Brent Skovkroft: "Türkiyə Gürcüstan, Azərbaycan və hətta Ermənistan kimi ölkələrdə təhlükəsizliyin qorunmasında strateji rol oynaya bilər" Türkiyə-Amerika Şurasının başqanı Brent Skovkroft ABŞ-dakı prezident seçkilərini kimin qələ çalmasından asılı olmayaraq iki ölkə münasibətlərinə bunun güclü təsiri olmayacağı qənaətindədir. Onun sözlərinə görə, yeni prezident Türkiyənin ABŞ üçün əhəmiyyətinin fərqində olacaq. Ankaradakı görüşlərindən əvvəl mətbuat konfransı keçirən Brent Skovkroft öncə Aktütün olayında həyatını itirənlərin ailələrinə və türk xalqına başsağlığı verib və PKK-nın Türkiyəylə ABŞ-ın ortaq düşməni olduğunu bəyanlayıb. O, ABŞ-ın kəşfiyyatla bağlı verdiyi dəstəkdən Türkiyə Silahlı Qüvvələrinin məmnun qaldığını bildirib. Brent Skovkroft baş nazir Rəcəb Tayyib Ərdoğanın Vaşinqtona son səfərinin ardından bu iş birliyinin daha yaxşı səviyyəyə gəldiyini deyib. Rəvan Məmmədli O, ABŞ ordusunun Şimali İraqda PKK terroruna qarşı silahlı mübarizə aparmamasını da əsaslandırmağa çalışıb: "ABŞ İraqda çətin durumdadır. Hərbi birliklərimizin çoxu İraqın orta və güney kəsimlərində yerləşdirilib. Bu səbəbdən Şimali İraqdakı terrorçularla mübarizə aparmaq çətinləşib". O, Türkiyənin Qafqazdakı önəminə də toxunub: "Türkiyə Gürcüstan, Azərbaycan və hətta Ermənistan kimi ölkələrdə təhlükəsizliyin qorunmasında strateji bir rol oynaya bilər. Həmin çərçivədə Türkiyə və Ermənistan arasında başlayan danışıqlara ümid bəsləyirəm və bu, enerji qaynaqlarının qorunması baxımından kritik önəm daşıyır". Nəzərə çatdıraq ki, Brent Skovkroft prezident Abdulla Gül, baş nazir Rəcəb Tayyib Ərdoğan, müdafiə naziri Vecdi Könül, baş qərargah rəisi, İlkər Başbuğ, enerji və təbii qaynaqlar naziri Hilmi Gülərlə görüşüb. Türkiyə-Amerika Şurasının başqanı istefada olan general Brent Skovkroft ABŞ-ın sabiq prezidentləri Gerald Ford və Corc Buşun təhlükəsizlik məsələləri üzrə sözçüsü olub. ABŞ Xarici Əlaqələr Komitəsinin üzvü, konqresmen Gregory W. Meeks isə demokrat Barak Obamanın prezident seçiləcəyi halda Türkiyə-Amerika münasibətlərinin inkişaf edəcəyinə inandığını bildirib. Onun sözlərinə görə, Türkiyə bölgəsində güclü və demokratik bir ölkədir. İsrail-Suriya danışıqlarında Türkiyənin oynadığın rolu əhəmiyyətli sayan Gregory W. Meeks BMT Təhlükəsizlik Şurasına üzvlük məsələsində Ankaraya dəstək verdiklərini dilə gətirib: "Bölgə haqqında ABŞ yönətiminin Türkiyədən öyrənəcəyi çox şey var". O, "erməni soyqırımı"ylə bağlı sənədə qarşı çıxacağını da bildirib. Jurnalistlər demokrat Barak Obamanın vitse-prezidentliyə namizəd kimi irəli sürdüyü Joe Bidenin "soyqırım" layihəsini xatırlatmasına da maraqlı cavab verib: "Prezident olanda məsuliyyətiniz daha böyük olur, əvvəlki kimi davranmırsınız. Ermənilərin, yaxud türklərin çox olduğu bölgədən millət vəkilisinizsə, seçicilərinizə görə davranış sərgiləyirsiniz. Prezident olanda işlər dəyişir. Barak Obama bu məsələdə hər iki tərəfi dinləyən bir yolu əsas götürəcək". Dünən xarici işlər naziri Əli Babacan da BMT Təhlükəsizlik Şurasına üzvlük seçimləriylə bağlı Amerikaya gedib. Səfərindən əvvəl nazir deyib ki, Türkiyənin BMT Təhlükəsizlik Şurasının müvəqqəti üzvü seçilməyə haqqı var. Məlumat üçün deyək ki, Türkiyə BMT Təhlükəsizlik Şurasına üzv seçkisində Avstiriya və İslandiya ilə rəqabət aparacaq. Üç namizəddən ikisi BMT Təhlükəsizlik Şurasının müvəqqəti üzvü olacaq. Türkiyəyə 192 ölkədən 128-nin səsini alması lazımdır. Xatırladaq ki, 1961-ci ildən bu yana Türkiyə BMT Təhlükəsizlik Şurasına üzv seçilə bilməyib.