Amerika müsəlmanları ABŞ-ın siyasi həyatına daha çox cəlb edilirlər - Amerika-İslam münasibətləri Şurasının direktoru Trend News -un Yaxın Şərq redaksiyasının Amerika-İslam münasibətləri Şurasının (Council on American Islamic Relations (CAIR) direktoru və təsisçilərindən biri Nihad Avadla (Nihad Awad)müsahibəsi. - Amerika-İslam münasibətləri Şurası ABŞ-ın tanınmış müsəlman təşkilatlarından biridir. Başçılıq etdiyiniz qurum əsasən hansı problemlərlə məşğul olur? - Amerika-İslam münasibətləri Şurası ilk növbədə İslamın dünyada, xüsusən də ABŞ-da düzgün anlaşılmasına çalışır. Fəaliyyətimizin əsas qayəsi müsəlmanları digər xalqlarla dialoqa təşviq etməkdir. Bizim üçün müsəlmanlara ABŞ-da vətəndaş hüquqlarını qorumağa yardım göstərmək çox vacibdir. Müsəlman əhalisinə hüquqlarından istifadə etməyə və qarşılıqlı anlaşmanı yaxşılaşdırmağa xidmət edən koalisiyaların yaradılması zəruridir. - Amerika müsəlmanlarının ABŞ-ın ictimai həyatındakı passivliyini nəzərə alaraq, İslam ənənələrinin və dəyərlərinin müdafiəsini nə dərəcədə təmin etmək mümkündür? - 1994-cü ildən, CAİR yarandığı vaxtdan, biz müsəlmanlrın və başqa inanc sahiblərinin hüquqlarını qoruyuruq. Hazırda sərəncamımızda müsəlmanların yaşadıqları şəhərlərdə 35-ə yaxın ofis mövcuddur. İslam azadlıq, ənənələr və bərabərlik kimi dəyərləri təşviq edən bir dindir. ABŞ-da da bu dəyərlərə önəm verirlər. Bunun üçün də hesab edirəm ki, İslam ənənələri və ABŞ-ın ictimai həyatı arasında ciddi ziddiyyət yoxdur. Amerika müsəlmanları ABŞ-ın siyasi və ictimai həyatına daha çox cəlb olunurlar, bu isə onların durumunu yaxşılaşdırır. - Müsəlmanlar ABŞ-da azlıq təşkil etmək aqibətindən necə qurtula bilərlər, və Amerikanın siyasi və ictimai həyatında müvafiq rol oynamaq üçün nə etməlidirlər? - Bu yolu keçən başqa xalqlar kimi, Amerika müsəlmanları da böyük fəallıq göstərirlər. Misal üçün, son prezident seçkilərində seçki hüququ olan müsəlmanların 95 faizi seçkilərdə iştirak etdi. Bu Amerika müsəlmanları üçün ən yüksək göstəricidir. Onların 89 faizi səslərini Brak Obamaya verdilər. Çünki dəyişikliklərin tərəfdarladırlar. İlk dəfə Amerika senatına iki müsəlman seçilib. İctimai həyatda iştirak etmək istəyən hər bir ABŞ vətəndaşı bu hüquqlara malikdir. Müsbət dəyişikliklər üçün zaman və səbr lazımdır. Amerika müsəlmanları bütün əhalinin din azadlığı təmin edilən və 200 il ərzində formalaşan qanunlarla mühafizə edilən bir ölkənin sakinləridirlər. Hər halda Amerikanın dini və etnik azlıqları neçə nəsillərdir ki, hüquq və azadlıqları uğrunda mübarizə aparıblar. Hazırda ABŞ müsəlmanlarını öz hüquqlarını qorumağa yenicə başlayan azlıqlar sırasına aid etmək lazımdır. Cəmiyyət İslama etinasız yanaşsa da, müsəlmanlar Amerikada özlərini evdəki kimi hiss eirlər. - Sizcə dialoq vasitəsi ilə islamofobiyanı aradan qaldırmaq mümkündürmü, xüsusən də onun Qərbdə geniş yayılmasını nəzərə alsaq? - İslamofobiya bütün müsəlmanları və İslam aləmini qıcıqlandıran bir amildir. Azlıq təşkil etsə də, kifayət qədər mütəşəkkil bir qüvvə Qərbdə KİV-ə də siraət edən İslam xofunu yaymağa nail olub. Amma mən deməliyəm ki, biz yalnız bu qüvvələri ittiham etməməliyik. Biz həm də bəzi ölkələrdə yaşayaraq özlərini müsəlman kimi təqdim edən və hərəkətləri ilə İslamın imicinə ciddi zərbə vuran şəxsləri də günahlandırmalıyıq. Yaranmış vəziyyətdən yeganə çıxış yolu hər iki tərəfin - həm müsəlmanların, həm də Qərb sakinlərinin liberal qrupları arasında dialoqun aparılmasıdır. Anti-İslam xarakterli istənilən azlıqlar dialoqdan təcrid olunmalıdırlar. İslam dözümlülük və mərhəmət dinidir. Amma ABŞ-də əldə etdiyimiz təcrübəmizə arxalanaraq deyə bilərəm ki, bir çox üzvlərimiz və davamçılarımız İslamın əsasları haqqında çox az, bəzən isə heç nə bilmirlər. İslam haqqında insanları məlumatlandırdıqca, onlar onu daha çox anlayır və hörmətlə yanaşır. - Qərbdə, xüsusən də ABŞ-da, müsəlman təşkiltlarının rolunu və əməkdaşlğını necə dəyərləndirirsiniz? - Amerika müsəlmanları ABŞ-da və müsəlman aləmində layiqli yer tutmalıdırlar. Obamanın yeni administrasiyası ümidlərə əsas verir. Müsəlman aləminin yeni dövrü başlanmalıdır və Amerika müsəlmanlarının təcrübəsindən istifadə olunmalı, onların səsi eşidilməlidir. Əks təqdirdə Amerika əvvəlki səhvlərini təkrar edəcək - istər ölkə xaricində, istərsə də ABŞ-ın özündə. Amerika müsəlmanları buna hzırdırlar. ABŞ-ın müsəlman əhalisi arasında yüksək intellektə və istedada malik çox insanlar var. Bizdə 3 mindən artıq Amerikan-müsəlman təşkilatları mövcuddur. Bunlar əsasən məscidlər, məktəblər və ictimai qurumlardır. Dövlət və milli səviyyədə şuraların fəaliyyətini koordinasiya istiqamətində onlar arasında əməkdaşlıq həyata keçirilir.