Belçikada etnik qarşıdurma mühacirləri çaşbaş qoyub Belçikada Flanders və Valloniya arasında gərginlik Belçika siyasətçiləri hökuməti 16 aydır ki, iflic halına salmış böhrana son qoya bilmirlər. Münaqişənin kökündə hollandilli və fransızdilli əhali arasındakı gərginlik durur. Bu arada, ölkədə yaşayan çoxsaylı mühacir ordusu kimin tərəfini tutmaq barədə çətin qərarlar verməli olur. Linqvistik müharibə barədə müxbirimiz Henri Astye xəbər verir: Nataşa Biryukova Lyejə Moskvadan, 1995-ci ildə gəlib. Lakin yeni vətəninin əsl Belçika deyil, fransızdilli Valloniya olması onu çox təəccübləndirmişdi. "Mən sabiq SSRİ-dən idim. Orada da etnik gərginliklər var idi. Amma burada, Valloniyada, bizdən bir neçə kilometr aralı olan flamand qonşularımızla heç bir əlaqəmiz yoxdur." Xanım Biryukova kimi bir çox mühacir Belçikaya gələndə, istər-istəməz səngərlərin müxtəlif tərəfində qərarlaşmalı olurlar. Fələstinli Həmdən əl-Dəmiri deyir: "Xaricilər Belçika tarixini məktəblərdə öyrənməyiblər. Onlar Valloniya və ya Flandersin nə olduğunu bilmirlər. Belçika elə Belçikadır." "Adamlar belə sivilizasiyalı bir ölkədə belçikalıların dil və başqa məsələlərə görə belə düşmənçiliyinə təəccüb edirlər." Flandersdə, mühacirlər ittifaqının üzvü olan Naima Çarkayi deyir: "Biz fransız və hollandillilər arasındakı mübahisədə heç kimin tərəfini tutmaq istəmirik. Lakin bəzən bu mümkün olmur. Ortada qalmışıq." Gent şəhərinin mer müavini Fatma Pehlevan öz seçki kampaniyası ərzində fransız, türk və ərəb dillərində nitqlər söyləyib. " Mənə fərqi yoxdur, adamlarla danışmaq üçün çin dilindən istifadə edərəm." Lakin bir çox bölgələrdə rəsmilərlə yalnız holland dilində danışmaq icazə verilir. Flandersin hər yerində işə girmək istərkən məhz bu dildən imtahan verməli olursan. Lakin sərt dil tələbləri heç də mühacirlərə qarşı yönəlməyib. Bunun kökləri Belçikanın bəlalı tarixinə gedir. Əvvəllər ölkəyə fransızdillilər nəzarət edirdilər. Məhz buna görə də Belçika imperiyasının Konqo kimi yerlərindən gələn mühacirlər holland deyil, fransız dilində danışırlar. Naima Çarkaoyi deyir ki, nəticədə sərt dil tələblərinin qurbanları məhz mühacirlər olurlar. Mənzil problemləri Bundan başqa Flandersdə dövlətdən mənzil kirayə götürmək istəyənlər də ya holland dilində danışdıqlarını sübut etməli ya da kursa yazılmalıdırlar. 17 yaşlı Tarik Poyraz deyir ki, onun valideynləri üçün yeni dil öyrənmək qeyri-mümkündür. Çünki onlar güc-bəla ilə fransız dilini öyrəniblər. Bunun nəticəsi olaraq, ailəsi Brüsseldən köçüb gedə bilmir. "Biz şimala, evlərin ucuz olduğu yerə köçmək istərdik, amma holland dilini bilmədiyimizdən bu qeyri-mümkündür." Fransız tərəfində isə.... Valloniyada isə əcnəbilərin inteqrasiyası daha yumşaqdır. Burada məcburi dil kursları yoxdur. Lakin elə bu da bəzi mühacirlər üçün problem yaradır. Jako de Merve, Cənubi Afrikadandır. 10 ildir ki, Belçikada yaşayır. O vətəndaşlıq almaq istəyir və yalnız holland və ingilis dillərində danışır. "Qanuna görə, onlar ya mənimlə holland dilində danışmalı, ya da məni həmin dildə danışan rəsmi ilə calaşdırmalıdırlar. Lakin bunu etmirlər." Bir iranlı tələbə deyir:"Onlar Valloniyanı Flandersdən ayırmalıdırlar. Flamandlar zəhmətkeş, öz torpaqlarını təmiz saxlayan adamlardır. Mən Valloniyada az olmuşam, amma özümü orada təhlükəsiz hiss etmirəm." 27 yaşlı Yakup Uzun həm Valloniya, həm Flandersdən yaşayıb. O deyir ki, Belçikada xaricilərin çoxu "iki müxtəlif dövlətdə yaşamaq istəməzdi. Amma əlacları yoxdur." "İnkişaf etmiş ölkələr digərlərinə demokratiyanın nümunəsi olmalıdırlar. Ələxüsus da, Avropanın paytaxtı sayılan Belçika."bbc