Rusiya Pars boru kəmərinin əleyinə deyil –İran parlamentinin Enerji komissiyasının üzvü İran parlamentinin nümayəndəsi bildirib ki, Rusiya İranın Nabukko boru kəmərindən imtina edərək Pars qaz kəməri çəkmək niyyətinin əleyhinə deyil. «İran Pars boru kəmərinin çəkilməsi üçün Rusiya tərəfinin razılığını alıb», - deyə İran parlamentinin Enerji komissiyasının üzvi Hüseyn Zülənvar Trend News-a bildirib. İranın neft nazirinin müavini Əkbər Türkan dekabrın 2-də «Fars» xəbər agentliyinə müsahibəsində bildirib ki, İran Nabukko boru kəmərindən imtina edib. O əlavə edib ki, İran öz qazının Avropaya nəqli üçün «Persian Pipeline» kəmərini çəkmək niyyətindədir. Türkanın sözlərinə görə, Pars boru kəməri İran qazının Türkiyə vasitəsi ilə Avropaya nəqli üçün nəzərdə tutulub. Zülənvarın fikrincə, Qaz OPEK-nin yaradılması və Rusiyanın da bu təşkilata üzv olması göstərir ki, Rusiya İranın enerji siyasətini dəstəkləyir. Zülənvar İranın Nabukko boru kəmərindən imtina etməsi məsələsini şərh edərək bildirib ki, Avropa İttifaqına üzv ölkələr ABŞ-ın diktəsi altında İran qazına qarşı sanksiyalar tətbiq ediblər. Onun fikrincə, elə bu səbəbdəndir ki, İran İslam Respublikasının rəsmiləri Pars boru kəmərinin tikintisi ilə bağlı qərar veriblər. Zülənvar bildirib ki, Pars boru kəmərinin çəkilməsi üçün lazım olan vəsit İran tərəfindən ödəniləcək. Əgər digər ölkələrdən də Pars boru kəmərinin tikintisinə sərmayə yatırmaq istəyənlər olarsa, İran onları dəstəkləyəcək. Zülənvarın fikrincə, Pars boru kəmərinin təhlükəsizliyi Türkiyə tərəfindən təmin olunacaq. «Türkiyə rəsmiləri Pars boru kəmərinin bu ölkə ərazisi ilə keçərək Avropaya uzanması üçün şərait yaradacaqlarına söz veriblər», - deyə Zülənvar bildirib. Pars boru kəmərinin İran sərhədindən Avropaya kimi uzunluğu 3300 km təşkil edəcək. Kəmərin ümumi dəyəri 6 milyard dollar hesablanıb. Nabukko boru kəmərinin uzunluğu da 3300 km təşkil edir. Nabukko boru kəməri vasitəsi ilə İran, İraq, Azərbaycan, Türkmənistan və Qazaxıstanın qazının Avropa İttifaqına üzv ölkələrə nəql olunması nəzərdə tutulub. Nabukko Türkiyə-Bolqarıstan- Rumıniya-Macarıstan-Avstriya marşrutunu əhatə edəcək təbii qaz nəqli üzrə layihədir. Xəzərdəki qaz yataqlarını da Avropa ilə birləşdirəcək Nabukko kəmərinin nəqletmə gücü ildə 31 milyard kubmetr təşkil edəcək. Boru kəmərinin tikintisinə isə 5,8 milyard dollar xərclənəcək. Nabukko boru kəmərinin tikintisi realizə olunarsa, hər bir ölkə öz ərazisində kəmərin tikintisini həyata keçirəcək.trend