Qarabağdakı separatçı rejimə "Tatarıstan donu" biçilir Akif Nağı: "Dağlıq Qarabağın statusuyla bağlı söhbətlərə son qoymaq əvəzinə, bu məsələni daha da qabardan nazir Elmar Məmmədyarov sonradan səhvə yol verdiyini anlayacaq" Xarici işlər naziri Elmar Məmmədyarov Dağlıq Qarabağın Azərbaycanın ərazi bütövlüyü çərçivəsində ən yüksək muxtariyyət almasını mümkün sayıb. Nazir bildirib ki, Dağlıq Qarabağa Rusiya Federasiyasının subyekti Tatarıstan Respublikasının statusu səviyyəsində muxtariyyət verilə bilər. Ancaq bunun üçün işğal olunmuş ərazilərdən məcburi çıxarılmış azərbaycanılar geri qayıtmalı, normal sülh şəraiti yaradılmalıdır: "Azərbaycanın mövqeyi belədir ki, ilk növbədə azərbaycanlılar Dağlıq Qarabağ qayıtmalıdır. Normal iqtisadi, siyasi şərait yarandıqdan sonra Qarabağın statusu müəyyən edilə bilər. Bu status isə Tatarıstan statusunda ola bilər. Yəni Azərbaycanın ərazi bütövlüyü çərçivəsində Dağlıq Qarabağ ən yüksək muxtariyyət ala bilər". Tural Rasimoğlu Mütəxəssislərin fikrincə, Dağlıq Qarabağdakı separatçı rejimə Tatarıstan səviyyəsində status verilməsi ideyası özünü doğrultmayacaq və bu variant cəmiyyətdə ciddi narazılıq yarada bilər. Məsələ ilə bağlı fikirlərini öyrəndiyimiz Qarabağ Azadlıq Təşkilatının (QAT) sədri Akif Nağı bu təklifin əleyhinə olduğunu bildirdi. Onun sözlərinə görə, Tatarıstanda müəyyən müstəqillik atributlarının olmasını nəzərə alsaq, bu üsul-idarənin eyni şəkildə Dağlıq Qarabağda da tətbiqi təhlükəlidir: "Tatarıstan Rusiya Federasiyasının tərkibində yüksək muxtariyyət, hətta faktiki olaraq respublika statusuna malikdir. Bu federal respublika xarici dövlətlərlə də əlaqə saxlayır, nümayəndəliklər açır, birbaşa iqtisadi əlaqələr qurur və s. Sözün qısası, Tatarıstanda müstəqilliyin müəyyən atributları var. Rusiya Federasiyasının keçmiş prezidenti Boris Yeltsinin zamanında Tatarıstanın müstəqilliyə yaxın ideal statusu müəyyənləşsə də, Vladimir Putin hakimiyyətə gəldikdən sonra bu respublikanın statusu demək olar ki, əlindən alındı. Buna baxmayaraq, indiki vəziyyətdə belə Tatarıstanın nə vaxtsa, müstəqillik əldə etməsi gözlənilən sayılır. Belə reallıqları nəzərdən qaçırıb bu gün sülh danışıqlarında bizə sərf etməyən yeni bir ideya ilə çıxış etməyə və ya Tatarıstan variantını ortaya qoymağa ehtiyac yoxdur". Bu bəyanatı xarici işlər naziri Elmar Məmmədyarov üçün uğursuz bir gediş kimi qiymətləndirən QAT sədri diplomatik fəaliyyətdə belə diqqətsizliyi təhlükəli məqam saydı: "Ermənistanın keçmiş xarici işlər naziri Vardan Oskanyanın diplomatik fəaliyyətinə və savadına heç kim şübhə etmirdi. Onu ABŞ təhsili görmüş, bir çox xarici ölkələrdə fəaliyyət göstərmiş diplomat kimi tanıyırdılar. O zaman bizim nazirin onunla keçirdiyi görüşlərdə qətiyyətli və keçərli təkliflər ortaya qoya bilməməsini müəyyən mənada başa düşürdük. Amma indiki erməni nazir Edvard Nalbandyan ki, səviyyəsiz və təcrübəsiz bir adamdır. Onun qarşısında bizim nazirin belə ağlasığmaz və sanki əlacsız görünən təklif ortaya qoyması başadüşülən deyil. Təəssüf ki, xarici işlər naziri Elmar Məmmədyarov hərdən heç bir məntiqə sığmayan təkliflərlə çıxış edir. Ən maraqlısı da odur ki, bu təklif noyabrın 1-2-də xarici işlər nazirləri, həmsədrlər, prezidentlər səviyyəsində Moskvada keçiriləcək görüşlər ərəfəsində səsləndirilir". Akif Nağı dedi ki, Qarabağ məsələsinin bu qədər aktuallaşdığı bir dönəmdə bizim nazir diplomatiya prinsiplərinə sığmayan bəyanatlar verir: "Bu dünya Dağlıq Qarabağ konfliktinin həlli üçün ideal şəraitin yarandığını vurğuladığı bir vaxtda Azərbaycan xarici işlər naziri Elmar Məmmədyarovun timsalında məsələni daha da qəlizləşdiririk. Ümumiyyətlə, Dağlıq Qarabağ üçün hər hansı bir statusun müəyyənləşdirilməsinin əleyhinəyik. Tatarıstan variantı isə birmənalı olaraq qəbuledilməzdir. Dağlıq Qarabağın statusuyla bağlı söhbətlərə son qoymaq əvəzinə, bu məsələni daha da qabardan xarici işlər naziri Elmar Məmmədyarov yəqin ki, sonradan nə qədər böyük səhvə yol verdiyini anlayacaq. Tatarıstan variantı keçməsə, yeni bir oxşar variantlar ortaya çıxsa belə, Azərbaycan məsələyə bu şəkildə yanaşmamalıdır". Onun sözlərinə görə Ermənistanın xarici siyasətini müəyyənləşdirənlərin Dağlıq Qarabağın "müstəqilliyi"ndən çıxış edib məqsədyönlü xarici siyasət yürütdüyü halda bizim xarici işlər nazirliyinin hansı mövqedən çıxış etdiyi bilinmir: "Gah deyirlər, Dağlıq Qarabağın statusu məsələsi müzakirə olunmur, gah da özləri Tatarıstan variantını məsləhət bilirlər. Hesab edirəm ki, bu siyasətlə çox uzağa gedə bilməyəcəyik, özümüzü siyasi-diplomatik dolaşığa salacağıq və hətta deyərdim ki, bu şəkildə təklifləri ortaya qoymaqla işğalçı ölkəyə müəyyən mənada kömək də edə bilərik. Dağlıq Qarabağdakı rejimin hansısa muxtariyyət qazanması heç vaxt müzakirə mövzusu olmamalıdır. Çünki heç kim təminat verə bilməz ki, muxtariyyat alan Qarabağdakı separatçı ermənilər sabah yenə müstəqillik də tələb etməcək. Ümumiyyətlə, heç muxtariyyət üçün də, hər hansı bir əsas yoxdur. Qısası, nazirimizin Dağlıq Qarabağ münaqişəsini həll etmək üçün Tatarıstanın statusu səviyyəsində muxtariyyat təklifini ortaya çıxarması təəssüf hissi doğurur". xalqcebhesi