmalıdır. Bütün bunların hamısı əhaliyə çatdırılmalıdır ki, Azərbaycan xalqı onu gözləyən taledən xəbərdar olsun. Edvard Halbəndyan ondan qorxur ki, sülh sazişinin və ya nəzərdə tutulan baza prinsiplərinin mətni açıqlansa, Ermənistan müxalifəti deyil, Azərbaycan xalqı kədərlənəcək və qəzəblənəcək". Azərbaycanın güzəştlər və ortaya siyasi iradə qoymaq limitinin çoxdan bitdiyini deyən Qabil Hüseynli topun erməni tərəfinə atıldığını vurğuladı. İşğala məruz qalan və torpaqlarını itirən, bir milyondan çox qaçqını olan Azərbaycandır. Belə bir ölkənin daha hansı güzəştlərə getməsi lazımdır? Hadisəyə siyasi qiymət verib təcavüzkarı cəzalandırmaq əvəzinə, Azərbaycandan kompromis tələb edilməsi isə gülüncdür. Bəzi super güclər münaqişəyə kimlərinsə maraqları prizmasından yanaşırlar və təcavüzkarı şirnikləndirib mükafatlandırmaq istəyirlər. Belə həll metoduna başqa ad vermək olmaz: "Azərbaycandan güzəştlər tələb olunanda hansısa komik tamaşada gülməli fikirlər yada düşür. Azərbaycan prezidenti hansı siyasi iradəni ortaya qoyacaq? O deyəcək ki, Laçın koridoru və onun perimetri boyu iyirmi kilometrlik ərazini ermənilərə bağışlayıram? Bu, bütün Laçın rayonun ərazisi deməkdir. Sülh danışıqları başlayan kimi içərisində rusların çoxluq təşkil etdiyi sülhməramlı qüvvələrin Dağlıq Qarabağ ərazisində yerləşdirilməsinə icazə verilməsi də absurddur. Referendumun yalnız Dağlıq Qarabağın erməni əhalisi arasında keçirilməsinə razılıq verilməsi də qəribə səslənir. Referendum nəticəsində bir ovuc erməni ikinci dəfə öz müqəddaratını təyin etmək istəyir. Bunlar siyasi iradə adlandırılmır. Belə tədbirlər xalqı siyasi təslimçiliyə təhrik etmək metodu adlanır". Poitoloq onu da vurğuladı ki, hazırda erməni tərəfinin siyasi iradə nümayiş etdirmək imkanları kifayət qədər genişdir. Bədnam qonşumuz ən azı Dağlıq Qarabağın ətrafında olan rayonları qeyd-şərtsiz azad etməlidir. Azərbaycanın kədərli taleyi elə gətirib ki, bu ölkə kompromislər limitini rus və erməni təcavüzü nəticəsində bitirib. Rəsmi Bakının geri çəkilməsi üçün yeri yoxdur. Bu yer, ancaq uçurum ola bilər. Qabil Hüseynli ATƏT baş katibinin son açıqlamasının da maraqlı məqam olduğunu söylədi: "Mark Perren de Brişanbo bu bəyanatla onu demək istəyir ki, Madrid bəyannaməsi və xarici işlər nazirlərinin Brüssel görüşü, ondan sonra gələn digər toplantılarda qəbul edilən sənədlər arasında varislik var. Yəni ATƏT və onun Minsk qrupu bu prosesləri vahid ssenari üzrə aparır. Onlar nə Azərbaycanın yeni təkliflərini, nə də Ermənistanın yeni iddialarını bu prosesə və sənədlərə daxil etməyiblər. ATƏT rəhbəri açıq şəkildə deyir ki, bu proses bizim əlimizdədir və biz də bu işi bəlli prinsiplər üzrə axıra qədər aparmaq niyyətindəyik".