Xakasiyada sərxoş qəssab azərbaycanlı ailənin axırına çıxıb. 5 nəfər doğranıb, onların ikisi uşaqdır "Bu dəhşətdir! İndiyədək belə vəhşi hadisə baş verməmişdi. Onu ağıllı adam kimi tanıyırdıq. Sən demə, manyak ilə yanaşı yaşamışıq!" ... Rusiyanın Xakasiya Muxtar Respublikasının Şirinskoe rayonunda baş vermiş cinayət hadisəsi təcrübəli milisləri, müstəntiqləri, hətta sərtliyinə görə "Dəmir Samson" ləqəbi ilə tanınan respublika prokurorunu da şoka salıb. Son kəndində 5 nəfərdən ibarət aləni qətlə yetirən cinayətkar sonradan əməlinin izlərini itirmək üçün evə od vurub. Həmin vaxt ailənin sağ qalmış üzvləri, 1 və 4 yaşlı uşaqlar evdə idilər. Onlar indi reanimasiyadadır. Öldürülənlər isə azərbaycanlılardır. Hadisə yerinə gələn milis əməkdaşları tükürpədici mənzərə ilə qarşılaşıblar: evin içində beş meyid vardı ki, onların ikisi 10 və 12 yaşlı uşaqların cəsədləri idi. Qatil qurbanlarını balta ilə öldürmüşdü. "Günorta saatlarıydı. Yenicə nahara oturmuşduq ki, gördük Manafın evi yanır. Tez özümüzü çölə atıb yanğına qaçdıq. Evi söndürmək istəyirdik. Kimin əlinə nə keçdisə, su daşıyırdı. Birdən evin içindən, alovların arasından uşaq səsləri gəldi. Bərkdən ağlayırdılar, köməyə çağırırdılar. Sonra səsləri kəsildi, hərdən inilti gəlirdi. Sağ olsunlar Saşa və Dima - özlərini odun içinə atıb uşaqları çıxardılar. Yaman yanmışdılar. Qızlardan biri lap kiçikdi, heç bir yaşı olmazdı. O biri isə dörd yaşında. Təcili yardım maşınları gəldi, rayon mərkəzindəki xəstəxanaya apardılar", - hadisənin şahidi, qətlə yetirilən Salahovların qonşusu Yekaterina Qreçixina bildirdi. Şirinskoe rayon xəstəxanasından verilən məlumatda isə deyildi ki, hazırda reanimasiya bölməsində saxlanan iki qızcığazın vəziyyəti ağırdır. Bacılardan kiçiyinin vəziyyəti kritikdir. Xasiya DİN-nin mətbuat xidmətindən verilən məlumata görə, keçirilən operativ-əməliyyat və təhqiqat tədbirləri nəticəsində cinayəti törədən şəxs elə həmin gün tutulub. "O, Son kəndininin sallaqxanasında çalışan kənd sakini, 22 yaşlı qəssab A.Vitalyevdi. Hadisə ilə bağlı Rusiya Federasiyası Prokurorluğu yanında İstintaq Komitəsinin Xakasiya Respublikası üzrə istintaq idarəsi tərəfindən RF Cm-nin 105-ci maddəsinin 2-ci "a" hissəsi (iki və daha artıq şəxsin qətlə yetirilməsi) üzrə cinayət işi qaldırılıb, istintaq gedir. Şübhəli bilinən şəxsin cinayəti sübuta yetirilərsə, onu ömürlük azadlıqdan məhrumetmə cəzası gözləyir", - xidmətdən bildirdilər. Şirinskoe Rayon Daxili İşlər İdarəsindən isə verilən açıqlamada qətlə yetirilən azərbaycanlı ailənin ət ticarəti ilə məşğul olduğu söyləndi. Baş vermiş qətliamla bağlı "Ekspress" qəzetinin apardığı araşdırma zamanı 40 yaşlı M.Salahov, onun 26 yaşlı xanımı, 10 yaşlı qızı, habelə həmin məşum gündə ailədə qonaq olan Salah Salahov və onun 12 yaşlı oğlunun qətlinin təfərrüatları qismən aydınlaşdı. Qardaşının evinə qonaq gəlmiş Salah Salahov A.Vitalyevi tanımırdı, amma onun ötən ay kəndin mərkəzi küçəsində Manafla söhbətləşəndə görmüş, sonra da qardaşına demişdi: "Bu cavan oğlandan uzaq olsan, yaxşıdı. Heç yaxşı insana bənzəmir. Ehtiyatlı ol". Fəqət, Manaf qardaşının sözünə qulaq asmamışdı və həmin gün həyət qapısı döyüləndə durub getmiş, qapını açıb əlində balta gələn Vitalyevi içəri buraxmışdı. Əlibaltalı şəxsin içəri buraxılması ilk baxışdan qəribə təsir bağışlasa da, A.Vitalyevin sallaqxanada qəssab-fəhlə işlədiyini, M.Salahovun da ət ticarəti ilə məşğul olması belə etinasızlığa rəvac vermişdi. Həyətə girən kimi əlindəki balta ilə M.Salahovun sinəsinə vurub onu yıxan, sonra da boynuna iki zərbə endirən qatil səs-küyə evdəkilərin çıxdığını görərək irəli atılıb. O, əvvəlcə ev sahibinin 26 yaşlı xanımı baltalayıb, sonra 42 yaşlı Salah Salahovu başından vurub öldürüb. Bu zaman S.Salahovun 9 yaşlı oğlu dəhşətə gələrək bağırmağa başladığından, A.Vitalyev onun başını bədənindən ayırıb. Qatil M.Salahovun keçmiş işçisi idi. 4 ay əvvəl, iyun ayında Qurbanov oğurluq və əyyaşlığa görə işdən qovulmuşdu. Kənd sallaqxanasına işə düzələn 22 yaşlı gənc "murdar qafqazlı"dan intiqamını alacağını deyirdi. Kənd sakinlərinin sözlərinə görə, içib sərxoş olan kimi Vitalyev qışqırırmış: "O, mənim pulumu kəsib! Yç ay işlətdi, pulumu vermədi! Ona qan qusduracam, ailəsini qıracağam!" Rus kəndlərində yerdə sürünədək içənlərin belə hədə-qorxuları adi hal kimi qəbul edildiyindən, Sondakılar da 22 yaşlı qəssabın sözlərinə fikir verməyiblər. A.Vitalyev əvvəllər məhkum olunubmuş. Xakasiya Respublikasının daxili işlər naziri İlya Olxovskinin dediyinə görə, Son kəndində baş vermiş qanlı faciə kimsəni laqeyd qoya bilməz: ""Heç bir günahı olmayan insanlar qətlə yetirilib, iki uşaq ölüm ayağındadır. Qatil yaxalanıb və qanun qarşısında cavab verəcək". Həsən AĞACAN express