Bu gün prezident seçkisidir Prosesi 47 min yerli müşahidəçi izləyəcək 500 məntəqədə "web-kamera" quraşdırılıb Bu gün saat 8:00-dan etibarən Azərbaycan vətəndaşları yeni prezidentini seçmək üçün seçki məntəqələrinə axışacaqlar. Dünən seçkiyə hazırlıqla bağlı yekun mətbuat konfransı keçirən Mərkəzi Seçki Komissiyasının (MSK) sədri Məzahir Pənahov xatırladıb ki, dünən saat 8:00-dan etibarən namizədlərin təbliğat - təşviqat kampaniyası başa çatıb. Məntəqələrin tam hazır vəziyyətə gətirildiyini söyləyən M.Pənahov vurğulayıb ki, artıq məntəqələrdə və ətrafda olan reklam plakatları yığışdırılıb. Seçki marafonunun gedişi barədə qısa məlumat verən MSK sədri qeyd edib ki, ilkin mərhələdə prezidentliyə 21 nəfər namizədliyini irəli sürüb. Onların 12-si imza vərəqələrini geri qaytarıb. İddialılardan 2 nəfər öz ərizələri ilə namizədliklərinə xitam veriblər. 1 nəfərin ikili vətəndaşlığı olduğu üçün namizədliyi qeydə alınmayıb, 1 nəfər imza vərəqələrini boş qaytarıb, 1 nəfərin topladığı imzaların bir hissəsi isə etibarsız hesab edildiyindən marafondan kənarlaşdırılıb. Beləliklə yalnız 7 nəfər prezidentliyə namizəd kimi qeydə alınıb. M.Pənahov bildirib ki, təbliğat-təşviqat kampaniyasının gedişində namizədlərə həftədə 6 saat olmaqla İctimai Televiziya və Radio Şirkətinin efir vaxtından pulsuz istifadə etmək imkanı verilib. Maliyyəsi dövlət tərəfindən olan "Azərbaycan", "Respublika", "Xalq" və "Bakinski raboçi" kimi dövri nəşrlərdə də namizədlər təbliğat materiallarını pulsuz dərc etdiriblər. Bundan başqa iddialılar Dairə Seçki Komissiyalarının ərazilərində əvvəlcədən müəyyənləşdirilmiş yerlərdə çıxışlarını həyata keçirib, müəyyənləşdirilmiş lövhələrdə reklam plakatlarını yerləşdiriblər. Bir sözlə, MSK sədri bildirdi ki, kampaniya dövründə bütün namizədlərə bərabər şəraitin yaradılması təmin edilib və kampaniya gedişində ciddi qanun pozuntusu aşkarlanmayıb. M.Pənahovun sözlərinə görə, bu seçkidə 5 min 359 məntəqədə 4 milyon 800 mindən artıq seçici müəyyənləşib. Məntəqələrdən 33-ü ölkə hüdudlarından kənardadır. Aşkarlığın və şəffaflığın təmin edilməsi baxımından bütün ölkə ərazisi əhatə olunmaqla 500 məntəqədə "web-kameralar"ın quraşdırıldığını vurğulayan MSK sədri bildirib ki, seçki qutuları daim kameraların nəzarətində olacaq və arzulayan hər bir şəxs MSK-nın saytından istifadə etməklə seçki prosesini canlı izləyə biləcək. M.Pənahov seçkini 34 xarici KİV-in nümayəndəsinin müşahidə edəcəyini söyləyib. Bunların arasında FRERL-in (Azadlıq radiosu), TRT, Milli Rumıniya, "Rustavi-2", "CTB", NTV, "Mir" televiziyaları, "Anadolu", "Frans-Press", İTAR-TASS, "Associated Press" informasiya agentlikləri, Rossiyskaya qazeta, "EL Pais" kimi nüfuzlu qəzetlərin jurnalistləri də vardır. Onun sözlərinə görə, MSK-dan qeydiyyatdan keçən yerli müşahidəçilərin sayı 2 min 672 nəfərdir. Dairə Seçki Komissiyalarında isə bu göstərici 43 min 100-dür. Onların 21 min 520-si siyasi partiyalar tərəfindən, 15 min 777-si Qeyri-Hökumət Təşkilatları tərəfindən irəli sürülüb. M.Pənahovun sözlərinə görə, müşahidəçilərin 5 min 802 nəfəri seçkini izləmək üçün özləri təşəbbüs göstəriblər. Beləliklə, prezident seçkisini izləyəcək yerli müşahidəçilərin ümumi sayı təxminən 47 minə yaxındır. Beynəlxalq müşahidəçilərə gəlincə, MSK sədri bildirib ki, 1.258 beynəlxalq müşahidəçi akkreditasiyadan keçib. Onun sözlərinə görə, prosesi ATƏT, MDB, AŞPA, Aİ, GUAM, bir çox ölkələrin parlamentariləri və MSK nümayəndələri, eləcə də Azərbaycandakı səfirliklərin əməkdaşları izləyəcəklər. Ümumilikdə isə 59 ölkənin təmsilçisi həmin gün Azərbaycanda seçki prosesini müşahidə edəcəklər. M.Pənahov onu da əlavə edib ki, səsvermə günü vətəndaşlar məntəqələrdən qeydiyyatdan çıxma vərəqi götürməklə istənilən məntəqədə səs verə biləcəklər. Bundan başqa hansısa səbəbdən adı seçici siyahısına düşməyən seçici şəxsiyyət vəsiqəsini özü ilə götürməklə həmin məntəqədə öz konstitusion hüququnu gerçəkləşdirə bilər. MSK sədri seçki günü səsvermənin gedişi ilə bağlı gün ərzində məntəqələrdən mərkəzə 5 dəfə məlumat ötürüləcəyini söylədi. Onun sözlərinə görə, saat 19:00-da seçkilər yekunlaşdıqdan sonra məntəqə komissiyasının üzvlərinin içəridə olan vətəndaşları zorla çölə çıxarmaq hüquqları yoxdur. Sadəcə olaraq məntəqələrə giriş qadağan edilir, içəridəkilər də səs verib çıxdıqdan sonra qutular açılır. M.Pənahov qeyd edib ki, bundan sonrakı proses fasiləsiz aparılır. Əvvəlcə daşınan, sonra daşınmaz qutular açılır, bülletenlər hesablanır və məlumatlar ötürülür. Səslərin sayılması zamanı müşahidəçilərə sərbəst müşahidə aparmaq üçün imkan yaradılmalıdır. O, seçkidə 4 təşkilat tərəfindən "exit-poll" keçiriləcəyini də diqqətə çatdırıb. Firdovsi sherg