ERMƏNİSTANLA AZƏRBAYCANA RAZILAŞMA ÜÇÜN VAXT VERİLİB

SON XƏBƏRLƏR

ERMƏNİSTANLA AZƏRBAYCANA RAZILAŞMA ÜÇÜN VAXT VERİLİB

2021.10.20, 07:36

Gunaz.tv

ERMƏNİSTANLA AZƏRBAYCANA RAZILAŞMA ÜÇÜN VAXT VERİLİB Xarici işlər nazirlərinə “texniki sənəd” təqdim olunub

Dekabrın 9-da Brüsseldə Avropa Birliyinin (AB) yüksək rütbəli xarici siyasət rəsmiləri ilə Cənubi Qafqaz ölkələrinin xarici işlər nazirlərinin görüşü olub. Azərbaycanın xarici işlər naziri Elmar Məmmədyarov görüşdən sonra keçirilən mətbuat konfransında deyib ki, Qarabağ münaqişəsinin həlli üçün Minsk Qrupu çərçivəsində aparılan danışıqlar da müzakirə edilib. Prezidentlərin Moskva bəyannaməsi, Türkiyənin Qafqazda Sabitlik Paktı kimi təşəbbüsləri xatırladan E.Məmmədyarov bildirib ki, indi ermənistanlı həmkarı ilə birlikdə keçmişin pis miraslarının tarixdə qalmasına çalışırlar: “Bütün bu cəhdlər daha sabit və sakit Cənubi Qafqazın əsasının qoyulmasına kömək edir. Ermənistanın xarici işlər naziri ilə mən bu fikirdəyik ki, biz bütün pis mirasların geridə, tarixdə qalmasına çalışmalıyıq”. Qeyd edək ki, Azərbaycan və Ermənistan xarici işlər nazirliyi AB-nin xarici işlər nazirlərinin toplantısına dəvət edilib. Onlarla AB-nin Yaxın Qonşuluq Siyasəti çərçivəsində qarşılıqlı əməkdaşlıq məsələləri və bu kontekstdə Qarabağ münaqişəsinin nizamlanması müzakirə olunub. Xarici işlər nazirləri ötən həftə Finlandiyanın paytaxtı Helsinkidə ATƏT xarici işlər nazirlərinin illik toplantısı zamanı danışıqlar aparmışdılar. Minsk Qrupunun fransalı həmsədri Bernar Fasye “Azadlıq” radiosunun rus redaksiyasına açıqlamasında bildirib ki, Helsinkidə həmsədr ölkələr adından xarici işlər nazirlərinə münaqişənin nizamlanmasının əsas prinsiplərinə dair “texniki sənəd” təqdim edilib. B.Fasye deyib ki, bu sənəd münaqişənin həllinə və baza prinsipləri əsasında razılaşmanın tezləşdirməsinə kömək edə bilər. Lakin sənəd əvvəlcə öyrəniləcək və işləniləcək, daha sonra ona münaqişə tərəflərinin razılığı gərəkdir. Razılaşma əldə edilməsə, sənəd geri çəkiləcək. B.Fasye onu da bildirib ki, Helsinkidə xarici işlər nazirləri ilə görüş zamanı həmsədr ölkələr adından Rusiya xarici işlər naziri Sergey Lavrov, Fransa xarici işlər naziri Bernar Kuşner və ABŞ dövlət katibinin müavini Daniel Frid tərəflərə münaqişənin nizamlanmasına dair qrafik təqdim ediblər. Bu qrafik imkan verir ki, gələn ilin sonunadək münaqişənin nizamlanmasının baza prinsipləri ətrafında razılaşma əldə olunsun. “Nazirlərin Helsinki görüşü çox faydalı olub. Məmmədyarovla Nalbəndyan üst-üstə 5 saatdan çox danışıb və münaqişənin nizamlanması prosesini müzakirə ediblər”- deyə B.Fasye bildirib. Xəbər verildiyi kimi, həmsədr ölkələr adından qəbul edilən Helsinki bəyannaməsində tərəflər münaqişənin nizamlanmasının baza prinsipləri ətrafında bir neçə ay ərzində razılaşma əldə etməyə çağırılırdı. Daha sonra danışıqlar detallar üzrə davam etdirilməli və münaqişənin həllinə dair hərtərəfli sülh müqaviləsinin hazırlanması ilə başa çatmalıdır. Baza prinsiplərinə Dağlıq Qarabağda referendumun keçirilməsi də daxildir. F.MƏMMƏDOV musavat