Türk qırıcıları PKK-ya 31 zərbə endirib Türkiyə Silahlı Qüvvələri Şimali İraqda terrorçulara qarşı quru əməliyyatlarına hazırlaşır Son iki gün ərzində Türkiyə Silahlı Qüvvələrinin qırıcı təyyarələri və türk artilleriyası İraqın şimalındakı Hakurk bölgəsində terrorçu PKK hədəflərinə atəşi davam etdirib. TSQ Baş Qərargahının yaydığı məlumatda göstərilir ki, oktyabrın 4-də Həkkari bölgəsinin Aktütün Jandarma sərhəd məntəqəsindəki Bayraqtəpə məntəqəsinə terror hücumundan sonra türk qırıcıları yeddi dəfə PKK/KONGRA-GEL terror təşkilatının mövqelərinə raket zərbələri endirib. Göytürk Oktyabrın 11-də terrorçuların 31 mövqeyi dəqiqliklə vurulub, təyyarələr sağ-salamat bazalarına qayıdıblar. Oktyabrın 12-də İraqın şimalındakı Zap bölgəsindəki PKK mövqeləri atəşə tutulub, qırıcıların zərbə endirdiyi terrorçu qrupda PKK/KONGRA-GEL-in bəzi rəhbərlərinin olduğu bildirilir. Baş Qərargah əməliyyat zamanı mülki şəxslərin heç bir ziyan çəkmədiyini vurğulayıb. Hazırda ölkə daxilində də PKK terrorçularının zərərsizləşdirilməsi, Aktütün hücumunda iştirak edən terrorçuların təqibi istiqamətində əməliyyatlar genişləndirilib. Türkiyə hökuməti terror təşkilatının maliyyə dayaqlarını məhv etmək üçün də əməliyyatları davam etdirir. Oktyabrın 12-də İstanbulda narkotika qaçaqmalçılığıyla məşğul olmaqla terror təşkilatına maliyyə yardımı göstərən S.A. adlı bir nəfər həbs olunub. İstanbul Narkotik Cinayətlərlə Mübarizə Şöbəsi 13 ildir ki, aranan bu şəxsi Baxçalıevlərdəki bir ünvanda yaxalayıb. Rəsmi məlumatlara görə, 1995-ci ildə polis xaricə göndərilmək üçün hazırlanan 245 kq heroin polisin əlinə keçsə də, terrorçu əməliyyatdan bir qədər əvvəl qaçıb. Bir neçə gün əvvəl Türkiyə Böyük Millət Məclisinin Silahlı Qüvvələrə İraqın şimalında əməliyyat keçirməyə imkan verən qərarnamənin müddətini daha bir uzatması isə kürd yönətimini həyəcanlandırıb. Qeyd edək ki, bu günlərdə çıxışlarının birində prezident Abdulla Gül ölkədə PKK terrorunun artmasının əsas səbəbi kimi Türkiyənin Avropaya alternativ enerji xəttinin keçdiyi bir ölkə olması ilə əlaqələndirib. Rusiyanın Gürcüstana təcavüzü, PKK-nın enerji kəmərlərini hədəfə alan terror aksiyaları Avropanı rəsmi Ankaranın terrorla mübarizəsinə daha anlamlı yanaşmağa məcbur edir. Hətta bir sıra Avropa rəsmiləri PKK-nın Aktütün terrorunun təkcə Türkiyə deyil, bütövlükdə Avropa Birliyi əleyhinə yönəldiyini bəyanlayıblar. Bir sıra ekspertlər isə TSQ-nin İraqın şimalındakı bu dəfə həyata keçirəcəyi quru əməliyyatının keçən ildəki kimi beynəlxalq aləmdə, xüsusilə, Avropada hay-küylə qarşılanmayacağını vurğulayırlar. Bu ərəfədə KYB-nin yayım orqanı olan "Kurdistani Nwe" qəzetinə məqalə yazan, təşkilatın Türkiyə təmsilçisi Behroz Galali prezident Abdulla Gülün oktyabr ayında Bağdada gedəcəyini, şiələrin müqəddəs şəhərləri sayılan Nəcəf və kürdlərin yönətim mərkəzi sayılan Ərbilə də gələcəyini açıqlayıb. Kürd yönətiminin Türkiyə ilə yaxşı əlaqələr qurmaq məqsədilə Ərbil Beynəlxalq Hava Limanının açılması üçün prezident Abdulla Gülə təklif təqdim etdiyini, onun səfərin gözlədiklərini açıqlayıb. Cümhurbaşqanının başdanışmanı Əhməd Sevər də "dəqiq tarix yoxdur, amma Abdulla Gül Bağdada gedəcək"-deyə açıqlama verib. Onun sözlərinə görə, Ərbilə səfərin mümkünlüyü qiymətləndirilir. "Milliyyət" Kürdüstan Demokrat Partiyasındakı mənbələrə əsaslanaraq Aktütün basqını günü Ankarada olan KDP-nin xarici əlaqələr üzrə məsul şəxsi Səfin Dizainin Türkiyə XİN rəsmilərilə danışıqlar apardığını açıqlayıb. Səfin Dizai PKK-nın varlığından narahat olduğunu söyləyib. Nəticədə Türkiyə XİN Şimali İraqdakı kürd hökumətilə danışıqlar aparmaq üçün Ərbilə heyət göndərməyə qərar verib. Türkiyənin İraq üzrə xüsusi təmsilçisi Murad Özçelik və baş nazirliyin başdanışmanı Əhməd Davudoğlu Hecirvan Bərzani ilə PKK məsələsini müzakirə edəcəklər. ABŞ-da prezidentlik yarışını Demokratların qazanması durumunda Türkiyənin təzyiqləri gücləndirəcəyindən əndişələnən kürd yönətimi Ankaraya quru əməliyyatları da daxil olmaqla hər cür dəstək verəcəyi mesajını Xarici İşlər Nazirliyinə çatdırıb. Türkiyə rəsmiləri ilə görüşdən sona kürd yönətiminin PKK-nı "terror təşkilatı" elan etməsi gözlənilir. Kürdüstan Yurdsevərlər Birliyinin Türkiyə təmsilçisi Bahroz Galali İraqın şimalındakı kürd hökumətinin baş naziri Hecirvan Bərzaninin rəsmi dəvətlə yaxın iki gün ərzində Ankaraya gələcəyini, Türkiyənin rəsmi dairlərində görüşlər keçirəcəyini açıqlayıb. Bu ərəfədə isə Türkiyədən gedən bir heyətin Həcirvan Bərzani ilə PKK problemini müzakirə edəcəyi məlum olub. Həmişə terror təşkilatı PKK-ya dəstək verməkdə günahlandırılan Şimali İraqdakı kürd yönətiminin "Hewler" qəzeti PKK-nı tənqid edib. Bölgəsəl kürd yönətiminin başqanı Məsud Bərzaniyə bağlı "Hewler" qəzetində yayımlanan məqalədə "PKK Şimali İraqdan baza kimi istifadə edərək kürdlərin taleyi ilə oynayır"-deyə qeyd olunub. Qəzetin rəhbəri Rebvar Kərim Vəlinin "PKK kimə xidmət edir?" başlıqlı yazısında Aktütün hücumuna, Türkiyə Silahlı Qüvvələrinə Şimali İraqda əməliyyat aparmaq yetkisi verən TBMM qərarnaməsinə toxunulur. PKK-nın terror aksiyalarının İraqın şimalındakı kürd yönətimini çətin vəziyyətdə qoyduğu, xalqa böyük zərər verdiyi bildirilir: "PKK-nın gerçəkləşdirdiyi son Aktütün hücumu keçən il düzənlədiyi, qərarnamənin qəbuluna yol açan aksiyalarla eynidir. PKK keçən il də Beytüşşebapda, daha sonra isə Çukurcada türk ordusuna hücum edib, bir çox əsgər öldürüb, bəzi əsgərləri əsir alıb. PKK-nın keçən il gerçəkləşdirdiyi hücumlar bölgədə yaşayan xalqa çətinliklər və problemlər yaratmaqdan başqa bir şeyə yaramadı. Aralarında elektrik istehsalı da olan bir çox önəmli layihələr PKK-nın aksiyaları səbəbindən 6 ay dayandırıldı. Kürdlərin taleyini yaxından ilgiləndirən Kərkük referendumu böyük bir yara aldı". Kərim Vəlinin sözlərinə görə, "PKK ABŞ-dan uyğunsuz bir tələbdə bulunaraq kürdlərlə Türkiyə arasında bir seçim etməsini istədi": "PKK-nın bu bölgəni Türkiyə əleyhinə hücumları üçün bir baza olaraq yararlanmağa, kürdlərin taleyi ilə oynamağa əsla və əsla haqqı yoxdur. PKK bugünki halıyla bu bölgədə olduğu müddətdə gələcək xəyallarımızın gercəkləşməsi mümkün deyil". Qeyd edək ki, "xəyallarını" gerçəkləşdirmək üçün PKK terroruna dəstək verənlərin şirin dilinə və yazıq görkəminə inanmaq yolverilməzdir... XALQ CƏBHƏSİ