"PKK-nın işğal olunmuş Azərbaycan ərazilərdə də məskunlaşması Qarabağ probleminin həllini aktuallaşdırır" Milliyyətçi Hərəkat Partiyası sədri Dövlət Baxçalının baş müşaviri Hidayət Vahaboğlu maraqlı açıqlama verib. O, hazırda Azərbaycanın işğal altında olan ərazilərində 150-200 nəfər PKK terrorçusunun olduğunu bildirib: "Qarabağda PKK terrorçularının olmasını tam dəqiqliyi ilə deyə bilərəm. Türkiyə Silahlı Qüvvələrinin hazırda Dağlıq Qarabağda əməliyyat keçirməsi mümkün deyil. Tural Amma əgər AKP hökuməti Ermənistanla danışıqlara başlayarsa, bu məsələni mütləq gündəmə gətirməlidir". Mütəxəssislərin fikrincə, PKK-nın Dağlıq Qarabağda məskunlaşmasıyla bağlı mövzuya Türkiyədə gündəmə gətirilməsi bir sıra siyasi amillərlə bağlıdır. Xatırladaq ki, xarici işlər nazirinin müavini Araz Əzimov da Azərbaycanın Dağlıq Qarabağ ərazisində PKK terrorçularına qarşı Türkiyə ilə birgə antiterror əməliyyatları aparmasını mümkün sayıb. "Atlas" Araşdırmalar Mərkəzinin rəhbəri Elxan Şahinoğlu Azərbaycanın Türkiyə ilə birgə işğal altındakı ərazilərimizdə PKK əleyhinə antiterror əməliyyatları aparılması təkliflərinin hələ uzun müddət gündəmdə olacağını söylədi: "Ötən aylarda PKK-nın işğal altındakı Dağlıq Qarabağı oylağa çevirməsilə əlaqədar Türkiyə və Azərbaycan mətbuatında da kifayət qədər yazılar getdi. Hətta bu məsələylə bağlı Azərbaycan Xarici İşlər Nazirliyi səviyyəsində də münasibət bildirdi. Amma sonradan İraqın şimalından qaçan PKK terrorçularının Azərbaycanın işğal olunmuş ərazilərində yerləşməsilə bağlı məlumatlar səngidi". Ekspertin sözlərinə görə, heç kimi təminat verə bilməz ki, PKK terrorçuları ermənilərin xeyir-duası ilə işğal altındakı Dağlıq Qarabağ və ətraf rayonlarda yerləşmirlər: "Dağlıq Qarabağ ərazilərinin nəzarətsiz bölgə olduğunu Avropa Birliyinin nümayəndələri də təsdiqləyiblər. Yəni Ermənistanın vasitəsilə, nəinki Şimali İraqdan, eləcə də Türkiyədən qaçan terrorçuların bu ərazilərə gətirilməsi, burada təlimlər keçməsi mümkün olan ssenaridir. İlk dəfə Azərbaycan ictimaiyyəti yüksək rəsmi şəxsin-Araz Əzimovun dilindən eşitdi ki, işğal olunmuş ərazilərdə PKK terrorçuları var və onlara qarşı tədbirlər görülməlidir. Bu proseslərin təhlükəli olmasından xəbər verir". Politoloqun sözlərinə görə, Rusiyanın Gürcüstana təcavüzündən sonra vəziyyət elə gərginləşib ki, PKK-nın dayaqlarının Azərbaycanın nəzarət etmədiyi ərazilərində yerləşməsinin qarşısını almaq üçün antiterror əməliyyatları keçirilməsi real görünmür: "Amma bu informasiyalar ciddi qəbul olunmalıdır və ən azı diplomatik səviyyədə tədbirlər görmək vacibdir". Elxan Şahinoğlu bu gün Türkiyədə PKK terrorçularının əsas bazalarından birinin Dağlıq Qarabağda olmasıyla bağlı məsələnin gündəmə gəlməsinin bir neçə əsas səbəbinin olduğunu söylədi. Türkiyə artıq PKK-nın kökünün tamamən kəsəcəyilə bağlı ciddi bəyanatlar verir və qardaş ölkədə baş vermiş son terror olayları hökuməti ciddi addım atmağa vadar edib: "Buna görə də artıq MHP-də də hökumətin təkcə Türkiyə daxilində deyil, Dağlıq Qarabağda da terrorçu PKK-nın olmasıyla bağlı bəyanatlar verilir. Hətta işğal altında olan ərazilərimizdəki terrorçuların sayı göstərilir. Son dövrlər Dağlıq Qarabağ probleminin həlliylə bağlı aktivliyin şahidiyik. Türkiyə ilə Rusiya arasında təmasların artmasının da bu məsələnin gündəmə gəlməsində rolu ola bilər. Kreml də Türkiyənin Qafqaz Sabitlik və Əməkdaşlıq Platformasına maraq göstərir. Belə bir məqamda Rusiya və Türkiyə arasında əməkdaşlığı Dağlıq Qarabağ probleminin həllinə yönəltmək çox vacibdir. Hər iki tərəf ciddi açıqlamalar verilir. İndi hadisələrin hansı məcrada cərəyan edəcəyini gözləməliyik. Türkiyənin Azərbaycana, Rusiyanın isə İrəvana təsir rıçaqları var. Bu böyük siyasi proseslərin fonunda PKK-nın Dağlıq Qarabağda məskunlaşması problemi yeni müstəvidə ortaya çıxmağa başlayır". Elxan Şahinoğlunun sözlərinə görə artıq Türkiyə tam şəkildə anlayır ki, PKK-nın işğal olunmuş Azərbaycan ərazilərdə də məskunlaşması Qarabağ probleminin həllini aktuallaşdırır. Yəni bu münaqişə həll olunmasa, nəzarətsiz bölgədən Türkiyəyə də ciddi zərbələr dəyə bilərk: "Əgər məsələ uzansa, Türkiyə BMT-də Ermənistanın PKK terrorçularına işğal etdiyi Azərbaycan ərazilərində sığınacaq verməsi məsələsini açıq mətnlə bəyanlaya bilər".