İsrail Azərbaycana silah satmaqda davam edəcək Amerikanın mötəbər yəhudi təşkilatı ermənilərin ittihamını əsassız saydı JINSA-nın icraçı direktoru Tom Neyman: “Rusiyanın avqust ayında Gürcüstana soxulmasından sonra baş verənlər məqsədəmüvafiq və zəruridir” Birləşmiş Ştatların mötəbər yəhudi təşkilatlarından biri ermənilərin İsrailin Azərbaycana silah satmasından narazılığını əsassız hesab edib. Mərkəzi qərargahı Vaşinqtonda yerləşən Milli təhlükəsizlik Məsələləri üzrə Yəhudi İnstitutu (JINSA - Jewish Institute for National Security Affairs) Amerikanin Erməni Milli Komitəsinin (ANCA) rəhbərliyinin bir neçə gün öncə səslənmiş bəyanatından dərin narahatlıq keçirdiyini bəyan edib. Bu barədə bəyanat ABŞ-ın “BUSINESS WIRE” dərgisində dərc olunub. Eyni zamanda qeyd edilən bəyanat ABŞ-ın bir çoz qəzet və dərgilərində işıq üzü görüb. Xatırladaq ki, ANCA İsraili Azərbaycana silah satmaqda ittiham edib. Təşkilatın direktorlar şurasının keçmiş sədri Jirayr Arutunyan “Təhlükəli dəstək: Gsrail getdikcə Azərbaycana daha zox silah satgr, çünki yəhudi lobbisi Azərbaycang dəstəkləyir” adlı məqaləsində Azərbaycana silah satışının davam etdirilməsindən narahatlığını ifadə edib. “İsrail tərəfindən Azərbaycana silah satışı Qafqaz üçün təhlükəli presedentdir. Hərbi ticarət Cənubi Qafqaz kimi qeyri-sabit regionda təhlükəli təxribatdır”, - deyə J.Arutunyan bildirib. Məqalə müəllifi İsrailin İran və Suriyanı “Həmas” və “Hizbulla”nı silahlandırmaqda ittiham etdiyi bir zamanda özünün ciddi silah ixracsısı olduğunu qeyd edir. “Tel-Əviv o zaman Bakıya silah satır ki, İlham Əliyev daimi olaraq Dağlıq Qarabağ probleminin güc yolu ilə həll etmək niyyətini bəyan edir”, - deyə J.Arutunyan qeyd edir. Arutunyan həmçinin bildirib ki, Azərbaycanla İsrail arasında hərbi və iqtisadi əməkdaşlıq inkişaf etdiyi bir zamanda Amerikanın Yəhudi Komitəsi (AJC) Azərbaycanın ABŞ-da lobbiçiliyini həyata keçirmək niyyətindədir. Məqalədə qeyd edilir ki, AJC-nin sədri Devid Harris Bakıya səfəri zamanı İlham Əliyevlə görüşündən sonra belə vəd verib. “Bununla yanaşı Əliyevlə görüşündən sonra yəhudi komitəsinin sədri bəyan edib ki, AJC Azərbaycanı ABŞ-ın və İsrailin etibarlı tərəfdaşı hesab edir. O qeyd etdi ki, Vaşinqtonu ATƏT-in Mins Qrupunun rolunun artırılmasına daha çox diqqət ayırmasına əmin etməyə çalışacaq. Beləliklə, biz İsrail və Azərbaycan arasında hərbi əməkdaşlığın genişlənməsinin, eləcə də Amerika Yəhudi Komitəsi tərəfindən Azərbaycana dəstəyin güclənməsinin şahidi oluruq. AJC-nin sıravi üzvləri çətin ki, bütün bunlar barədə məlumatlı olsunlar. Onlar bilmirlər ki, Amerikanın Yəhudi Komitəsi və İsrail qeyri-sabit Qafqaz regionuna soxulurlar və Cənubi Qafqazda hərbi əməliyyatların bərpa olunması riskini artırırlar”, - deyə J.Arutunyan bildirib. “BUSINESS WIRE” dərgisində dərc olunmuş bəyanatda JINSA Azərbaycanın müdafiə sahəsinə dəstək verilməsinə çağırıb. “Azərbaycan Birləşmiş Ştatların vacib dostudur və İsraillə müsbət münasibətləri dəstəkləyən azsaylı müsəlman ölkələrindən biridir”, - deyə JINSA-nın icraçı direktoru Tom Neyman bəyan edib. Bu açıqlama Amerika dərgisində “JINCA Azərbaycanın müdafiəsinə dəstək verməyə çağırır” başlığı altında dərc olunub. “Azərbaycan qeyri-sabit regionda yerləşir, Rusiyanın avqust ayında Gürcüstana soxulmasından sonra daha təhlükəli vəziyyətdədir. Hazırda baş verən bütün hallar, ABŞ tərəfindən dəstək və s. məqsədəmüvafiq və zəruridir”, - deyə Neyman bəyan edib. Qeyd edək ki, Milli Təhlükəsizlik Məsələləri üzrə Yəhudi İnstitutu müstəqil, qeyri-kommersiya, qeyri-partiya mənsubiyyətli təşkilat olaraq 1976-cı ildə yaradılıb. Təşkilatın məqsədi milli və beynəlxalq təhlükəsizlik məsələləri barədə ictimaiyyəti məlumatlandırmaqdır. Buraya həmçinin ABŞ-ın müdafiə və təhlükəsizlik sahəsinin vəziyyətinin öyrənilməsi, ABŞ-ın müttəfiqlərinin, o cümlədən İsrailin Yaxın Şərqdə demokratik dəyərlərin yayılması dairəsinin genişlənməsi istiqamətində açar rolunun əhəmiyyətli olması barədə təbliğatın aparılması daxildir. Cəsur Sümərənli bizimyol