“SƏRKİSYAN MƏMNUNİYYƏTLƏ AZƏRBAYCANA SƏFƏR EDƏRDİ” Vəfa Quluzadə: “Ola bilsin onun Gürcüstana apardığı təkliflər Moskvada hazırlanıb” Ermənistan prezidenti Serj Sərkisyan Türkiyə ilə münasibətlərin qurulması istiqamətində atdığı addımların ardınca digər qonşusu Gürcüstanla pozulmuş əlaqələrin bərpası üçün gözlənilməz gediş etdi. Rusiyanın Gürcüstana təcavüzündən sonra iki ölkə arasında xeyli soyuyan münasibətlər erməni prezidentin Tiflisə səfəri ilə yenidən istiləşməyə başlayıb. Xüsusilə də Sərkisyanın Gürcüstanın ərazi bütövlüyünü tanıdığını, separatçı qurumları tanımayacağı barədə bəyanatının əvəzində gürcü həmkarı Saakaşvili tərəfindən “Şöhrət” ordeni ilə təltif olunması maraqlı məsələdir. Ancaq Rusiyanın forpostu sayılan bir ölkənin başçısının Gürcüstana səfər etməsinə rəsmi Moskvanın reaksiyası daha çox maraq doğuran məqamdır. Hələlik Rusiyadan heç bir reaksiyanın gəlməməsi müxtəlif rəylərlə əsaslandırılır. Sabiq dövlət müşaviri, politoloq Vəfa Quluzadə Ermənistanın çətin vəziyyətdə olduğunu bildirdi: “Rusiya da ona heç bir kömək etmək iqtidarında deyil. Ona görə də erməni rəhbərliyi özü çıxış yolu axtarmaq məcburiyyətindədir. Çıxış yolu isə onun qonşularla dostluğundadır. Hələlik Rusiya Ermənistanın Azərbaycanla dostluğuna icazə vermir. Ermənistanda isə o qədər güc və cəsarət yoxdur ki, müsəqil siyasət yürütsün. Çünki bu, Rusiyanın yaratdığı dövlətdir və rəhbərliyində Kremlin təyin etdiyi siyasi zümrə dayanıb. Serj Sərkisyan məmnuniyyətlə Azərbaycana səfər edərək rəsmi Bakı ilə əlaqələr və Qarabağ məsələsinin həlli barədə danışıqlar aparardı. O, hələ ki, bunu edə bilmədiyi üçün Gürcüstana gedir”. Politoloqa görə, Gürcüstanın Rusiya ilə müharibə vəziyyətində olduğunu nəzərə alanda Sərkisyanın bu səfəri onun tərəfindən olduqca cəsarətli addım sayıla bilər: “Rusiya Sərkisyanı qınaya bilməz. Ermənistanın kommunikasiyası Gürcüstandan keçir və bu kommunikasiyaların məhvi Ermənistanın intiharı deməkdir. Rusiya narazı olsa da, sərt şəkildə bunu bəyan etməz”. V.Quluzadə Ermənistan və Gürcüstan arasında yaxınlaşmanı alqışladığını da vurğuladı: “Ermənistan nə qədər NATO ölkələri və ya NATO-ya can atan ölkələrlə əlaqələr qursa, udar. Düzdür, Rusiya xüsusi xidmət orqanları və siyasi elita Qafqaz məsələlərində olduqca təcrübəli və məkrlidir. Ermənistan Rusiyanın ssenarisi ilə oynaya bilər. Elə bir ssenari ola bilər ki, Ermənistan udsun, Gürcüstan, Türkiyə və Azərbaycan isə uduzsun”. Politoloqun sözlərinə görə, bu gün Ermənistan əsas müttəfiqlərinin onu yarı yolda buraxa biləcəyindən qorxduğu üçün alternativlər axtarışına çıxıb: “Mən əminəm ki, Sərkisyan Saakaşviliyə ”biz də Avropa və NATO-ya inteqrasiya etmək istəyərdik. Amma sərhədlərimizi Rusiya qoruyur və hətta ölkədə yeni bazalar tikmək istəyir. O mənada mənimlə Rusiyanın müttəfiqi kimi rəftar etmə" deyib". Ancaq V.Quluzadə Gürcüstanın Ermənistana dərhal “yaşıl işıq” yandıracağını güman etmir: “Ermənistan gərək öz niyyətlərini əməli ilə təsdiq etsin. Həmçinin bu ölkənin öz gələcəyi üçün mübarizə aparmağı bacarması lazımdır. Əgər Sərkisyan Ermənistandakı xalq hərəkatını əzsə, sözsüz ki, Gürcüstan ona kömək etməyəcək”. Ancaq ekspert erməni prezidentinin məkrli siyasət yürütdüyünü də istisna etmir: “Ola bilsin Sərkisyanın Saakaşviliyə apardığı bütün təkliflər Rusiya XİN-də hazırlanıb. Mümkündür ki, Rusiya ilə Gürcüstan arasında diplomatik münasibətlər olmadığına görə, bəlkə də Sərkisyan Moskvadan Tiflisə müəyyən mesajlar çatdırıb və əlaqələndirici statusunda çıxış edib”. Elşad PAŞASOY musavat