Qarabağ Azadlıq Təşkilatı Ermənistan-Azərbaycan münaqişəsinə dair bu gün yaydığı bəyanatda rəsmi Moskvanın ümumiyyətlə danışıqlar prosesindən kənarlaşdırılmasını təklif edib Qarabağ Azadlıq Təşkilatının Ali Məclisi və Ağsaqqallar Şurasının birgə iclası keçirilib. İclasda ilk olaraq təşkilati məsələlərə baxılıb, Firidun Məmmədov QATsədrinin birinci müavini, Arzu Qasımova İdarə heyətinin üzvü, Oruc İsayev Ali Məclisin üzvü seçiliblər. Sonra Qarabağla bağlı son hadisələr, danışıqların gedişi, yeni təşəbbüslər müzakirə olunub və uyğun qərarlar qəbul olunub. İclasda həmçinin bəyanat qəbul olunub. Bəyanatda bildirilir: "Son dövrdə Qarabağ məsələsi ətrafında ciddi fəallaşma müşahidə olunur. Ayrı-ayrı beynəlxalq təşkilatlar, bir sıra dövlətlər vasitəçilik təşəbbüsü ilə çıxış edirlər. Lakin hansı məsələlərin müzakirə olunması, hansı həll variantının təklif olunması ilə bağlı konkret məlumat verilmir. Konkret məlumatların olmaması, Azərbaycan rəsmilərinin açıqlamalarının beynəlxalq təşkilatların mövqeyi ilə ziddiyət təşkil etməsi və bəzi qeyri-rəsmi məlumatların yayılması ciddi narahatlıq doğurur. Rusiyanın Gürcüstana hərbi müdaxiləsindən sonra bölgədə yaranmış yeni hərbi-siyasi vəziyyət və Rusiyanın bölgədə öz hökmranlığını bərpa etmək üçün atdığı kəskin addımlar Qarabağın taleyi üçün ciddi təhlükə yaratıb. Rusiya Qarabağ məsələsi ilə bağlı təşəbbüsü tam şəkildə ələ almağa, münaqişə zonasına özünün hərbi qüvvələrini yeritməyə çalışır. ABŞ Rusiyanın hərəkətlərinin qarşısını almaq üçün təsirli tədbirlər görmək fikrində deyil və daha çox Ermənistanın Rusiya təsirindən çıxarılması istiqamətində addımlar atmağa çalışır.Türkiyə hakimiyyətinin regionda, o cümlədən Azərbaycanla Ermənistan arasında münasibətlərin yaxşılaşdırılmasına yönəlmiş təşəbbüsü Azərbaycanın maraqlarına cavab vermir. Ən ümumi məlumat ondan ibarətdir ki, danışıqlar Madrid prinsipləri əsasında aparılır və bu prinsiplər əsasında razılaşmanın əldə olunması nəzərdə tutulur. Madrid prinsipləri birmənalı şəkildə Azərbaycanın maraqlarına ziddir. Bu prinsiplər Dağlıq Qarabağın ətrafındakı rayonların azad olunması müqabilində Dağlıq Qarabağda referendumun keçirilməsi, münaqişə zonasına sülhməramlı qüvvələrin yerləşdirilməsini nəzərdə tutur. Bu isə Dağlıq Qarabağın həmişəlik itirilməsi deməkdir. Ermənistanın işğal olunmuş ərazilərdə son hərbi təlimləri və həmin təlimlərdə S.Sarkisyanın iştirakı işğalçı dövlətin öz iddialarından geri çəkilmək istəmədiyini bir daha təsdiq edir. Biz yuxarıda deyilənləri nəzərə alaraq hesab edirik: 1.Azərbaycan hakimiyyəti danışıqların gedişi, beynəlxalq təşkilatların və ayrı-ayrı dövlətlərin verdikləri təkliflərin məzmunu ilə bağlı cəmiyyətə konkret məlumat verməlidir. Milli Məclisdə Qarabağ məsələsi ilə bağlı təcili müzakirələr keçirilməlidir. 2.Qarabağla bağlı danışıqlarda Rusiyanın təşəbbüsü ələ keçirməsinə imkan verilməməlidir. Rusiya danışıqlardan tamamilə kənarlaşdırılmalıdır. 3.Minsk qrupu həmsədrlərinin vasitəçilik missiyasından imtina edilməli, onların öz fəaliyyətlərini bərpa etməsinə imkan verilməməlidir. Alternativ variant kimi danışıqların BMT müstəvisinə keçirilməsinə nail olunmalıdır. 4.Azərbaycan heç bir halda və formada referendumun və ya səsvermənin keçirilməsi ilə bağlı ideyanı qəbul etməməlidir. 5.Azərbaycan hər hansı ad altında, Rusiyanın və ya bir neçə ölkənin sülhməramlı qüvvələrinin bölgəyə yeridilməsinə razılıq verməməlidir. 6.Ermənistanın işğalçı qüvvələri zəbt olunmuş ərazilərdən çıxana qədər Azərbaycan təcavüzkar ölkə ilə münasibətlərin normallaşdırılmasına, onun regional layihələrə qoşulmasına razılıq verməməlidir. 7.Azərbaycan dövləti və cəmiyyəti danışıqların heç bir nəticə verməyəcəyinə əmin olmalı və hər gün, hər saat işğalçılara qarşı azadlıq müharibəsinə hazırlaşmalıdır". /ANS PRESS/