Güney yaddan çıxıb? İndi partiyaları bələdiyyə üzvlüyü və mandat maraqlandırır Son vaxtlar İranın hakim molla rejimi bütün istiqamətlərdə Güney Azərbaycan Milli Hərəkatına qarşı hücuma keçib. Öz milli haqqlarını tələb edən, Farsistanın tərkibindən çıxıb müstəqil olmaq istəyən 35 milyonluq Azərbaycan türkləri yenidən təhqir olunmağa başlanıb. İranın mürtəce rejimi Güney Azərbaycan xalqına gücü çatdığı pisliyi etməkdədir. İranın daxilində, xaricdə fəaliyyət göstərən Güney təşkilatlarının fəaliyyətinə əngəllər yaradılır, milli fəallar repressiyalara məruz qalırlar. İran rejimi yaranmış fürsətdən maksimum yararlanıb Güney Azərbaycan Milli Hərəkatını birdəfəlik sıradan çıxarmaq, İranı fars dövlətinə çevirmək istəyən panfarsistlərin mürtəce planına əngəl olacaq bir güc buraxmamağı qarşısına məqsəd qoyub. İran rejimi tək türkləri deyil, bəlucları, ərəbləri, kürdləri də hədəfə alıb. Qeyri-millətlərin (məsələn, ərəblərlə kürdlərin) arxalarında çoxsaylı ərəb dövlətləri və diaspora var. Güney Azərbaycan türkünün yeganə ümid yeri isə Azərbaycan Respublikası və xaricdəki diaspora təşkilatlarımızdır. Müəyyən səbəblərdən Azərbaycan dövləti Güney Azərbaycan məsələsinə girişə gilmir. Baxmayaraq ki, İranda çap olunan və panfarsistlərin nəzarətində olan mətbu orqanlar Güney Azərbaycan hərəkatının Bakıdan yönləndirildiyini iddia edirlər. Dağlıq Qarabağ kimi problemi olan Azərbaycan dövlətinin Güney məsələsində tələbkar mövqedən çıxış edə bilməməsi anlaşılandır. Anlaşılan olmayan beynəlxalq təşkilatlara, gündəlik çap olunan qəzetlərə malik siyasi partiyaların, qeyri-hökumət təşkilatlarının Güney Azərbaycan məsələsində passivliyidir. Milli Azadlıq Hərəkatının lideri Əbülfəz Elçibəyin ölümündən sonra partiyalar, müxalifət qüvvələri Güney məsələsinə diqqəti azaldıb. Xalq Cəbhəsinin şinelindən çıxmış partiyalırn əksəriyyəti susqundur, "avropalaşmış" bəzi partiyalar isə ümumiyyətlə, bütöv Azərbaycan məsələsini proqramlarından çıxarıblar. Əli Kərimlinin rəhbərlik etdiyi AXCP Güney məsələsindən yalnız öz maraqlarına uyğun olanda, öz işinə gələndə danışır. Müsavat ara-sıra, ictimai qınağa gəlməsin deyə, Güney Azərbaycan türklərinin milli hüquqlarından danışır. Bütövlükdə isə son illər bu partiya Güney məsələsinə diqqət ayırmayıb, bu mövzuda tədbirlər keçirməyib. 2006-cı ilin may hadisələri zamanı Quzey ictimaiyyəti xeyli fəallaşdı, siyasi partiyalar, KİV-lər Güney məsələsinə diqqəti artırdı. O vaxt Etibar Məmmədovun rəhbərlik etdiyi Milli İstiqal Partiyası xüsusi fəallığı ilə seçilir, bu məsələdə heç kimin göstərmədiyi fədakarlığı nümayiş etdirirdi. Haqqüçünə AMİP lideri partiyasının üzvü olduğu Beynəlxalq Demokratlar İttifaqının toplantılarında Güneylə bağlı məsələ qaldırmış, sənəd və bəyanatlar qəbul etdirmişdi. Amma sonralar daxili siyasətdə passivləşmiş AMİP-in Güney fəaliyyəti də donduruldu. Son vaxtlar Bakıda birinci Güney forumunu təşkil etmiş AMİP ümumiyyətlə Güney məsələsi ilə bağlı danışmır, susqunluq nümayiş etdirir. Güneylə bağlı ağzına su almış təşkilatlardan biri də hər yerdə özünü Elçibəyin varisi kimi təqdim edən KXCP-dir. Doğrudur, son zamanlar bu partiyanın ayrı-ayrı fəalları vaxtilə Elçibəyin qurduğu qurumların bərpası təşəbbüsü ilə çıxış ediblər. Məsələn, Ali Məclisin sədri Zəlimxan Məmmədli və sədr Mehriban Vəzir Milli Müqavimət Hərəkatının, Aydınlar Birliyinin bərpa edilməsi, Bütöv Azərbaycan Birliyinin fəaliyyətinin gücləndirilməsi təşəbbüsü ilə çıxış ediblər. Amma partiyanın rəhbərliyi, mərkəzi aparatının diqqəti başqa şeylərə yönəlib. DUİ kimi mənasız qurumda vaxt öldürən Mirmahmud Mirəlioğlunun komandası son üç ildə bircə dəfə də olsun Elçibəyin önəm verdiyi əsas məsələyə-Güney probleminə diqqət ayırmayıb. Son illər DUİ Qarabağla bağlı bir neçə forum keçirib, təşkil etdiyi dəyirmi masalarda dövlət büdcəsini, körpü tikintisini, heyvandarlığın inkişaf tempini müzakirə etsə də, Güney Azərbaycan məsələsinə toxunmayıb. Sanki KXCP mərkəzi aparatda toplaşan bir neçə şəxsə mandat, bələdiyyə üzvlüyü qazandırmaq üçün fəaliyyət göstərir. Ən acınacaqlısı odur ki, Güneylə bağlı yaradılmış cürbəcür komitələr, qurumlar, dəstək şuraları da fəaliyyət göstərmir. BAB-ın sonuncu toplantısı nə vaxt keçirilib Allah bilir. Buna ki, İran mane olmur. İran rejiminin əli uzundur-bəllidir. Hər yerdə, Bakıda da casus şəbəkəsi saxlayan İran hakimiyyəti Güney Azərbaycan məsələsi ilə məşğul olan insanlara, təşkilatlara cürbəcür maneələr yaradır. Amma burada qəribə bir şey yoxdur. Düşmən bildiyi pisliyi edəcək. Bir də ki İran hakimiyyəti məsələn, bir vaxtlar Güney məsələsi ilə bağlı bar-bar bağıran Güney Azərbaycan Milli Hərəkatını Müdafiə Komitəsinin sədrinə, BAB-nın Mərkəzi Şurasının deputat olmaq istəyən rəhbərinə hansı maneçiliyi törədibğ Onlar bu əngəllərə görə, fəaliyyətlərin dondurublarsa, onda necə elçibəyçidirlərğ Bütöv Azərbaycan ideyası müqəddəsdir. Güneydə Azərbaycan türklərinin şərəf davası gedir. Bu davada soydaşlarmızın yanında olmayacağıqsa, onlara dəstək verməyəcəyiksə, özümüzə millətçi, elçibəyçi deməyə haqqımız yoxdur. Aydın olaylar