Bakıda əsil prospekt tikilir - FOTOLENT Heydər Əliyev prospekti genişləndirilir, yeni işıqlandırma sistemi, mərmər və qranit daşları ilə bəzədilir Bakının ən iri və texniki-iqtisadi göstəricilərinə görə əsl prospekt statusuna cavab verən yeganə yol qovşağının tikintisi başa çatmaq üzrədir. Söhbət iyun ayında tikintisinə başlanmış, 50-55 metr eni olan 10 zolaqlı Heydər Əliyev prospektindən gedir. Bəri başdan bildirək ki, bu yol-nəqliyyat kompleksi tamamilə yenidən qurulur, asfalt örtüyü, yolayırıcı zolaqlar, piyada və dəmir yolu keçidləri, hətta yaşıllıq zolaqlar da beynəlxalq standartlara uyğunlaşdırılır. Prospektdə yenidənqurma işlərinə nəzarət edən mütəxəssislərin bildirdiyinə görə, “Ramstor” dairəsindən “Əzizbəyov” dairəsinə qədər olan 5 kilometrlik yol qovşağında əsaslı təmir işlərinin təxminən 70 faizi yerinə yetirilib. Belə ki, prospektin 4 kilometr hissəsinə ikinci qat asfalt örtüyünün çəkilişi başa çatıb, 1 kilometrlik hissədə isə asfaltlama işləri davam etdirilir. Ən mühüm dəyişikliklərdən biri isə prospektdə yerləşən “Bağırov” körpüsünə giriş və çıxışların genişləndirilməsi ilə bağlıdır. Körpünün giriş və çıxış hissələrindəki 1,5 kilometrlik eniş-yoxuş 2 metr dərinliyində torpaq qatının çıxarılması nəticəsində hamar yola çevrilib. İş icraçılarının fikrincə, torpaq qatının çıxarılması sayəsində prospektin mərkəzi hissəsindən körpüyə giriş-çıxış bucağı normativ qaydalara uyğunlaşdırılıb. Bu isə geniş prospektdə sürətlə hərəkət edən avtomobillər üçün mövcud maneələri aradan qaldırıb. Həmçinin prospektin üzərindən keçən dəmir yolları da yenidən qurulur. Nəqliyyat Nazirliyində isə bildirirlər ki, yenidənqurma işləri tam şəkildə başa çatdıqdan sonra Heydər Əliyev prospektində avtomobillər dayanmadan, yəni işıqforsuz birbaşa hərəkət edə biləcəklər. Bu səbəbdən “Bağırov” körpüsünün giriş və çıxışında eniş-yoxuş hissəsinin minimuma endirilməsi avtomobillərin maneəsiz hərəkəti üçün əsas şərt sayılır. Hazırda isə 1500 poqonometr məsafədə istinad divarları çəkilir. Bundan başqa, Nəqliyyat Nazirliyi maşınların maneəsiz hərəkəti və yol hərəkətinin təhlükəsizliyi məqsədilə prospektdə daha bir tunel tikmək niyyətindədir. Üstəlik prospektdə 4 yerüstü piyada keçidinin tikintisi, 2 yeraltı keçidin isə yenidən qurulması planlaşdırılır. Heydər Əliyev prospektini digər yol qovşaqlarından fərqləndirən mühüm cəhətlərdən biri yol kənarlarının mərmər və qranit daşlarla bəzədilməsidir. Nəqliyyat Nazirliyinin hesablamalarına görə, prospektin tam şəkildə yenidən qurulması üçün 30 min poqonometr mərmər səki daşından, 200 min ton asfalt örtükdən və təxminən 40 min poqonometr qranit bandurlardan istifadə olunmalıdır. Bütün bu işlərin ilin sonunadək tamamilə başa çatdırılması nəzərdə tutulur. Elxan SALAHOV LENT.AZ