Sergey Lavrov onların Azərbaycandakı seçkilərdən sonra çözülə biləcəyini deyir “Ermənistanla Azərbaycan Qarabağ münaqişəsinə dair hələ Gürcüstandakı münaqişədən əvvəl razılaşma əldə etməyə yaxın idi”. Bu haqda Rusiyanın xarici işlər naziri Sergey Lavrov “Rossiyskaya qazeta”ya müsahibəsində deyib. Onun sözlərinə görə, münaqişənin həllinin bütün əsas prinsiplərini özündə əks etdirən sənəd hazırlanıb və tərəflərə təqdim olunub. “Tərəflər arasında hazırda razılaşdırılmamış iki-üç məsələ qalır, onları Azərbaycan və Ermənistan prezidentlərinin növbəti görüşlərində həll etmək mümkündür. Bizim başa düşdüyümüzə görə, belə görüşlər Azərbaycandakı prezident seçkilərindən tezliklə sonra keçiriləcək”,- deyə S.Lavrov bildirib. Rusiya xarici işlər naziri əlavə edib ki, razılaşdırılmayan məsələlərdən biri Laçın dəhlizinin stausudur. Onun sözlərinə görə, bu, həll edilən məsələdir: “Vasitəçilərdən biri kimi bizdə belə hisslər var. Şübhəsiz ki, məsələni Azərbaycanla Ermənistan öz aralarında həll etməlidir, vasitəçilər isə prosesin həssaslığını başa düşür və uzlaşma nöqtələri tapmağa çalışır”. S.Lavrov Qarabağ münaqişəsi, Azərbaycan-Ermənistan münasibətləri, ABŞ-ın vitse-prezidenti Riçard Çeyninin Bakıya və Tiflisə səfərləri, Türkiyə prezidentinin İrəvana getməsi və ABŞ-da baş verən hadisələrə dair sualları da cavablandırıb. RF XİN başçısı müxbirin son vaxtlar Qafqazda mühüm hadisələrin baş verməsi, Moskvanın Azərbaycan, Türkiyə və Ermənistan xarici işlər nazirlərinin Nyu Yorkda, BMT Baş Assambleyasının sessiyası çərçivəsində ilk görüşünə, habelə R.Çeyninin Bakı və Tiflisə, Serj Sərkisyanın isə Gürcüstana səfərlərinə münasibətinə dair sualını belə cavablandırıb: “Mən deməzdim ki, bütün bunlar oradan-buradan baş verir. Əslində əlbəttə, bütün bu proseslərin hər bir iştirakçısının öz maraqları var. Ermənistanın mövqeyi bəllidir. Bu ölkə Qarabağ probleminə görə blokadadadır və bu səbəbdən də xarici əlaqələr baxımından çox əziyyət çəkir. Erməni xalqının məqsədi bu vəziyyətdən tezliklə yaxa qurtarmaqdır. Coğrafi və siyasi çıxış yolları isə çox deyil. Qarabağ problemi həll edilsə, Türkiyə İrəvana xarici əlaqələr qurmaqda yardım göstərəcək. Əlbəttə ki, İrəvanla Ankara arasında rəsmi, diplomatik münasibətlər bərpa olunandan sonra”. Rusiyalı nazirin mövqeyinə görə, Türkiyənin Qarabağ məsələsində fəallaşması ola bilsin ki, Qafqaz böhranının nəticəsi olaraq geosiyasi vəziyyətin qəfil gərginləşməsi ilə əlaqədardır. S.Lavrov deyib ki, Ermənistanın Gürcüstan böhranı zamanı yaşadığı problemlər, əsasən də erməni xalqı üçün həyati əhəmiyyət kəsb edən malların Gürcüstan ərazisi ilə daşınmasında yaranmış çətinliklər bu məsələnin təcili həllinin vacibliyindən xəbər verir. O, əlavə edib ki, Cənubi Osetiya və Abxaziyanın hər an hərbi müdaxilə təhlükəsi altında qalması və bunun da nəticəsində Ermənistan üçün həyati əhəmiyyət kəsb edən tranzit daşımalarındakı çətinliklər heç kimin marağında deyil. İrəvan üçün bu vəziyyətdən yaxa qurtarmaq əsasdır: “Elə buradan da rəsmi İrəvanın Qarabağ problemini tezliklə həll etməkdə maraqları doğur ki, bunun da nəticəsində Türkiyə ilə diplomatik əlaqələr qurmaqla Ermənistanın bu ölkənin ərazisi ilə ətraf mühitə çıxmaq və xarici əlaqələri qurmaq imkanı yaranacaq. Türkiyəyə gəlincə... bu, bir daha nümayiş etdirdi ki, Ankaranın siyasətinin əsas xətti Qafqazdakı və yaxın bölgələrdəki problemlərin həllində region ölkələrinin hər birinin hüququnun saxlanılmasına xidmət etmək və yardım göstərməkdir. Fikrimcə, türklər bu fürsətin unikallığını vaxtında başa düşdü. O fürsətin ki, onlara bölgədəki mövcudluğunu nümayiş etdirməyə bir daha imkan yaratdı. Türklər Qafqazın birbaşa qonşularıdır, eyni zamanda Qafqazın demək olar ki, bütün ölkələri ilə yaxşı əlaqədədirlər. ”Qafqazdakı sabitlik və əməkdaşlıq platforması" isə bir daha göstərdi ki, türk diplomatiyası çox təcrübəlidir. Məncə, Qafqazda münaqişəli vəziyyətin mövcudluğu nəticəsində bir tərəfdən, Ermənistanın öz vəziyyətinin çox zəif və həssas olduğunu yaxşı başa düşməsi, digər tərəfdən isə Türkiyənin elə bu vəziyyətin onun üçün əla fürsət olduğunu anlaması ATƏT-in Minsk Qrupunun təklifləri ilə yanaşı münaqişənin həlli üçün çox böyük zəmin yaradıb". Qeyd edək ki, Qarabağ danışıqlarında həll edilməmiş iki-üç məsələnin qaldığı haqda söhbətlər yeni deyil. Bu problemli məsələlərdən biri, S.Lavrovun da dediyi kimi, Laçın dəhlizinə nəzarət məsələsidir. Digər məsələ isə Dağlıq Qarabağın statusuna dair səsvermənin forması və vaxtıdır. Belə ki, bölgənin statusunun ətraf rayonların boşaldılmasından və qaçqınların qayıtmasından sonra orada yaşayan əhali arasında səsvermə yolu ilə müəyyən edilməsinə dair ilkin anlaşma var. Lakin həll edilməmiş bu iki-üç məsələ münaqişənin özəyini təşkil etdiyindən optimist olmaq üçün səbəb çox azdır. Siyasət şöbəsi musavat