Danışıqlarda sətiraltı reallıq Aydın Quliyev: "Türkiyənin Qarabağ münaqişəsinin həlliylə bağlı bəzi təkliflərlə çıxış etməsi əhəmiyyətli məsələdir" Xarici işlər naziri Elmar Məmmədyarov Nyu-Yorkda keçirdiyi görüşləri şərh edərkən həmsədrlərlə aparılan danışıqları "sadəcə, növbəti təmas" adlandırıb. XİN başçısı Gürcüstandakı hadisələrdən sonra bəzi yeni məqamların ortaya çıxdığını deyərək Türkiyənin bəzi təkliflərinin də artıq masa üstündə olduğunu vurğulayıb. Türkiyənin son təşəbbüslərilə ATƏT-in Minsk qrupunun fəaliyyəti arasında bir koordinasiyanın mövcud olub-olmaması ilə bağlı suala cavabında Elmar Məmmədyarov bildirib ki, Minsk qrupu həmsədrləri təkcə Dağlıq Qarabağ münaqişəsilə bağlı fəaliyyət göstərirlər: "Türkiyənin təşəbbüsünə isə daha çox geniş mənada baxmaq lazımdır. Yəni bu, regional platforma məsələsidir. Beləliklə, onlar məsələlərə daha geniş müstəvidə yanaşırlar". Tural Mütəxəssislərin fikrincə, XİN başçısının Türkiyənin təkliflərinin masa üstündə olmasını deməsi və bu ölkənin təşəbbüsünə həmsədrlərin tövsiyələrindən fərqli olaraq daha geniş baxılmasıyla bağlı fikirləri təsadüfi səslənməyib. Siyasi şərhçi Aydın Quliyev son bir neçə ayda Qafqaz regionunda maraqlı hadisələrin cərəyan etdiyini söyləyərək bu proseslərin bir hissəsinin də Azərbaycanla bağlı olduğunu bildirdi. Ekspert Azərbaycan- Ermənistan münaqişəsinin hələ də davam etməsinin fonunda Qafqazda sabitlik təşəbbüsünün də real nəticələrə gətirməyəcəyini vurğuladı: "Elmar Məmmədyarovun bu bəyanatlarının çoxlu sətiraltı məqamlara və mənaları var. Sözsüz ki, Türkiyənin Gürcüstanda baş verən olaylardan sonra yeni birliyin yaradılmasıyla əlaqədar ideyasından sonra Qarabağ münaqişəsinin həlliylə bağlı təşəbbüsü müəyyən mənada öz üzərinə götürməsi və hətta problemin həlliylə bağlı bəzi konkret təkliflərlə çıxış etməsi tamamilə yeni və əhəmiyyətli məsələdir. Sözün doğrusu, Ankaranın yeni təkliflərilə ATƏT-in Minsk qrupunun masa üzərində olan və bir neçə ildir ki, müzakirə olunan layihəsindəki prinsiplər arasında kardinal ziddiyyət olacağını da düşünmürəm. Məntiqlə də yanaşsaq, görərik ki, əgər Türkiyənin təklifləri Minsk qrupunun tövsiyələrilə kəskin ziddiyyət təşkil etsə, Ankaranın özü də buna razılaşmaz. Çünki belə təkliflərin uğur qazanmaq ehtimalı da zəif olar". Aydın Quliyevin sözlərinə görə, Türkiyənin Dağlıq Qarabağ münaqişəsilə bağlı vasitəçi kimi davranması həm də onu göstərir ki, ortaya qoyulan təkliflərdə yeniliklər ola bilər və münaqişənin həllində bir qədər konkret məqamların da üstündə dayanılması gözləniləndir: "Şübhə yoxdur ki, Türkiyənin təkliflərində Minsk qrupunun prinsipləri bir baza kimi götürülüb. Sadəcə olaraq, danışıqlara bəzi yeniliklər gətirilib ki, bu da münaqişənin həllində çox vacib rol oynaya biləcək Ermənistan üçün müəyyən şirnikləndirici təsirlərə malikdir. Bu təsirlər isə əsasən hazırda çox ağır vəziyyətdə olan İrəvanın blokadadan çıxması üçün yeganə imkan olan Türkiyə ilə sərhədlərin açılması və Ermənistanın Avropaya bağlanmasıyla əlaqədardı". Ekspertin sözlərinə görə, Ankaranın hazırkı fəallığının və təkliflərinin əsasında həm də yeni bir regional, dövlətlərarası əmkdaşlığın yaradılmasının formatı da dayanır: "Hətta mümkündür ki, bu yaradılması hələlik ehtimal edilən formata gələcəkdə Şimali Afrikanın və Orta Şərqin bəzi dövlətləri-Misir, Əlcəzair, Liviya və İraq də əlavə olunsun. Qısası, hələlik bu məsələlər ehtimal olsa da ortada bir reallıq var. Bu da Qafqaz ölkələri ətrafında ciddi siyasi proseslərin getməsidir. Bu gün Elmar Məmmədyarovun Türkiyənin Minsk qrupundan fərqli olaraq Qarabağ münaqişəsinə daha geniş müstəvidə yanaşdığın deməsinə isə ciddi yanaşılmalıdır". xalqcebhesi