General Rəşid Dostum Türkiyədədir

SON XƏBƏRLƏR

General Rəşid Dostum Türkiyədədir

2021.10.20, 07:36

Gunaz.tv

General Rəşid Dostum Türkiyədədir

General bu ölkəyə sürgün olunması ilə bağlı yayılan məlumatları təkzib edib Əfqanıstanda ev dustağı olan özbək general Rəşid Dostum xüsusi bir təyyarə ilə Türkiyəyə gətirilib. O, Türkiyəyə sürgünə gəlmədiyini, heç kimin onları Əfqanıstandan çıxarmağa gücü çatmayacağını deyib. Rəşid Dostumun lider olduğu “Cümbüş” partiyası Ali Məclisinin üzvü Ənvər Sədat, Rəşid Dostumun sürgün olunmadığını, Türkiyə Xarici İşlər Nazirinin dəvəti ilə bu ölkəyə getdiyini bildirib: “Hər hansı bir sürgündən söhbət gedə bilməz. Biz Əfqanıstanın ən böyük siyasi partiyasını təmsil edirik. Dostumun Əfqanıstanda ev dustağı olması isə doğru deyil”. Qeyd edək ki, general Rəşid Dostum Əfqanıstan Baş Ordu Qərargahının rəisi olarkən türkmən lider Əkbər Bəyə sui-qəsdlə ittiham edilərək vəzifəsindən uzaqlaşdırılmışdə. Türkiyədə nəşr olunan “Vətən” qəzetinin iddiasına görə, Həmid Kərzai hökuməti ilə münasibəti korlanan Rəşid Dostum barəsində qaldırılan məhkəmə iddialarının ləğv olunmasına qarşılıq Türkiyəyə sürgün edilməyi qəbul edib. Jurnalistlərə açıqlama verən Rəşid Dostum isə, bayram münasibəti ilə ailəsini və uşaqlarını görmək üçün Türkiyəyə gəldiyini bildirib. Bundan başqa, o, təyyarə göndərən Türkiyə hökumətinə də təşəkkürünü bldirib. General Dostum Əfqanıstan prezidenti Həmid Kərzai ilə heç bir probleminin olmadığını da deyib: “Heç bir problemimiz yoxdur. O bizim prezidentimiz, eyni zamanda da ali baş komandanımızdır. Mən də onun köməkçisiyəm. Münasibətlərimiz də çox gözəldir. Buraya gəlməmişdən əvvəl onunla görüşmüşəm”. Rəşid Dostum ev dustağı olması ilə bağlı xəbərləri də təkzib edib: “Mən Əfqanıstan protokolunda ikinci adamam. Necə ola bilər ki, ev dustağı olum? Belə bir şey mümkün deyil”. General Rəşid Dostum bayramdan sonra Türkiyədə daha 10 gün qalacağını və bəzi görüşlər keçirəcəyini deyib. /ANSPRESS/

GUNAZ.TV

SON XƏBƏRLƏR