AZƏRBAYCANIN İRANDAKI KEÇMİŞ SƏFİRİ İNDİKİ SƏFİRİ QINADI: «AĞLI OLAN ADAM BELƏ FİKİRLƏR SƏSLƏNDİRƏRMİ?»

SON XƏBƏRLƏR

AZƏRBAYCANIN İRANDAKI KEÇMİŞ SƏFİRİ İNDİKİ SƏFİRİ QINADI: «AĞLI OLAN ADAM BELƏ FİKİRLƏR SƏSLƏNDİRƏRMİ?»

2021.10.20, 07:36

Gunaz.tv

AZƏRBAYCANIN İRANDAKI KEÇMİŞ SƏFİRİ İNDİKİ SƏFİRİ QINADI: «AĞLI OLAN ADAM BELƏ FİKİRLƏR SƏSLƏNDİRƏRMİ?» nəsibnəsibli.jpg

1992-1994-cü illərdə Azərbaycanın İran İslam Respublikasında səfiri olmuş deputat Nəsib Nəsibli Azərbaycanın bu ölkədəki indiki elçisi Abbasəli Həsənovun «Mehr» agentliyinə müsahibəsində iki ölkə arasında yaranan problemlərə görə Əbülfəz Elçibəy hakimiyyətinə ünvanladığı ittihamlara münasibət bildirib. Nəsib Nəsibli Tehrandakı Azərbaycan səfiri Abbasəli Həsənov bu gün İranın «Mehr» agentliyinə müsahibəsində deyib ki, iki ölkə arasında anlaşılmazlıqların yaranmasına Azərbaycanın keçmiş rəhbərliyinin səriştəsizliyi və Sovet İttifaqının dağılmasından sonrakı hərc-mərclik səbəb olub: «Təəssüf ki, o dövrdəki davranışların, hərəkətlərin mənfi təsiri bu günə qədər qalmaqdadır. Bu isə əlaqələrimizin genişlənməsinə mane olur. Biz başqa ölkələrin daxili işlərinə qarışmamaq barədə öhdəlik götürmüşük. Lakin Elçibəyin püxtələşməmiş hökuməti Cənubi və Şimali Azərbaycanın birləşməsi haqda əsassız şüarlar səsləndirərək Bakı ilə qonşu ölkələr arasında münasibətləri korladı». «Media forum» saytına açıqlamasında N.Nəsibli A.Həsənovu diplomatik etiketlərə əməl etməməkdə suçlayıb: «Yazıqlar olsun o adama. O zamanlar Azərbaycanla İranın münasibətlərinin kəskin olması şəxslərdən, hökumət başçılarından, o cümlədən Tehranda oturan səfirdən asılı deyildi. Bu ziddiyyətlər fundamental xarakter daşıyır». Səfirin bu açıqlamasının milli maraqlara uyğun gəlmədiyinə diqqət çəkən N.Nəsibli faktın qarşı tərəfə hücum, qınaq üçün böyük bir əsas verəcəyini bildirib: «Ağlı olan adam belə fikirlər səsləndirərmi? Bütün hallarda səfir olan şəxs öz ölkəsinin indiki və ya əski hakimiyyətini qınamamalıdır. Bu, bir qayda, qanundur. Bu, beynəlxalq münasibətlər nəzəriyyəsinin əlifbasıdır. Səfir olan şəxs gərək bunu bilsin». N.Nəsibli deyib ki, İranla Azərbaycanın münasibətlərindəki problemlər ilk növbədə bu ölkədəki azərbaycanlıların hüquqlarının pozulması ilə bağlıdır. Digər səbəblər isə əlavədir. Sabiq səfirin sözlərinə görə, o zaman da İran mətbuatı və bəzi rəsmi şəxslər Bakıdakı hökuməti İsrail və Amerikanın nökəri hesab edirdi, indi də bu fikirdə olanlar var: «Bu, Əbülfəz Elçibəyə də, Heydər və İlham Əliyevlərə də aiddir. Bunu gərək İrandakı səfir bilsin».

GUNAZ.TV

SON XƏBƏRLƏR