«DÖVLƏTİN XARİCİ SİYASƏTİNDƏ CƏNUBİ AZƏRBAYCAN MƏSƏLƏSİ VAR?» SƏFİR ELÇİBƏYLƏ BAĞLI DEDİYİNDƏN DÖNMƏDİ Azərbaycanın İrandakı səfiri Abbasəli Həsənov «Bizim yol» qəzetinin 5 dekabr sayına açıqlamasında Tehranda «Mehr» agentliyinə dekabrın 3-də verdiyi müsahibəsində dediklərinin üstündə qaldığını bildirib: «Mən yenə də o fikirlərimdə qalıram ki, İranla münasibətlərimizin korlanmasında Elçibəy hakimiyyətinin rolu olub». A.Həsənov Azərbaycanın İrandakı keçmiş səfiri Nəsib Nəsiblinin bununla bağlı səsləndirdiyi sərt etiraza münasibət bildirmək istəməyib. - Abbasəli müəllim, doğrudanmı siz təmsil etdiyiniz ölkənin keçmiş hakimiyyətini bu formada tənqid etmisiniz? - Bilirsiniz, reallıq acı da olsa, onu deməliyik. Mən bildirmişəm ki, o dövrdəki davranışların, hərəkətlərin mənfi təsiri bu günə qədər qalmaqdadır. Bu gün İran-Azərbaycan münasibətləri istənilən səviyyədə inkişaf etmir. Keçmiş hakimiyyətin hərəkətləri İranla əlaqələrimizin genişlənməsinə mane olur. - Elçibəy hakimiyyəti Cənubda yaşayan soydaşlarımızın taleyinə biganə qalmayıb. Bu səhv hərəkətdirmi? - Mən məmuram. Burada Azərbaycan dövlətini təmsil edirəm. Başqa ölkələr kimi Azərbaycan da digər dövlətlərin daxili işlərinə qarışmamaq öhdəliyi götürüb. Biz götürdüyümüz öhdəliklərə əməl etməliyik. Mən də azərbaycanlıyam və bir vətəndaş kimi dünyanın hər yerində yaşayan soydaşımız mənim üçün əzizdir. Amma bunu dövlət siyasətinə çevirib başqa ölkənin daxili işlərinə qarışmaq düzgün deyil. Biz çalışmalıyıq ki, başqa ölkədə yaşayan soydaşlarımızın imkanlarından istifadə edib həmin dövlətlə əlaqələrimizi quraq. - Söhbət İranda yaşayan soydaşlarımızın durumundan gedir. Bu gün onların ana dilində təhsil almaq imkanları məhdudlaşdırılıb. Hər addımbaşı hüquqları pozulur. Azərbaycan səfiri kimi niyə onların taleyi ilə maraqlanmırsınız? - Həmin insanlar Azərbaycan vətəndaşları deyil. Onlar İran vətəndaşlarıdır. Və öz problemlərini öz dövlətləri ilə özləri həll etsinlər. Azərbaycan dövlətinin xarici siyasətində Cənubi Azərbaycan məsələsi var? Bu o deməkdir ki, Azərbaycan İranın parçalanmasını istəyir. Biz heç bir dövlətə qarşı ərazi iddiası qaldırmırıq. Yenə də deyirəm, məsələlərə açıq gözlə baxmaq lazımdır. - Diplomat olduğunuzu vurğuladınız. Hətta diplomat olsanız belə, Elçibəyi bu formada tənqid etmək nə dərəcədə düzgündür? Axı o, milyonlarla azərbaycanlının sevdiyi bir insan, ölkənin prezidenti olub… - Elçibəy mən oxuduğum fakültənin müəllimi olub. Mən onu ziyalı və alim kimi dəyərləndirirəm. Allah ona rəhmət eləsin. Hamı vətənpərvər ola bilər. Amma bu o demək deyil ki, başqa dövlətin daxili işinə qarışasan. Mən yenə də o fikirlərimdə qalıram ki, İranla münasibətlərimizin korlanmasında Elçibəy hakimiyyətinin rolu olub. Elçibəy hakimiyyəti dövründə ölkədə hərc-mərclik hökm sürürdü… - İndi diplomat kimi deyil, YAP-çı kimi danışdınız… - Mən reallıqları deyirəm. - Nəsib Nəsibli sizi açıqlamalarınıza görə «ağlı başında olmayan adam» kimi dəyərləndirib. - Nəsib Nəsibli bu mədəniyyətin sahibidirsə, nə deyə bilərəm. Mən ona cavab vermək istəmirəm. mediaforum