GENERAL BAŞBUĞ ORDUNU GÖZDƏN SALANLARA BARMAQ SİLKƏLƏDİ Silahlı Qüvvələrin Baş Qərargah rəisi: “Hər kəsi doğru yerdə dayanmağa çağırıram” Türkiyədə PKK-nın Hakkaridəki jandarma kazarmasına oktyabrın 3-də həyata keçirdiyi hücumdan sonra silahlı qüvvələrə qarşı artan tənqid və ittihamlara dünən Baş Qərargahdan sərt reaksiya verilib. Baş Qərargah rəisi, ordu generalı İlkər Başbuğ mətbuat qarşısına çıxaraq hökumətə bağlı mediada son günlər silahlı qüvvələrin rəhbərliyi və PKK-nın Hakkaridəki hücumu ilə bağlı yer alan iddialara münasibət bildirib. Olduqca əsəbi görünən və qəzəbindən titrədiyi gözlərdən yayınmayan general silahlı qüvvələri gözdən salmağa çalışanlara və PKK-nın uğurlu hücumu haqda təbliğat aparanlara xəbərdarlıq edib. Xatırladaq ki, PKK-nın Hakkaridə 17 əsgərin həlak olması ilə nəticələnən hücumundan sonra hökumətə bağlı qəzetlərdən biri həmin hücum zamanı Hərbi Hava Qüvvələrinin komandanı, ordu generalı Aydoğan Babaoğlunun Antalyada qolf oynayarkən çəkilmiş fotosunu manşetdən verib. Bundan sonra hökumətə yaxın qəzetlər generala qarşı sərt tənqid kampaniyasına başlayıblar. Bir gün əvvəl isə həmin qəzetlərdən biri Baş Qərargahın Aktütün basqanından əvvəlcədən məlumatlı olsa da, yetərli tədbirlər görmədiyi, həmçinin həmin hücum barədə ictimaiyyətə yalan məlumatlar verdiyi haqda sensasion iddialar dərc edib. Bu zaman qəzet PKK-çıların hücumunu əks etdirən və pilotsus kəşfiyyat təyyarəsindən çəkilmiş videokadrlar, habelə hücum zamanı PKK-çılar arasında radiodanışıqların stenoqramından istifadə edib. Bu məxfi məlumatların jandarma kəşfiyyatındakı mənbələrdən əldə olunduğu iddia edilir. Gözlənilirdi ki, bu iddialar silahlı qüvvələrin rəhbərliyini qəzəbləndirəcək. Belə də olub və general Başbuğ mətbuat qarşısına çıxaraq silahlı qüvvələr adından sərt bəyanatla çıxış edib. General əvvəlcə silahlı qüvvələrin bacarıqsızlığı haqda təbliğat aparanlara cavab olaraq bildirib ki, Hakkaridəki hadisə PKK terror təşkilatı baxımından intihar hücumu, türk əsgəri üçün isə qəhrəmanlıq dastanıdır. Başbuğ hadisədən dərhal sonra quru qoşunlarının komandanlığı tərəfindən araşdırma başlandığını, nəticələr haqda ictimaiyyətə məlumat veriləcəyini deyib: “Ayrıca olaraq bu məsələ ilə bağlı gizli məlumatları sızdıranlar və bu məlumatları yayanlar haqqında da qanun çərçivəsində tədbirlər görüləcək. Bütün bunlara baxmayaraq, terror təşkilatının hücumlarını uğurlu kimi təqdim edənlər axan və axacaq hər damla qana görə məsuliyyətə ortaq olacaqlar. Bunu hər kəsin anlamasını istəyirəm. Son günlərdə PKK-nın sistemli xarakter alan hücumları türk silahlı qüvvələrinin gücünü, qətiyyətini artırmaqdan başqa heç nəyə yaramayacaq. Ordunun bu tip hücumlar qarşısında yalan məlumatlara söykənən, sərhədləri aşan tənqidlərə verəcəyi reaksiya bəllidir. Son sözüm budur: hər kəs diqqətli olmalı və düzgün yerdə qərar tutmalıdır”. Mətbuatın yazdığına görə, general Başbuğun bəyanatı səsləndirərkən bir neçə dəfə barmaq silkələdiyi müşahidə olunub. Bu isə ordunun aparılan təbliğatdan çox qəzəbləndiyini göstərir. General ad çəkməsə də onun silahlı qüvvələri gözdən salmağa yönələn kampaniyanı təşkil edənlərə barmaq silkələdiyi şübhə doğurmurdu. Qeyd edək ki, bir gün əvvəl general Başbuğ hökumətyönlü medianın hədəfə aldığı hava qüvvələrinin komandanına da dəstəyini ifadə edib, Ankarada keçirilən tədbirlərdən birində o, generalın yanında dayanıb, çıxanda isə onu xidməti avtomobilinə dəvət edib. F.MƏMMƏDOV musavat