Bakı Rusiyanın Qarabağa dair son təşəbbüsünü alqışlayır

SON XƏBƏRLƏR

Bakı Rusiyanın Qarabağa dair son təşəbbüsünü alqışlayır

2021.10.20, 07:36

Gunaz.tv

Bakı Rusiyanın Qarabağa dair son təşəbbüsünü alqışlayır

Azərbaycanın Konstitusiya Məhkəməsi bu gün 15 oktyabr prezident seçkilərində İlham Əliyevin qalib gəldiyini rəsmən elan edib. Prezidentin andiçmə mərasiminin cümə günü, oktyabrın 24-də keçiriləcəyi bildirilib. Elə bu gün Azərbaycan rəhbəri ilə Rusiya prezidenti Dmitriy Medvedev arasında telefon söhbəti olub. Xəbər verilir ki, danışıq zamanı, Rusiya, Azərbaycan və Ermənistan liderlərinin iştirakı ilə Moskvada Dağlıq Qarabağ münaqişəsinin həllinə dair üçtərəfli görüşün keçirilməsi müzakirə olunub. Belə görüş təklifi ilə, Dmitriy Medvedev Yerevana etdiyi səfər zamanı çıxış etmişdi. Bir sıra təhlilçilər, hər iki ölkədə prezident seçkilərinin keçirilməsindən sonra, Dağlıq Qarabağ münaqişəsinin həlli perspektivlərinin artacağını ehtimal edirdilər. BBC-nin Azərbaycan xidmətinə müsahibədə, Azərbaycan Prezident Aparatının beynəlxalq məsələlər şöbəsinin müdiri Novruz Məmmədov dedi ki, ölkədə keçirilən seçkilər heç zaman Dağlıq Qarabağ münaqişəsinin həlli qarşısında maneə olmayıb. "Azərbaycanda heç kim belə mövqe bildirməyib. Prezident seçkiləri Azərbaycanda danışıqlara maneə törətməyib və törətmir də. Belə demək kiməsə lazımdır, ona görə də belə deyir. Bu xaricdəkilərin marağı çərçivəsindədir. Yəqin həm Avropa, həm Amerikada istəyirlər ki, bu məsələ uzansın. 16 ildir ki, münaqişə ilə bağlı nə Qərb, nə Avropa qəti, konkret bir mövqe bildirmir. Sanki 1945-ci ildən sonra özlərinin formalaşdırdığı beynəlxalq hüquq bu gün sanki yoxdur. Bizə deyirlər ki, "gedin, özünüz razılaşın." Biz bunu başa düşə bilmirik. Belə mövqe bizi təəccübləndirir. Ona görə onlar seçki kimi məsələləri ortaya qoyurlar. Seçkilər bizdə heç vaxt mane olmayıb." Rusiya prezidenti Dmitriy Medvedevin, Moskvada Azərbaycan və Ermənistan prezidentlərinin iştirakı ilə görüş keçirmək təklifini, Novruz Məmmədov müsbət qiymətləndirir: "Kim ki, səmərəli və qəti mövqe bildirirsə, biz bunu alqışlayırıq. Qərbin bu qədər ləng, neytral mövqeyini görən Rusiya, yəqin ki bu məsələdə müəyyən fəallıq göstərmək istəyir. Mən bunu tam normal və məntiqi sayıram. Əgər müəyyən bir irəliləyiş əldə edilərsə, bizim də buna münasibətimiz, təbii ki, müsbət olacaq." Bir neçə həftə əvvəl, Türkiyənin Dağlıq Qarabağın həlli istiqamətindəki səylərini, Rusiya və Minsk qrupunun iştirakı ilə koordinasiya edilməsi ehtiyacından danışarkən, Novruz Məmmədov bu təşəbbüslərin bir-birinə yardımçı ola biləcəyini istisna etmədi: "Koordinasiya ümumiyyətlə proseslərin, danışıqların gedişindən asılı olacaqdır. Şübhəsiz ki, münaqişənin həllində Türkiyənin də müəyyən rolu ola bilər. Bunu Ermənistan rəhbərliyi də başa düşür." BBC

GUNAZ.TV

SON XƏBƏRLƏR