AKP İQTİDARI MÜXALİFƏTÇİLƏRƏ DİVAN TUTUR “Ergenekon” əməliyyatında hökuməti kəskin tənqid edən “Kanaltürk”ün keçmiş sahibi Tuncay Özkan başda olmaqla daha bir qrup adam həbs edildi Türkiyədə “Ergenekon” adı verilən əməliyyatın əslində AKP iqtidarına qarşı çıxan şəxsləri zərərsizləşdirməyə xidmət etdiyi dünən bir daha görünüb. Səhər tezdən bu əməliyyat çərçivəsində həbslərin növbəti dalğası başlayıb və bu dəfə başda AKP iqtidarını sərt tənqid edən “Kanaltürk” telekanalının keçmiş sahibi, hökumətə qarşı müxtəlif aksiyalar təşkil edən Tuncay Özkan başda olmaqla bir qrup jurnalist, keçmiş polis rəisi, prokuror və digərləri həbs ediliblər. Həbslər bu dəfə də səhərə yaxın, eyni vaxtda saxlanılan şəxslərin evlərinə və iş yerlərinə antiterror polisi tərəfindən basqın edilməklə aparılıb. Türkiyə mənbələrinin məlumatlarına görə, hazırda “Biz neçə nəfərik” adlı ictimai etiraz hərəkatına başçılıq edən Tuncay Özkan İstanbuldakı evində həbs olunub. Eyni vaxtda “Kanaltürk”ün keçmiş aparıcısı Duyğu Dikmenoğlu, kanalın keçmiş xəbər redaktoru Adnan Bulut və Esenyurt bələdiyyəsinin keçmiş başqanı Gürbuz Çapan da evlərində həbs ediliblər. Ankarada isə həmin saatlarda istefada olan polkovnik Tancu Güvendirən tutulub. O, keçmiş Ankara Dövlət Təhlükəsizlik Məhkəməsinin prokuroru, yüksək hərbi məhkəmənin fəxri üzvü idi və PKK terrorçularına qarşı bir çox mühüm qərarların çıxarılmasındakı roluna görə dövlətin xüsusi mühafizəsi altında idi. Bildirilir ki, həbslər İzmirdə də aparılıb. Həbs olunanların ümumi sayının 19 nəfər olduğu bildirilir. Onların arasında İşçi Partiyasının “Ergenekon” əməliyyatında həbs edilən sədri Doğu Perinçəkin keçmiş vəkili və “Aydınlıq” jurnalının yazarı Emcet Olcaytu da var. Saxlanılan 9 nəfərdən 4-ü Ankarada, 5-i İstanbulda həbs olunub. Saxlanılanlar arasında istefada olan məşhur polis rəisi Adil Sərdar Saçan, kardioloq, Tuncay Özkanın həkimi Məsud Özcan, dövlət məmuru Mahir Akkar, keçmiş polis əməkdaşı Hasan Kılıçarslan da yer alır. CHP-dən millət vəkili Şahin Mengü jurnalistlərə bildirib ki, Tuncay Özkan onu səhər saat 06.40 radələrində arayıb və polislərin evində axtarış apardığını deyib. O, Özkanın “Ergenekon” əməliyyatı çərçivəsində həbs edildiyini təsdiqləyib. Millət vəkili deyib ki, az sonra Özkanla telefon əlaqəsi kəsilib. Mengü bildirib ki, Özkanın səhhətində ciddi problemlər var idi və o, müntəzəm həkim nəzarətində olub. İzmirdə isə “Kanaltürk”ün keçmiş xəbər müdiri, jurnalist Adnan Bulut həbs edilib. Onu daha sonra İstanbula göndəriblər. Bildirilir ki, saxlanılan şəxslərin evlərində və iş yerlərində axtarışlar aparılıb. Qeyd edək ki, Tuncay Özkan ötən il Türkiyədə AKP-nin Abdullah Gülü prezidentliyə namizəd elan etməsinə qarşı ölkənin hər yerində keçirilən etiraz mitinqlərinin təşkilatçılarından biri idi. Bu mitinqlər zamanı Özkan əsas natiqlərdən biri kimi AKP iqtidarını, şəxsən Ərdoğanı və Gülü sərt ifadələrlə tənqid edib, onları Türkiyədə Atatürk cümhuriyyətinin təməllərini sarsıtmaqda və dini rejim qurmaq planlarında, habelə korrupsiya əməllərində ittiham edib. Özkanın bir neçə ay əvvəl hökumətə bağlı media holdinqinə satmağa məcbur olduğu “Kanaltürk”də AKP hökumətinin siyasətini müntəzəm tənqid edib. Son vaxtlar Özkan “Biz neçə nəfərik” adlı ictimai hərəkat yaradaraq AKP iqtidarına qarşı müxtəlif formada aksiyalar keçirirdi. O, “Ergenekon” əməliyyatını da sərt tənqid edənlərdən biri olub. Özkan çıxışlarından birində deyib ki, bu əməliyyat əslində Atatürkçü insanlara qarşı yönəlib: “Məni də Mustafa Kamalın əsgərlərindən biri olaraq həbs edib işgəncə maşınından keçirməsələr, mən də onların üzünə tüpürməsəm, namərdəm. Məni bu yoldan döndərə bilməzlər, onlardan hər cür namussuzluğu gözlədim, bunu da gözləyirəm, mənim qaranlıqla mübarizəm davam edəcək”. Tutulanlardan biri də İstanbul polisinin mütəşəkkil cinayətkarlıqla mübarizə idarəsinin keçmiş rəisi Adil Sərdar Saçandır. O, 1998-ci ildən 2003-cü ilədək bu vəzifəni icra edib, mütəşəkkil cinayətkarlıqla sərt mübarizə aparması ilə tanınıb, 11 mindən çox belə əməliyyat keçirib. Türkiyənin ən böyük korrupsiya əməliyyatlarına başçılıq edib. Tanınmış mafiya babalarını istintaqa cəlb edib, bir çoxunu həbsə göndərib. Sedat Peker, Ələddin Çakıcı, Sedat Şahin kimi məşhur mafiozlara qarşı əməliyyatlar aparıb. Sonda Saçan iş adamından rüşvət almaqda və universitet tələbəsinə işgəncə verməkdə ittiham olunaraq AKP-nin iqtidara gəlişindən sonra işdən azad edilib və polisdən qovulub. İndiki “Ergenekon” işi ilə bağlı ilk dəlilləri də vaxtilə elə onun özünün üzə çıxardığı bildirilir. Belə ki, Saçan “Ergenekon” işinin əsas şəxsi hesab edilən və hazırda mühacirətdə yaşayan Tuncay Guneyi həbs edən adamdır. Həmin vaxt Guney istintaqa ifadəsində “Ergenekon” təşkilatı haqda bilgilər verib. Hazırkı həbslərin də bir çoxu məhz şübhəli xarakterə malik Guneyin ifadələri əsasında aparılıb. Xatırladaq ki, ötən həftə də “Ergenekon” əməliyyatı çərçivəsində həbslər olub. Aralarında 4 kiçik zabit və bir kursant, habelə teatr artisti və vəkil olmaqla 9 nəfər həbs edilib. Sonradan onların bir neçəsi azadlığa buraxılıb. Həbslərin son dalğası isə AKP iqtidarının ciddi korrupsiya qalmaqalları ilə üzləşdiyi bir vaxtda aparılır. F.Məmmədov musavat