Rasim Musabəyov: CƏMİYYƏTİN İRANA VƏ RUSİYAYA MEYLLƏNƏCƏYİ İNANDIRICI DEYİL

SON XƏBƏRLƏR

Rasim Musabəyov: CƏMİYYƏTİN İRANA VƏ RUSİYAYA MEYLLƏNƏCƏYİ İNANDIRICI DEYİL

2021.10.20, 07:36

Gunaz.tv

Rasim Musabəyov: “Cəmiyyət bu seçkiləri qəbul edirsə, Qərbdən nə gözləməliyik?” 2008-ci il seçkisi ümumi şəkildə Azərbaycan demokratiyasına çox böyük zərbə kimi qiymətləndirilir. Anormal siyasi şərait üzündən müxalifətin bu seçkilərə qatılmaması hakimiyyətin heç bir müqavimətlə rastlaşmadan özü istədiyi kimi seçki keçirməsinə səbəb oldu. Nəticə etibarı ilə seçkilərdə Qərb dairələri də absurd bir mövqe tutdular. Onların seçkiöncəsi duruma heç bir əhəmiyyət vermədən yalnız səsvermə günü baş verən sakitliyi müşahidə edib, bunu yüksək dəyərləndirmələri yerli ekspertlər və cəmiyyət tərəfindən tənqidlə qarşılandı. Dəfələrlə belə fikirlərə rast gəlinib ki, Azərbaycan çox həssas bir bölgədə yerləşir və burada Qərbdən hər hansı bir real dəstək görmədikdə insanlar İrana, Rusiyaya meyllənə bilərlər. Faktiki olaraq, bu gün Azərbaycan cəmiyyətində Qərbə inam əməlli-başlı sarsılıb. Onların bu seçkilərlə bağlı tutduqları mövqe müəyyən ümidləri də öldürüb. Bu münasibətlə üzləşən Azərbaycan cəmiyyəti İrana, Rusiyaya meyllənə bilərmi? Mövzu ətrafında söhbət etdiyimiz politoloq Rasim Musabəyov bildirdi ki, əslində məsələnin mahiyyətində Qərbin seçkiləri nə cür qiymətləndirməsi dayanmır: “Əsas bu seçkilərə Azərbaycan cəmiyyətinin reaksiyasıdır. Hər halda, görünən budur ki, cəmiyyətin heç bir təbəqəsi bu seçkilərə hansısa bir ciddi etiraz bildirmədi. Heç yerdə etiraz, kütləvi aksiya, bəyanat-filan olmadı. Əgər cəmiyyət belə bir seçkini qəbul edirsə, biz Qərbdən nə gözləyirik? Qərbin nəyinə lazımdır ağrımayan başına dəsmal bağlasın? Odur ki, məncə, insanların Qərbə qarşı köklənməsi tendensiyası hiss olunmur və bunu süni şəkildə yaratmaq da xeyrimizə deyil. Sadəcə, müxalifət öz acizliyini Qərbin hakimiyyətlə əlbir olması ilə ört-basdır etmək istəyir”. R.Musabəyova görə, Azərbaycan cəmiyyətində İrana, Rusiyaya meyllərin artacağı inandırıcı deyil: “Demək olmaz da ki, bu istiqamətlərə meyllər yoxdur. Amma onların yüksələcəyi inandırıcı deyil. Bizim keçirdiyimiz sorğularda belə nəticə ortaya çıxır ki, Rusiyanı Azərbaycanın ikinci dostu hesab edirlərsə, eyni zamanda həm də ikinci, bəzən üçüncü düşməni kimi də göstərirlər. Yəni soruşursan ki, ikinci dostumuz kimdir, deyirlər Rusiya. Həmçinin ikinci və ya üçüncü düşmənimiz kimdir deyə soruşanda, yenə də Rusiyanın adı çəkilir. Eyni ilə İranla da bağlı həmin vəziyyətdir. İndiki halda anti-Qərb əhval-ruhiyyəsinin artması hiss olunmur və buna zəmin də yoxdur. Məsələ ondadır ki, heç olmasa Qərb üz-gözünü turşutdu, müəyyən çatışmazlıqların olduğunu dedi, müəyyən tənqidlər oldu. İran, Rusiya neylədi? Onlar gülərüzlə iqtidarı təqdir etdilər. Ona görə də onlara hansısa meyllərin olacağına inanmıram”. Elşad MƏMMƏDLİ musavat

GUNAZ.TV

SON XƏBƏRLƏR