Rusiya Cənubi Qafqazın Qərbə yolunu kəsmək istəyir "İcevanda yaradılacaq rus hərbi bazası ABŞ və NATO-nu, eləcə də Türkiyəni ciddi narahat etməlidir" Moskva Hərbi və Müdafiə Tədqiqatları İnstitunun direktoru Konstantin Boyarıntsev iki gün öncə təhlükəli bir bəyanatla çıxış edib. O bildirib ki, Rusiyanın Ermənistanda yeni hərbi baza yaratması barədə sənəd artıq imzalanıb. Həmin sənəddə 2010-cu ilin noyabrın 12-nə qədər Ermənistan ərazisində şimal qonşumuzun daha bir hərbi hissət yerləşdirməsi nəzərdə tutulub. Hətta İcevanın yaxınlığında, cənubunda hərbi baza üçün min hektar ərazi də ayrılıb. Rusiyanın Gümrüdəki 102-ci hərbi bazasının tərkibindəki 992-ci artileriya, 988-ci zenit-raket və 202-ci motoatıcı alaylarının da İcevana göndəriləcəyi gözlənilir. Xatırladaq ki, 992-ci artilleriya alayı qaubisalarla silahlanmış üç batareya və "Qrad" reaktiv-artilleriya qurğuları divizionundan ibarətdir. Tural 988-ci zenit-raket alayında isə "Kub" qurğuları və iki "S-300" zenit-raket qurğuları batareyaları var. Hər iki alayın şəxsi heyəti 500 nəfərdən ibarətdir. Məsələylə bağlı mövqeyini öyrəndiyimiz Avroatlantika Əməkdaşlıq Assosasiyasının prezidenti Sülhəddin Əkbərin sözlərinə görə, Rusiyanın Gürcüstana təcavüzü, "beşgünlük müharibə"dən sonra yaranmış situasiyaya əsaslansaq, İcevanda hərbi bazanın yaradılması istiqamətində əməli işlərin görülməsi mümkündür. Rusiya regionda öz mövqeyini hərbi müstəvidə möhkəmləndirməyə başlayıb: "Gürcüstan olaylarından sonra Cənubi Qafqazda yaranmış vəziyyət Rusiyanı ciddi şəkildə təlaşlandırır. Çünki Kreml çox təhlükəli və riskli bir addım atıb. Moskva bilir ki, ABŞ, Avropa Birliyi və NATO Rusiyanın bu təcavüzüylə barışmayacaq. Ona görə də Rusiya regionun digər ölkələrində möhkəmlənməyə cəhd göstərir". Sülhəddin Əkbər Rusiyanın Gürcüstanla bütün siyasi, diplomatik, iqtisadi münasibətləri kəsiləndən sonra artıq Ermənistanla da quru əlaqələrinin faktiki olaraq aradan qalxdığını söylədi. Ekspert bu amilin də Kremli İrəvanda daha da möhkəmlənmək üçün addımlar atmağa vadar etdiyini vurğuladı: "Ona görə də artıq Rusiya İrəvana xüsusi önəm verməyə başlayıb və həm də bədnam qonşumuz bu gün Moskva üçün xüsusi önəm daşıyır. Ermənistan uzun müddətdir ki, Rusiya ilə hərbi-siyasi müttəfiqliyini saxlayır və amma son aylarda yaranmış vəziyyət İrəvanın da narahatçılığını artırıb. Müxalifəti qan içində boğan Serj Sərkisyan rejiminini indiki vəziyyəti nəzərə alınarsa, başa düşmək olar ki, Ermənistan ikinci baza yaradılması məsələsində Rusiyanın təzyiqləri qarşısında davam gətirə bilməyəcək". Sülhəddin bəyin fikrincə, problemin digər tərəfi isə budur ki, yeni hərbi bazanın yaradılmasında Ermənistanın öz maraqları var: "Təbii ki, bu, ilk növbədə Azərbaycanın maraqlarına ciddi zərbədir. İkinci hərbi bazanın yeri təsadüfən seçilməyib. Hələlik yeni bazanın yaradılması haqda sənədin imzalandığı barədə rəsmi açıqlama verilməsə də, uzun müddətdir ki, bu barədə ciddi danışıqlar getdiyi bildirilir. Burada hərbi bazanın iqtisadi cəhətdən böyük layihələrin keçdiyi marşrutlara yaxınlığı da nəzərə alınmalıdır". Politoloqun sözlərinə görə, vaxtilə Gümrü hərbi bazası Türkiyə təhlükəsilə bağlı yaranmışdısa, İcevan hərbi bazası da Gürcüstan və gələcəkdə taleyini Qərbə birdəfəlik bağlayacaq Azərbaycan əleyhinə yaradılır: "Bu gün İcevanda yaradılacaq ikinci rus hərbi bazası ABŞ və NATO-nu, eləcə də Türkiyəni ciddi narahat etməlidir. Çünki bu bazanın regionda yerləşməsi Rusiyanın təhlükəli niyyətlərindən xəbər verir. NATO-Rusiya qarşıdurması açıq müstəviyə keçib. Təbii ki, qarşı tərəf də müəyyən addımlar atmağa cəhd göstərəcək. Yəni bu qarşıdurma davam etdikcə, xüsusən də İran məsələsi gündəlikdən çıxmadıqca, Qafqazda yaranmış geopolitik qarşıdurma regionun strateji taleyi həll olunana qədər sürəcək. Ona görə də ölkənin siyasi rəhbərliyi məsələləri çox ciddi şəkildə araşdırmalı, dünyada və Qafqazda gedən başlıca tendensiyaları analiz edərək ilk növbədə Azərbaycanın milli təhlükəsizlik maraqlarını nəzərə almalıdır". xalqcebhesi