Lavrov Ermənistanı qarışdırıb Vdadimir Karapetyan: "Onun Laçının hansı statusundan danışdığı anlaşılmazdır" Rusiya xarici işlər naziri Sergey Lavrovun son açıqlaması Ermənistanda aləmi bir-birinə qatıb. Xatırladaq ki, Sergey Lavrov deyib ki, Qafqazdakı son böhrana qədər Dağlıq Qarabağ münaqişəsinin həllini ATƏT-in Minsk qrupunun həmsədrləri vasitəsilə Ermənistan və Azərbaycan prezidentlərinin birbaşa görüşləri çərçivəsində irəlilətmək üçün çox gözəl şans ortaya çıxıb. Praktiki cəhətdən Dağlıq Qarabağ münaqişəsinin tənzimlənməsinin bütün prinsip və mexanizmlərini özündə əks etdirən təfərrüatlı sənəd hazırlanıb. Sergey Lavrov cəmi iki-üç həll olunmamış məsələ qaldığını söyləyib. Bu məsələlərin Ermənistan və Azərbaycan prezidentlərinin növbəti görüşlərində razılaşdırılması nəzərdə tutulur: "Biz belə başa düşürük ki, bu görüşlər Azərbaycanda keçiriləcək prezident seçkilərindən sonra baş tutacaq. Hər şeydən əvvəl söhbət Laçın koridorundan gedir. Üç həmsədrdən biri kimi hiss edirik ki, münaqişənin həlli tam realdır". Ramiz Mikayıloğlu İlk reaksiya müxalif düşərgədən gəlib. Ermənistan Xarici İşlər Nazirliyinin keçmiş mətbuat katibi, Ermənistan Birləşmiş Konqresinin xarici əlaqələr üzrə sədri Vladimir Karapetyan sabiq xarici işlər naziri Vardan Oskanyanın bəyanatını xatırladıb: "Vardan Oskanyan demişdi ki, Laçın Qarabağla eyni statusa malik olmalıdır. Serj Sərkisyanın seçkiöncəsi proqramını xatırlatmaq istəyirəm. Həmin proqramda yazılırdı ki, Ermənistanla Qarabağ ümumi sərhədlərə malik olmalıdır. Bu kontekstdə Sergey Lavrovun Laçının hansı statusundan danışdığı anlaşılmazdır. Sergey Lavrovun sözləri müəyyən mənada Türkiyə prezidenti Abdulla Gülün bəyanatıyla üst-üstə düşür. Abdulla Gül bir neçə dəfə deyib ki, İrəvan bütün rayonları qaytarmağa hazırdır". Vladimir Karapetyan Rusiya xarici işlər nazirinin Ermənistan-Türkiyə münasibətlərinin gələcəyilə bağlı fikirlərinə də toxunub: "Sergey Lavrov təsdiqləyir ki, Türkiyə Ermənistanla yalnız Qarabağ probleminin həllindən sonra münasibət quracaq. Bütün bunlar təsdiqləyir ki, Abdulla Gülün İrəvana gəlməsiylə başlanan "bal ayı" yalnız Türkiyənin mövqeyinin möhkəmlənməsinə xidmət edir. Ankara bizimlə şərt dilində danışır, eyni zamanda özünü dünyaya sülhpərvər kimi nümayiş etdirir. Ermənistan isə bu prosesdə heç nə udmur". Ermənistan prezidenti Serj Sərkisyan Sergey Lavrovun bəyanatıyla bağlı hələ ki, susmağa üstünlük verir. İsveçrəli deputatları qəbul edən prezident Serj Sərkisyan deyib ki, İrəvanın məqsədi kompromislər əsasında Dağlıq Qarabağ münaqişəsinin həllinə nail olmaqdır. O, İrəvanın qeyd-şərtsiz Ankarayla münasibətlər qurmağa hazır olduğunu da bir daha bəyanlayıb. Bu arada Dağlıq Qarabağdakı oyuncaq rejimin rəhbəri Bako Saakyan da danışıb. O, Dağlıq Qarabağ ermənilərinin "müstəqilliyinin və təhlükəsizliyinin" alver mənbəyi olmadığını söyləyib. Qeyd edək ki, Abdulla Gülün setyabrın 6-da İrəvana futbol matçına baxmağa gəlməsiylə bağlı bir jest olaraq Ermənistan Futbol Federasiyası loqosundakı Ağrı dağının əksini çıxarmışdı. Qərb mətbuatı da "diplomatik əlaqələri belə olmayan iki ölkənin liderlərini milli futbol komandalarının oyunu birləşdirdi" şərhini vermişdi. Ancaq oktyabrın 8-də "futbol diplomatiyasıyla" başlayan bu ab-havanı Ermənistan baltalayıb. Ermənistan Futbol Federasiyasının prezidenti Ruben Hayrapetyan "Ayrapetnaya" qəzetinə verdiyi açıqlamada deyib ki, üzərində Ağrı dağı olan yeni bir loqodan istifadə etməyə başlayacaqlar. Türk mətbatı yazır ki, Ağrı dağının əksinin loqodan çıxarılması İrəvanın Türkiyəyə yönəlik jesti idi. Erməni müxalifəti isə bunu "Türkiyənin bir şərti" kimi dəyərləndirmişdi. Türkiyə ilə oynanan milli matçdan əvvəl Ağrı dağı olan loqonun dəyişdirilməsinin "xəta" olduğunu söyləyən Ruben Hayrapetyan vurğulayıb ki, Ağrı dağı ermənilərin milli simvoludur: "Loqonu dəyişdirərkən siyasi tərəfini heç nəzərə almamışdıq. Bu, ciddi etirazla qarşılandı. Bütün erməni xalqı və milli futbol komandasının azarkeşlərindən üzr istəyirəm. Yeni loqoda Ağrı dağı mütləq olacaq"...