Prezident hökuməti dəyişəcək? Prezident seçkisi sona çatdı və bir neçə gündən sonra keçiriləcək andiçmə mərasimi ilə yeni prezident səlahiyyətlərini icra etməyə başlayacaq. Azərbaycan Respublikası Konstitusiyasının 116-cı maddəsinə görə, elə həmin gün, yəni prezident səlahiyyətlərini icra etməyə başladığı gün Nazirlər Kabineti Azərbaycan Respublikası Prezidentinə istefayla bağlı müraciət edir. Nazirlər Kabinetinin səlahiyyət müddəti prezidentin səlahiyyət müddəti ilə məhdudlaşdırılır. Qanunvericiliyə görə, prezident bu istefanı qəbul edə və ya onu qəbul etməyə bilər. İstefa qəbul edildiyi təqdirdə Nazirlər Kabinetinin yeni tərkibi formalaşana qədər prezidentin sərəncamı ilə Nazirlər Kabineti üzvlərinin müvəqqəti olaraq öz səlahiyyətlərini icra etmək vəzifəsi olur. İstefa qəbul edilmədikdə isə Nazirlər Kabineti köhnə tərkiblə öz səlahiyyətlərini davam etdirir. Əminliklə demək olar ki, prezident seçkisindən sonra yeni hökumətin tərkibi ictimaiyyətin maraqla gözlədiyi məsələdir. Prezidentliyə namizədlərin çıxışlarında bir sıra hökumət üzvlərinin tənqidi, eləcə də bəzi mətbuat orqanlarında hökumət üzvlərinin fəaliyyətsizliklə bağlı mövqeyi marağı artıran səbəblərdəndir. Görəsən, yeni hökumətdə yeni adlara rast gəlmək mümkün olacaqmı? Nəzərə alaq ki, iqtidarın arsenalında kifayət qədər savadlı kadrlar var. Digər tərəfdən də prezident seçkisində namizəd kimi iştirak edən müxalifət liderlərinin yeni hökumətdə görünməsinə sensasiya kimi baxmaq olmaz. Həmin namizədlər MSK-nın elan etdiyi ilkin nəticədən həmən sonra qalib İlham Əliyevi təbrik etdilər və onlar təbliğat-təşviqat dönəmində də bir neçə məqamı nəzərə almasaq, iqtidar əleyhinə kəskin mövqe ortaya qoymadılar. Bütün bunlar isə keçmiş namizədlərin hökumətin tərkibinə daxil edilməsini şərtləndirən amillərdir. Prezidentliyə keçmiş namizəd, Aydınlar Partiyası təşəbbüs Qrupunun üzvü Qulamhüseyn Əlibəylinin sözlərinə görə, köhnə hökumətin dəyişəcəyini gözləmir: "Zənn etmirəm ki, yeni yaradılacaq hökumətin tərkibində yeni adlara rast gəlinsin. Təcrübə göstərir ki, ardıcıl olaraq hakimiyyətə gələn iqtidarlar hökumətin dəyişməsində o qədər maraqlı olmurlar. Əslində isə hökumətin bütövlükdə dəyişməsinə ehtiyac var, köhnə hökumət üzvlərini əvəz edə biləcək savadlı kadrlarımız kifayət qədərdir". Prezident seçkisində namizəd olmuş Böyük Quruluş Partiyasının sədri Fazil Qəzənfəroğlu da eyni fikirdədir: "Güman etmirəm ki, yeni formalaşan hökumətdə yeni adlar olsun. Hökumət komandası olduğu kimi qalacaq". Azərbaycanda xeyli sayda cavan və savadlı kadrların olduğunu deyən politoloq Zərdüşt Əlizadə də hökumət üzvlərinin iş başında qalacağını düşünür: "Hökumət üzvləri çox mütəşəkkil bir qrup halına gəlib. Son seçkinin nəticələri də göstərdi ki, hakimiyyət bu mütəşəkkil dəstədən səmərəli istifadə etdi. Hökumətin dəyişilməsindən söhbət belə gedə bilməz, hakimiyyət də belə bir dəyişiklikdə maraqlı deyil". YAP Siyasi Şurasının üzvü, millət vəkili Aydın Mirzəzadə isə hesab edir ki, yeni hökumətin tərkibi onu o qədər də maraqlandırmır: "Məni maraqlandıran cənab İlham Əliyevin prezident seçilməsi və xalqın etimadını qazanmasıdır. Hesab edirəm ki, İlham Əliyev bütün vaxtlarda və məsələlərdə olduğu kimi, yeni hökumətin formalaşmasında da düzgün seçim edəcək". Ömər ƏMİROV adalet