SERJ SƏRKİSYAN BMT-də YENƏ «SOYQIRIM»dan, «DAĞLIQ QARABAĞIN MÜSTƏQİLLİYİNDƏN» DANIŞIB Sentyabrın 25-də Nyu Yorkda, BMT Baş Assambleyasının 63-cü sessiyasında çıxış edən Ermənistan prezidenti Serj Sərkisyan deyib ki, həmişəki kimi yenə də bir xalqın öz müqəddəratının təyinetmə hüququ yaşamaq uğrunda mübarizəyə çevrilir. «Media forum» saytı xəbər verir ki, Ermənistanın dövlət başçısı 21-ci əsrdə öz hüquqları uğrunda mübarizə aparan insanların etnik təmizləmə, yaxud soyqırımla üzləşdiklərini bildirib. Sərkisyanın fikrincə, xalqların öz müqəddaratını təyinetmə prinsipinin ciddi müzakirəyə ehtiyacı var: «Bizim zamanımızda öz müqəddəratını təyinetmədən danışmaq xalqlar üçün özünü məhv etməklə nəticələnir. Beynəlxalq hüququn əsas prinsiplərindən olan öz müqəddəratını təyinetmə deportasiyalara, etnik təmizləmələrə, soyqırımlara səbəb olur. Əminəm ki, belə davam etmək olmaz». «Ermənistan hesab etmir ki, bütün öz müqəddəratını təyinetmələr ayrılmalarla nəticələnir» deyən Sərkisyan əlavə edib ki, bununla belə çox vaxt münaqişələrin həlli üçün öz müqəddəratını təyin etmə prinsipi tətbiq olunur. Ermənistan prezidenti «Dağlıq Qarabağ xalqı»nın öz müqəddəratını təyin etmək istəyini buna misal olaraq çəkib. Onun fikrincə, faktiki 16 ildir «müstəqil Dağlıq Qarabağ Respublikası mövcuddur, amma Azərbaycan hakimiyyəti bu faktı tanımaqdan imtina edir». S.Sərkisyan onu da vurğulayıb ki, Dağlıq Qarabağ problemi ATƏT-in Minsk qrupu çərçivəsində həll olunmalıdır: «Erməni xalqı soyqırımın qurbanı olub». Sərkisyan deyib ki, Azərbaycan tərəfinin Dağlıq Qarabağın müstəqilliyini tanıması üçün aktiv danışıqlar gedir: «Qarabağ xalqı»nın qanuni yolla öz müqəddəratını təyin etmək cəhdi amansız müharibəyə səbəb olub, illərdən bəridir Qarabağ erməniləri məhv olmaq təhlükəsi ilə üzləşib». Ermənistan prezidentinin sözlərinə görə, müharibədə öz hüquqlarını qoruyan xalqı işğalçı adlandırmaq ədalətsizlikdir: «Azərbaycan isə bunu ən yüksək tribunalardan bəyan edir». S.Sərkisyan vurğulayıb ki, BMT Baş Assambleyasının bu ilin martında rəsmi Bakının təşəbbüsü ilə qəbul edilən, Azərbaycanın ərazi bütövlüyünü tanıyan qətnamə Azərbaycana «ayı xidməti» göstərmək deməkdir. Azərbaycan tərəfinin müharibə bəyanatlarına toxunarkən S.Sərkisyan bunu «siyasi alver» adlandırıb. O, Ermənistan-Türkiyə münasibətlərinə də toxunub: «Düşünürəm ki, erməni-türk əlaqələrində problemləri həll etmək anı yetişib və bu məsələyə mən türk həmkarlarımın da anlaşıqla yanaşdığını görürəm». Sərkisyanın sözlərinə görə, qonşu ölkələrlə mübahisəli məsələlərin həlli dialoqsuz mümkün deyil: «Qonşu ölkələr arasında həmişə mübahisəli məsələlər olub və onlar heç vaxt dialoqsuz həll edilməyəcək. Bunu başa düşərək mən Türkiyə prezidenti Abdulla Gülü iki ölkənin yığma futbol komandaları arasında keçirilən oyuna tamaşa etmək üçün Yerevana dəvət etdim. Abdulla Gülün cəsarətli addımı məni sevindirdi».