Cənubi Osetiya problemi presedent yaratmır Rusiya Dağlıq Qarabağı Azərbaycan ərazisi kimi tanıyır "Rusiyanın Cənubi Osetiya və Abxaziya regionlarının müstəqilliyini tanıması Moldovanın Dnestryanı regionu və Azərbaycanın Dağlıq Qarabağ ərazisi üçün presedent ola bilməz". Bu bəyanatı Rusiya xarici işlər naziri Sergey Lavrov Beynəlxalq Məsələlər üzrə Federasiya Komissiyasının dünən keçirilən iclasında bildirib. S.Lavrovun sözlərinə görə, Moskva Tbilisidəki reyimdən fərqli olaraq regional münaqişələri siyasi və diplomatik vasitələrlə, eləcə də beynəlxalq ictimaiyyətin kollektiv tədbirləri nəticəsində həll etməyə çalışır. Rusiya MDB məkanındakı münaqişələri beynəlxalq qanunlar və BMT Nizamnaməsi çərçivəsində həll etməkdə davam edəcək: "Biz öz vasitəçilik missiyamızı danışıqlar prosesi və sülhyaratma vasitəsilə reallaşdıracağıq. Bu, Dnestryanı regiona və Dağlıq Qarabağa bütövlükdə aid edilir. Hər yerdə müəyyən özünəməxsusluqlar vasitəçiliyin müəyyən formatları və mexanizmləri var. Ancaq Cənubi Osetiya böhranı onlar üçün heç bir presedent yaratmır". Onun sözlərinə görə, Dağlıq Qarabağ və Dnestryanı münaqişələrin həlliylə məşğul olanlar beynəlxalq qanunları və hazırkı müqavilələri pozmağı planlaşdırmırlar. S.Lavrov onu da qeyd edib ki, Rusiya gürcü xalqı ilə münasibətləri pozmayıb. Amma Moskvada bilmək istəyirlər ki, Tbilisi Rusiya ilə münasibətləri necə görür. O, gürcü xalqının Rusiya ilə münasibətləri normallaşdırmağa müvəffəq olacaq bir şəxsi dövlət başçısı seçəcəyinə ümidvar olduğunu deyib: "Moskva Tbilisi ilə diplomatik münasibətləri dayandırmayıb. Bu münasibətlərin dayandırıldığını Gürcüstan rəhbərliyi elan edib. Biz də bilmək istəyirik ki, onlar Rusiya ilə diplomatik münasibətlərin pozulmasını necə təsəvvür edirlər". Gürcüstan isə deyəsən, Rusiya ilə münasibətləri birdəfəlik kəsmək niyyətindədir. Rusiya xarici işlər nazirinin bəyanatının ardınca Gürcüstanın ali qanunvericilik orqanında Rusiya ilə parlament əlaqələri qrupunu yaratmaqdan imtina ediblər. "Rusiya Gürcüstan üçün dost ölkə deyil. Bizim Rusiya ilə dost olmağı arzulamağımıza baxmayaraq, bu gün bu ölkə Gürcüstanın düşmənidir. O, Gürcüstanın bir hissəsini işğal edib və iki regionunun müstəqilliyini tanıyıb" - deyə parlamentin xarici əlaqələr komitəsinin sədri Laşa Yvaniya yurnalistlərə bildirib. "Belə bir şəraitdə Rusiya ilə dostluqdan danışmaq mümkün deyil" - deyə deputat bildirib. Bütün bunlara baxmayaraq, Qərbdə Rusiya ilə Gürcüstan arasında baş vermiş müharibədə Tbilisinin ünvanına sərt ittihamlar səslənməkdədir. ABŞ dövlət katibinin siyasi məsələlər üzrə müavini Uilyam Börns Gürcüstanın Cənubi Osetiyadakı fəaliyyətinin səhv olduğunu bildirib. "RİA Novosti" agentliyinin məlumatına görə, Börns Senatdakı çıxışı zamanı belə bir bəyanat verib. Dövlət katibinin müavini Rusiyanı da tənqid edərək Moskvanın qeyri-proporsional hərəkət etdiyini vurğulayıb: "Rusiya hökumətinin münaqişə ərəfəsində təxribat xarakterli fəaliyyətinə, onun digər dövləti bölmək cəhdlərinə isə haqq qazandırmaq mümkün deyil". U.Börns Qafqazda hərbi əməliyyatlara gətirib çıxaran səbəblərin son dərəcə mürəkkəb olduğunu, həm Rusiyanın, həm də Gürcüstanın səhvlər buraxdığını vurğulayıb. Azər NURİYEV