ABŞ Qarabağ məsələsində Bakıya dəstəyini ciddiləşdirir Akif Nağı: "ABŞ və Rusiyanı Qarabağ problemi o qədər də narahat etmir, amma başa düşürlər ki, Azərbaycanın rəğbətini qazanmaq üçün Qarabağla bağlı mövqe ortaya qoyulmalıdır" ATƏT-in Minsk qrupunun amerikalı həmsədri Metyu Brayza sensasiyalı bəyanat səsləndirib. O bildirib ki, ABŞ hesab edir ki, Azərbaycanın ərazi bütövlüyü Dağlıq Qarabağ münaqişəsinin nizamlanmasının əsas prinsipi olmalıdır: "Biz hesab edirik ki, Azərbaycanın ərazi bütövlüyü prinsipindən başlamalıyıq. Sonra isə danışıqları kompromis və çərçivə sazişinə çatdırmaq üçün digər prinsiplər əlavə olunmalıdır. Bu o deməkdir ki, biz hamımız hüquqi cəhətdən və beynəlxalq qanunlara görə Dağlıq Qarabağın Azərbaycanın tərkib hissəsi olduğunu qəbul etməliyik. Danışıqları razılaşma ilə yekunlaşdırmaq üçün Ermənistan da bununla razılaşmalıdır. Ermənistanın baxışının fərqli olduğu bizə məlumdur. Amma biz çox yaradıcı və konstruktiv yollardan istifadə edərək, ümumi dil tapmaqda Bavı və İrəvana kömək etməliyik". Ramiz Mikayıloğlu Məsələylə bağlı fikirlərini öyrənliyimiz Qarabağ Azadlıq Təşkilatının (QAT) sədri Akif Nağı deyir ki, əgər Metyu Brayza sonradan təkzib verməzsə, bu, kifayət qədər ciddi bəyanatdır. Çünki adətən amerikalı diplomat bir fikir söyləyib, sonra Azərbaycan, yaxud Ermənistanın təzyiqlərindən, reaksiyasından sonra fikirlərindən qaçır, guya sözlərinin təhrif olunduğunu bildirir: "Metyu Brayza son bəyanatından qaçmasa, bunu Vaşinqtonun rəsmi mövqeyi kimi təqdim etsə, bu, müsbət hadisədir. Çünki o, həmin müsahibəsində ABŞ-ın rəsmi mövqeyini açıqladığını dilə gətirir". Akif Nağı dedi ki, ötən illər ərzində QAT dəfələrlə həmsədrlərin baş vermiş hadisəylə bağlı həm dövlətlərinin, həm də Minsk qrupunun birgə mövqeyini bildirməyə çağırıb. Ancaq bunun qarşılığında belə arqument səsləndirilib ki, həmsədrlər vasitəçidirlər, mövqe ortaya qoya bilməzlər: "Amma biz həmişə deyirdik ki, əgər həmsədrlər tərəfləri bir-birinə yaxınlaşdırmağa çalışırlarsa, baş vermiş hadisənin mahiyyətilə bağlı açıqlama verməli, öz mövqelərini bildirməlidirlər. Biz hətta bir neçə dəfə hətta Bakıda həmsədrlər olarkən onlara bizim nümayəndələrimiz konkret suallar ünvanlayıblar. Soruşulmuşdu ki, siz Azərbaycanın ərazi bütövlüyünü tanıyırsınızmı, danışıqlar Azərbaycanın ərazi bütövlüyü çərçivəsində, yoxsa fərqli müstəvidə aparılır. Hər dəfə həmsədrlər bu sualdan qaçırdılar. Ona görə də bu gün Metyu Brayzanın belə mövqe açıqlaması da təsdiqləyir ki, Dağlıq Qarabağ münaqişəsinin nizamlanması üçün ilk növbədə vasitəçilər öz mövqelərini açıq-aydın bildirməlidirlər. Ona görə də Metyu Brayzanın söylədikləri müsbət bir hadisə kimi qeyd olunmalıdır. Azərbaycan hakimiyyəti çalışmalıdır ki, ABŞ bu mövqedən geri çəkilməsin və bu, bütövlükdə həmsədrlərin mövqeyi olsun, danışıqlar bu müstəvidə davam etdirilsin". Akif Nağı dedi ki, bu vaxta qədər danışıqların prespektivinə ona görə inam olmayıb və hərb yolu təklif olunub ki, danışıqlar yanlış prinsiplər əsasında aparılıb. Azərbaycana qarşı törədilmiş işğal faktı və ərazi bütövlüyünün bərpası yox, Dağlıq Qarabağdakı rejimə hansısa statusun verilməsi əsas müzakirə mövzusu olub. Onun sözlərinə görə, hazırda həmsədrlər obyektiv mövqeyə qayıdırlar. Yəni bildirilir ki, birinci növbədə Azərbaycanın ərazi bütövlyü prinsipi qəbul olunmalıdır: "Biz gözləyirik ki, növbəti addım kimi Azərbaycana qarşı işğal faktının törədilməsi, onun nəticələrinin aradan qaldırılması istiqamətində danışıqlar davam etdirilsin. Ancaq ABŞ-ın mövqeyini ifadə edən Metyu Brayzanın söylədikləri rəsmi Bakını sakitləşdirməməlidir". QAT sədri xatırlatdı ki, regionda vəziyyət gərgindir, Azərbaycandakı maraqlar uğrunda ABŞ-la Rusiya arasında gərgin mübarizə gedir. Vaşinqton və Moskva Bakını öz tərəfinə çəkmək istəyir. Təbii ki, burada əsas məsələ enerji daşıyıcılarıdır, ABŞ və Rusiyanı Qarabağ problemi o qədər də narahat etmir. Amma başa düşürlər ki, Azərbaycanın rəğbətini qazanmaq üçün Qarabağla bağlı mövqe ortaya qoyulmalıdır. Ona görə də bu mübarizə gedir: "Ona görə də ABŞ və Rusiya imkan çərçivəsində Azərbaycanın ədalətli mövqeyini müdafiə etməyə çalışırlar. Bu, müvəqqəti, kampaniya xarakteri daşımayacaqsa, yaxşıdır. Amma mən ehtiyatlanıram ki, bu, kampaniya xarakteri daşısın. Yəni Azərbaycanın ABŞ-a meyllənməsini gücləndirməyə çalışırlar. Hesab edirəm ki, bu, səmimi və və ardıcıl davam etdiriləcək mövqe olmayacaq. Hər halda yaşayarıq, görərik. Çünki Metyu Brayzanın müsahibəsinin özündə də qeyri-müəyyənlik var. Amerikalı diplomat ilkin şərt kimi deyir ki, Ermənistan Azərbaycanın ərazi bütövlüyünü hələlik tanısın. Deyir ki, ondan sonra danışıqların gedişində hansısa kompromislərə nail olmaq lazımdır. Sonda nə olacağını qeyri-müəyyən saxlayır. Amma birmənalı və qətiyyətli mövqe sərgilənməli və Azərbaycanın ərazi bütövlüyünün qorunmasıyla bağlı şübhəli mbvqe olmamalılıdır. Ermənistan bu mövqeyi qəbul edirsə, danışıqlar aparılmalı, əks təqdirdə, danışıqlar dayandırılmalıdır".