RUSİYANIN NÜVƏ BOMBARDMANÇILARI BRİTANİYAYA SOXULUB Ölkə qəzetləri bunu təhqir kimi qiymətləndirir Rusiyanın iki nüvə bombardmançısı ötən həftə Böyük Britaniyanın hava məkanına daxil olub. “The Daily Mail” qəzetinin yazdığına görə, nüvə raketləri daşıyan “Tu-160” strateji bombardmançısı radarlara yaxalanmadan Qull şəhərinin cəmi 20 kilometrliyinə yaxınlaşıb. Yalnız bundan sonra Britaniya Hərbi Hava Qüvvələrinin radarları Rusiya təyyarələrini aşkar ediblər, lakin məlum olub ki, onları geri qayıtmağa məcbur etmək üçün havaya qaldırmağa qırıcılar yoxdur. Belə ki, həmin vaxt döyüş növbəsində olan iki qırıcı təyyarə başqa vəzifə üçün göndərilibmiş. Qəzet yazır ki, Britaniya hərbi qüvvələrində bu hadisəni “təhqir” kimi qiymətləndirirlər. Bildirilir ki, “soyuq müharibə”nin başa çatmasından sonra ilk dəfədir ki, Britaniya bu cür təhlükəsizlik problemi ilə üzləşir. Xüsusən elə bir vaxtda ki, maliyyə çatışmazlıqları üzündən Britaniya Hərbi Hava Qüvvələrinin imkanları indi xeyli zəifləyib. Qəzetin yazdığına görə, Britaniya hərbçiləri narahatdır ki, ölkənin Rusiya təhlükəsindən müdafiə olunmaq üçün imkanları cüzidir. Hazırda iki ölkə arasında onsuz da gərgin olan münasibətlər Rusiyanın Gürcüstana müdaxiləsindən sonra daha da pisləşib. Britaniya Hərbi Hava Qüvvələrinin pilotlarından biri qəzetə açıqlamasında deyib ki, ruslar onları köməksiz durumda yaxalayıblar: “Bu hadisə göstərdi ki, onlar hara istəsələr uça bilərlər. Bu, əsl fəlakətdir”. Rusiyanın Hərbi Hava Qüvvələrindən isə səsdən iti uçan “Tu-160” bombardmançılarının Britaniya sahillərində uçduğunu təsdiqləyiblər. Bildirilir ki, bu, düşmən aviasiyasını önləmək üçün nəzərdə tutulan çoxtərəfli yanaşmalardan biridir. “Situasiya nə qədər tələb etsə, o, qədər təyyarə havaya qaldıra bilərik” - deyə Rusiya qüvvələrindəki mənbə bildirib. Britaniya mətbuatının yazdığına görə, Rusiyanın strateji bombardmançı aviasiyası ölkənin hava məkanı yaxınlığında ötən ilin yayında keçmiş “KQB” agenti Aleksandr Litvinenkonun qatilinin təhvil verilməməsi ilə bağlı London və Moskva arasında yaranmış gərginlikdən sonra müntəzəm olaraq uçuşlar keçirir. Bu dəfə isə strateji bombardmançılar ölkənin hava məkanına daxil olmağa cəsarət ediblər. Bu arada məlum olub ki, Rusiya strateji nüvə silahlarına da malik olmaqla xüsusi çevik qüvvələr formalaşdırmağa başlayıb. Müdafiə Nazirliyindən “İnterfaks”a verilən məlumata görə, silahlı qüvvələrin möhkəmləndirilməsi istiqamətində təxirəsalınmaz addımlardan biri kimi nəzərdə tutulan çevik qüvvələrə 300-ə yaxın müxtəlif tipli təyyarə, “İsgəndər” ballistik raketləri, hərbi hava qüvvələrinin desantı, dəniz piyadaları və digər elitar birliklər daxil olacaq. Çevik qüvvələr hər an istənilən döyüş tapşırığını yerinə yetirməyə hazır olmalıdır. Bildirilir ki, bu addım NATO-nun Rusiyanın qonşu ölkələrə mümkün hərbi müdaxiləsinə qarşı yaratmağı qərara aldığı çevik qüvvələrə cavabdır. Şimali Atlantik Alyansı Rusiyanın Gürcüstana müdaxiləsindən sonra digər qonşu ölkələr üçün də təhlükənin yaranmasını nəzərə alaraq belə qüvvələr formalaşdırmağı qərara alıb. F.MƏMMƏDOV musavat