MTN İrandan gətirilən 90 kq narkotiki tutub Azərbaycan və İran vətəndaşlarından ibarət dəstə zərərsizləşdirilib Milli Təhlükəsizlik Nazirliyi (MTN) tərəfindən keçirilən əməliyyat-axtarış tədbirləri nəticəsində “İran-Azərbaycan” marşrutu üzrə qaçaqmalçılıq yolu ilə narkotik vasitələrin daşınması ilə məşğul olan bir qrup şəxs zərərsizləşdirilib, onlardan 90 kiloqrama yaxın narkotik vasitə götürülüb. MTN ictimai əlaqələr mərkəzindən Lent.az-a verilən məlumata görə, 2008-ci il dekabrın 11-də İran İslam Respublikasının vətəndaşı Gholizadeh İlekhcisofla Ahmad Abolghasem, Azərbaycan Respublikasının vətəndaşları - Rahib Zeynalov, İlham Mirzəyev, Ağaşükür İbişov, Nadir Çıqqarov və qeyriləri qabaqcadan əlbir olaraq cinayət əlaqəsinə girib tamah niyyətilə külli miqdarda pul müqabilində sövdələşərək satış məqsədi ilə qanunsuz olaraq əldə edilmiş narkotik vasitəni - 82,5 kq-a yaxın həşişi, 5 kiloqramdan artıq heroini və 2 kiloqrama yaxın tiryəki gömrük sərhədindən gömrük nəzarətindən kənar qaçaqmalçılıq yolu ilə İrandan Azərbaycanın Cəlilabad rayonunun Gülməmmədli kəndinə gətiriblər, buradan isə Biləsuvar rayonunun Ağalıkənd kəndi ərazisinə apararaq əkin sahəsində gizlədiblər. MTN əməkdaşlarının həyata keçirdikləri əməliyyat tədbirləri nəticəsində 2008-ci il dekabrın 12-də cinayətkar qrupun üzvləri saxlanılıb və onlardan 90 kiloqrama yaxın həmin narkotik vasitələr aşkarlanaraq götürülüb. Faktla bağlı MTN İstintaq Baş İdarəsi tərəfindən Azərbaycan Respublikası Cinayət Məcəlləsinin 206.3.2-ci (qabaqcadan əlibir olan bir qrup şəxs tərəfindən narkotik vasitələrin qaçaqmalçılığı), 234.4.1 və 234.4.3-cü (qabaqcadan əlibir olan bir qrup şəxs tərəfindən satış məqsədi ilə qanunsuz olaraq külli miqdarda narkotik vasitələri əldə etmə, saxlama, daşıma, göndərmə və satma) maddələri ilə cinayət işi başlanmış, adları çəkilən şəxslər təqsirləndirilən şəxs qismində cəlb olunaraq məhkəmənin qərarı ilə barələrində həbs qətimkan tədbiri seçilib. Cinayət işi üzrə bütün halların araşdırılması, cinayətin digər iştirakçılarının ifşası üçün zəruri istintaq hərəkətləri və əməliyyat-axtarış tədbirləri davam etdirilir. Məlumatda bildirilib ki, son illər milli təhlükəsizlik orqanları tərəfindən narkotiklərin qanunsuz dövriyyəsinə, onların qaçaqmalçılıq yolu ilə ölkəmizə gətirilməsi və respublikanın ərazisindən tranzit kimi istifadə olunması hallarına qarşı mübarizə daha da gücləndirilib, vaxtaşırı olaraq cinayətkarlardan külli miqdarda müxtəlif növ ağır narkotik vasitələr götürülüb. Ölkənin milli təhlükəsizliyini təhdid edən bu bəlaya qarşı dövlət səviyyəsində aparılan mübarizədə qanunvericiliklə səlahiyyətləri çərçivəsində MTN-in qazandığı nailiyyətlərdən, nümayiş etdirdiyi qətiyyətli və barşımaz mövqeyindən əndişələnən, dövlətçilik maraqları baxımından məram və məqsədləri şübhə doğuran bəzi qəzetlərdə həmişəki kimi müxtəlif savadsız və qərəzli yozumlara yol verilməsi, bununla da ictimaiyyətdə yanlış rəyin formalaşdırılmasına cəhdlər göstərilməsi təəssüf doğurur. LENT.AZ