İRAN PARLAMENTI DAXİLİ İŞLƏR NAZİRİNİ İSTEFAYA GÖNDƏRDİ

SON XƏBƏRLƏR

İRAN PARLAMENTI DAXİLİ İŞLƏR NAZİRİNİ İSTEFAYA GÖNDƏRDİ

2021.10.20, 07:36

Gunaz.tv

PARLAMENT DAXİLİ İŞLƏR NAZİRİNİ İSTEFAYA GÖNDƏRDİ

Bu gün İran parlamenti daxili işlər naziri Əli Kürdanın tutduğu vəzifədən azad edilməsi haqda qərar çıxarıb. «Media forum» saytı xəbər verir ki, 247 deputatın iştirakı ilə keçirilən iclasda əvvəlcə nazirin özü dindirilib. Sonda 188 deputat Kürdanın istefaya göndərilməsinin lehinə səs verib. Nazirə yalnız 45 deputat etimad göstərib. 14 nəfər bitərəf qalıb. Ə.Kürdanın istefaya göndərilməsinə onun fəxri doktorluq dərəcəsinin saxta olması ilə bağlı yaranmış qalmaqal səbəb olub. Doktorluq dərəcəsinin saxta olduğu haqda ilk xəbəri İran hakimiyyətinə yaxın saytlardan biri bir neçə ay əvvəl yaymışdı. Bundan sonra saytın fəaliyyəti dayandırılsa da, məsələyə ciddi yanaşan İran parlamentinin deputatları Ə.Kürdanı dəfələrlə parlamentə çağıraraq sorğu-suala tutmuş, ondan fəxri doktorluq dərəcəsini hardan aldığı haqda izahat istəmişdilər. Ə.Kürdan doktorluq dərəcəsini Oksford Universitetindən aldığını bildirmiş, ancaq az sonra bu təhsil ocağı onun dediklərini təkzib etmişdi. deputatlar bu gün daxili işlər nazirini dindirərkən əsasən onun qeyri-səmimiliyi, ardıcıl yalan danışması və saxta doktorluq dərəcəsi ilə uzun müddət yüksək maaş alması məsələləri üzərində dayanıblar. Ə.Kürdan deputatların suallarını cavablandıranda dəfələrlə dili topuq çalıb, söhbəti əsas mövzudan yayındırmaq istəyib. Onun mövzunu yayındırmaq cəhdləri deputatların kəskin etirazı ilə qarşılanıb. İran prezidenti Mahmud Əhmədinejad bir neçə gün qabaq demişdi ki, parlamentə gedib Ə. Kürdanı müdafiə edəcək. Ancaq prezident vədini yerinə yetirməyib. Ə.Kürdan dindirilməyə müavinləri ilə qatılıb. Siyasi ekspertlər parlamentin daxili işlər nazirini istefaya göndərməsini Əhmədinejad hökumətinə böyük zərbə kimi qiymətləndirirlər. Ə.Kürdan daxili işlər naziri vəzifəsinə üç ay əvvəl təyin edilmişdi.

GUNAZ.TV

SON XƏBƏRLƏR