“ERMƏNİSTAN TÜRKİYƏDƏN ASILI VƏZİYYƏTƏ DÜŞMƏK ÜZRƏDİR” Vəfa Quluzadə: “Sərkisyan Qərbə meylənsə, Rusiya onu da cəzalandırmağa çalışacaq” Ermənistan prezidenti Serj Sərkisyan BMT-dəki çıxışında növbəti dəfə konstruktiv görünməyə səy göstərib. Onun “Türkiyə prezidenti Abdullah Güllə bu yaxınlarda keçirilən görüş zamanı biz ölkələrimiz arasındakı problemləri gələcək nəsillərə qoymamaq barədə razılığa gəldik” deməsi də məhz bu istəyin təzahürüdür. S.Sərkisyan Ermənistanın BMT-dəki daimi nümayəndəliyində təşkil edilmiş qəbulda çıxış edərkən Ermənistan-Türkiyə münasibətlərində problemləri həll etməyin vaxtı çatıb. Türkiyənin Qarabağ məsələsinin həlli prosesinə qoşulmasına daim etiraz edən Ermənistan rəhbərliyinin bu dəfə fərqli prizmadan çıxış etməsi təbii ki, maraqlı məsələdir. Şərhçilər Ermənistan siyasətindəki bu qəfil dəyişmənin səbəbləri barədə müxtəlif rəylər söyləyir. Bəziləri bunu ermənilərin vəziyyətdən çıxış yolu, digərləri səhvlərdən nəticə çıxarmağın sonucu kimi qiymətləndirir. Ancaq Sərkisyanın “Bizim əsas məqsədimiz Azərbaycan tərəfini Dağlıq Qarabağ xalqının öz müqəddəratını müəyyən etmək hüququnun sarsılmaz olduğuna inandırmaqdır” deməsi Ermənistan rəhbərliyinin təcavüzkarlıq meyllərindən hələ ki, imtina etmədiyindən xəbər verir. Erməni prezidentin fikirlərini şərh edən politoloq Vəfa Quluzadə bildirir ki, bütün bu ümumi bəyanatlar artıq öz qiymətini itirib: “Vaxtaşırı Qarabağ probleminin həllində ”qızıl şans" ilinin yaranması kimi fikirlər eşidilir. Sərkisyandan əvvəl də buna oxşar fikirlər səslənib. Bu kimi sözlər mənim yadıma pişiyin boynuna zınqırov asmaq misalını salır. Ancaq zınqırovu kimin asacağı məsələsi açıq qalıb". Politoloq xüsusilə Rusiyanın mövqeyinin əvvəlkitək dəyişməməsini xüsusi vurğuladı: “Rusiya Azərbaycan və Ermənistanı boyunduruq altında saxlamaqda israrlıdır. Ona görə də problem həll olunmamış qalır. Qarabağ məsələsinin həlli regiondakı geostrateji vəziyyətin dəyişməsindən asılıdır. Hələlik regionun ən güclü dövləti Rusiyadır. Amma artıq Amerika regionun qapılarını təpiklə döyməkdədir. İndi görək bu qapıları aça biləcəkmi? Əgər açmağı bacarsa, o zaman Ermənistan da Avropanın və NATO-nun təsir dairəsinə düşəcək. Qarabağ məsələsi yalnız o halda həllini tapa bilər. Bu isə vaxt tələb edir”. V.Quluzadə hesab edir ki, artıq həmin proses başlayıb: “Gürcüstana ATƏT-in 200 müşahidəçisi gəlib və onlar Osetiyada heç bir soyqırım hadisəsinin olmadığını bəyan edirlər. Bu isə Rusiya siyasətinin məğlubiyyət mesajlarıdır. Türkiyə ilə Ermənistanın münasibətlərinin normallaşması da problemin həllinə müsbət təsir göstərəcək. Türkiyə Ermənistandan qat-qat güclü dövlət olduğundan Ankara İrəvana təsir göstərmək imkanları qazanacaq. Bu əməkdaşlıq Ermənistanı anti-türk, anti-Qərb və anti-NATO mövqeyindən çəkindirəcək. Artıq Ermənistan Türkiyədən asılı vəziyyətə düşmək üzrədir”. S.Sərkisyanın bir sıra hallarda ölkəsinin təcavüzkarlığına haqq qazandırmasına gəldikdə isə V.Quluzadə bunu təbii sayır: “Ermənilər hələlik ənənəvi şüarları dəyişdirə bilməz. Amma bu danışıqlar gələcəkdə baş verəcək dəyişikliklərdən xəbər verir. Ter-Petrosyan hakimiyyətdə qalsaydı, artıq regionda sülh bərqərar olmuşdu. O zaman ən azı bizim 7 rayon işğaldan azad olunar, Türkiyə-Ermənistan əlaqələri yaranar, Dağlıq Qarabağın statusu məsələsi isə dondurulmuş vəziyyətdə gələcəyə saxlanılardı. Rusiya Ter-Petrosyanı aradan götürməklə buna imkan vermədi”. Politoloq indi də Moskvanın Ermənistanın davranışlarını nəzarətdə saxladığını vurğuladı: “Rusiya görsə ki Sərkisyan həddən artıq Qərbə meyllənir, o zaman onu da cəzalandırmağa çalışacaq. Elə Rusiyanın Ermənistana satdığı qazın qiymətini artırması da İrəvana təzyiqdir. Amma bu da faktdır ki, ildən-ilə Rusiya üçün Ermənistanda əl-qol açmaq çətinləşəcək. İrəvan yavaş-yavaş Rusiyanın təzyiqindən çıxmağa çalışacaq. Ona görə də gələcəyə ümidlə baxmaq olar. Amma yaxın dövrdə heç bir dəyişiklik gözləməyə dəyməz”. Cavid TURAN musavat