MTN İrandan narkotik gətirən dəstə üzvlərini həbs edib Milli Təhlükəsizlik Nazirliyinin keçirdiyi əməliyyat tədbirləri nəticəsində İrandan Azərbaycana qaçaqmalçılıq yolu ilə narkotiklərin daşınmasının qarşısı alınıb. 40 kiloqrama yaxın narkotik vasitə olan həşiş aşkarlanaraq götürülüb. MTN ictimai əlaqələr mərkəzindən Lent.az-a verilən məlumata görə, Astara rayon sakinləri – Telman İmanov, İntizar Həmdəmov, Lənkəran rayonu Liman şəhər sakini Adil Yusubov, habelə hazırda şəxsiyyətləri istintaqla araşdırılan İranvətəndaşları və qeyriləri qabaqcadan əlbir olaraq satış məqsədilə külli miqdarda narkotik vasitəni qaçaqmalçılıq yolu ilə gömrük sərhədindən gömrük nəzarətindən gizli yolla İrandan Azərbaycan ərazisinə gətiriblər. Məlum olub ki, adları çəkilən şəxslər arasında əvvəlcədən əldə olunmuş razılığa əsasən, 2008-ci il oktyabrın 9-da həmin İran vətəndaşları qaçaqmalçılıq yolu ilə gətirdikləri narkotikləri İntizar Həmdəmova təhvil verib və o, bu narkotik vasitələri Astara şəhərinin yaxınlığındakı Maşxan kəndində gizlədib. Bundan sonra, İntizar Həmdəmov Astara şəhərində Telman İmanovla görüşüb, onun idarə etdiyi «Mersedes-Benz» markalı avtomobillə Maşxan kəndinə gələrək gizlətdiyi narkotikləri avtomobilə qoyub oradan uzaqlaşıb. Telman İmanov öz növbəsində həmin narkotikləri Lənkəran şəhərində Liman şəhər sakini Adil Yusubova satıb və bunun müqabilində sonuncudan təxminən 42 min ABŞ dolları məbləğində pul alıb. Telman İmanov Adil Yusubovdan aldığı 42 min dolları Astara rayonunun ərazisində İntizar Həmdəmova çatdırıb. İntizar Həmdəmov həmin puldan 37 minini özünə götürüb, 5 min dollarını isə Telman İmanova verib. 2008-ci il oktyabrın 10-da MTN tərəfindən keçirilən əməliyyat tədbirləri nəticəsində Adil Yusubov saxlanılıb, onun avtomobilinin yük yerinə baxış zamanı 40 kiloqrama yaxın narkotik vasitə olan həşiş aşkarlanaraq götürülüb. Davam etdirilən əməliyyat tədbirləri ilə Astara rayonunun ərazisində cinayətkar qrupun digər üzvləri - Telman İmanov, daha sonra İntizar Həmdəmov saxlanılıblar. Telman İmanovun üzərindən 5 min, İntizar Həmdəmovun idarə etdiyi «UAZ» markalı avtomobilə baxış zamanı isə 37 min 100 ABŞ dolları aşkarlanıb. Faktla bağlı MTN İstintaq Baş İdarəsində Azərbaycan Respublikası Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən narkotik vasitələrin qaçaqmalçılığı), 234.4.1 və 234.4.3-cü (qabaqcadan əlbir olan bir qrup şəxs tərəfindən satış məqsədi ilə qanunsuz olaraq külli miqdarda narkotik vasitələri əldə etmə, saxlama, daşıma, göndərmə və satma) maddələri ilə cinayət işi başlanılıb. Adları çəkilən şəxslər təqsirləndirilən şəxs qismində cəlb olunaraq, məhkəmənin qərarı ilə barələrində həbs qətimkan tədbiri seçilib. Cinayət işi üzrə bütün halların araşdırılması, bu hüquqazidd əməllərin digər iştirakçılarının müəyyənləşdirilməsi üçün zəruri istintaq hərəkətləri və əməliyyat-axtarış tədbirləri davam etdirilir. LENT.AZ