GünAzTv: Erməni diasporu müharibə hazırlığına başladı. Dörd ölkədə döyüşçüləri səfərbər etmək üçün mərkəz quruldu, bu işə rəhbərlik edən erməni milyarder müharibənin qapının ağzını kəsdiyini deyib.

Erməni diasporu Qarabağda alovlana biləcək yeni müharibəyə hazırlıq üçün səfərbərliyə başlayıb. Rusiyanın “Regnum” agentliyinin yaydığı sensasion xəbərə görə, münaqişənin nizamlanmasına dair danışıqlar prosesinin fəallaşdığı bir vaxtda, həmçinin yaxın günlərdə ATƏT-in Astana sammitində erməni qoşunlarının ətraf rayonlarından çəkilməsini nəzərdə tutan və Madrid prinsipləri kimi tanınan sənədin müzakirəsi ərəfəsində müxtəlif ölkələrdə erməni diasporu müharibəyə hazırlıq üçün koordinasiya mərkəzləri qurub. Məlumatda deyilir ki, 4 ölkədə-Rusiya, Fransa, ABŞ və Uruqvaydakı iri erməni biznesmenləri rezervistlərin və veteranların səfərbər edilməsi üçün koordinasiya mərkəzləri yaradıblar. Bildirilir ki, əgər Qarabağda müharibə başlasa erməni diasporunun səfərbər etdiyi muzdlular hava nəqliyyatı vasitəsilə İran üzərindən münaqişə zonasına daşınacaq. Artıq bu daşıma üçün konkret planın da hazırlandığı məlum olub.

Məlumatda deyilir ki, erməni diasporunun başlatdığı bu səfərbərlik “Preventiv mobilizasiya” adlanır. Proqramın təşəbbüskarlarından biri, Rusiyada yaşayan erməni milyarderi adının açıqlanmaması şərti ilə agentliyə bildirib ki, işlər bu günlərdə yaradılan beynəlxalq erməni hərəkatı - “Erməni rezervistləri və veteranları İttifaqı” çərçivəsində aparılır. Mənbənin sözlərinə görə, rezervistlərin və veteranların barəsində məlumat üç dildə-rus, ingilis və ispan dillərində xüsusi məlumat bazasına toplanır. Səfərbərlik hərəkatının fəallarının hesablamalarına görə, bu kampaniyaya dünyanın 38 ölkəsindən 200 minə qədər erməni cəlb oluna bilər. “Rusiya erməniləri bu təşəbbüsün lideridir. Bu da onunla bağlıdır ki, Rusiyada ən güclü və çoxsaylı erməni diasporlarından biri fəaliyyət göstərir, burada yaşayan ermənilərin sayı 2,5 milyon nəfərdən artıqdır. Onların intellektual, maddi bazası, təşkilatçılıq potensialı güclüdür, həmçinin son on illiklərdə MDB çərçivəsində gedən miqrasiya prosesləri və təbii ki, Rusiya ilə Ermənistan arasında strateji müttəfiqlik də burada rol oynayır” deyə mənbə bildirib.

“Müharibə qapının ağzını kəsib!”

Kampaniyaya rəhbərlik edənlərdən biri olan mənbə onu da bildirib ki, artıq erməni diasporunun dünyanın bir sıra aparıcı ölkələrinin xüsusi xidmət orqanlarının keçmiş və indiki əməkdaşları olan təmsilçilərindən ibarət “informasiya - analitik mərkəz”i qurulub. Bu mərkəz səfərbərlik kampaniyası çərçivəsində yaradılan vahid informasiya bazasını analiz edir, hadisələrin mümkün inkişaf ssenarilərini araşdırır, eyni zamanda düşmənlərin və agentlərin səfərbər olunanların siyahısına düşməsini əngəlləmək üçün yaradılmaqda olan “erməni diaspor ordusu”na qoşulanların hamısının şəxsiyyətini diqqətlə araşdırır. Qarabağda müharibə başlayarsa, diasporun necə hərəkət edəcəyi barədə danışan mənbə belə deyib: “Müharibə qapının ağzını kəsib! Müharibədə isə bütün metodlar yaxşıdır. Mən demirəm ki, biz Üsəma bin Ladenin təcrübəsini tətbiq edəcəyik. Yox! Biz açıq və ondan daha sərt hərəkət edəcəyik. Hazırda hamıya aydındır ki, Qarabağ təhlükədədir. Əgər Qarabağ olmayacaqsa, Ermənistan da olmayacaq, Ermənistan olmayacaqsa ermənilər də olmayacaq. Millət təhlükədədir və bunu dünyanın hansı ölkəsində, İranda, Abxaziyada, Cavaxetiyada, Ukraynada və ya Bolqarıstanda yaşamasından asılı olmayaraq, səfərbərlik kampaniyasına qoşulan hər bir erməni dərk edir. Sizi inandırım ki, kampaniyaya bizim işimizi haqq işi hesab edən digər millətlərin nümayəndələri də qoşulur. Məsələn, bolqarlar, serblər, hətta italyanlar. Biz Azərbaycana öz real gücümüzü göstərəcəyik ki, öz neftinə arxayın olmaqdan əl çəksin. Həmçinin biz bəzi beynəlxalq qüvvələrə və transmilli şirkətlərə də göstərəcəyik ki, neft-qaz hasilatına "stavka" edərək Dağlıq Qarabağ əhalisinin haqlarına məhəl qoymamaq, Ermənistana təzyiq etmək nə deməkdir".Bu səfərbərlik kampaniyasına Ermənistan hakimiyyətinin dəstək verib-vermədiyi barədə suala isə erməni mənbə belə cavab verib: “Mən bu yerdə susmalı olacağam. Astana danışıqlarından sonra hər şey öz-özünə aydınlaşacaq”.

“Regnum”a danışan mənbə kimdir?

Qeyd edək ki, Ermənistan prezidenti Serj Sərkisyan ötən həftə Moskvada Rusiya Erməniləri İttifaqının 10 illik yubiley mərasimlərinə qatılıb. Baş nazir Vladimir Putinin də iştirak etdiyi mərasimlərdən sonra o, təşkilatın rəhbəri Ara Abramyanla və Rusiyadakı erməni diasporunun aparıcı nümayəndələri ilə qapalı toplantı da keçirib. Ehtimal olunur ki, sözügedən səfərbərlik kampaniyasını təşkil edənlərdən və “erməni diaspor ordusu” yaradanlardan biri kimi “Regnum”a açıqlamalar verən mənbə də məhz Abramyandır. O, Rusiyada ən varlı şəxslərdən biri sayılır. Tamamilə mümkündür ki, Astana danışıqları ərəfəsində ermənilərə bağlı olan Rusiya agentliyi vasitəsilə bu cür məlumatın yayılması ermənilərin Azərbaycana təzyiq göstərmək cəhdidir.

Azərbaycanın artan hərbi gücünə qarşı diaspor amili

Lakin digər tərəfdən ona da şübhə yoxdur ki, Azərbaycanın öz ordusunu durmadan gücləndirməsi, hərbi büdcəsini Ermənistanın ümumi büdcəsinin həcmindən az qala 1 milyard dollardan çox artırması, xaricdən yeni silah və hərbi texnika alması, ölkə prezidentinin sərt bəyanatları fonunda ciddi narahatlıq keçirən ermənilər Qarabağda mümkün müharibə zamanı diasporun imkanlarından istifadə edəcəklər. Çünki Ermənistanın Qarabağda mümkün irimiqyaslı müharibə zamanı duruş gətirməsi üçün insan resursları olduqca məhduddur. Ölkə əhalisinin xeyli hissəsi, xüsusən gənclər Ermənistanı tərk edib. Beynəlxalq təşkilatların məlumatlarına görə, hazırda Ermənistan 60 min əsgərə və 32 min nəfər əlavə ehtiyat qüvvəyə malikdir. Ermənistan mətbuatının yazdıqlarına görə, 2004-cü ilin payızından bu yana ordu çağırışçı çatışmazlığı problemi ilə üzləşir. Əvvəllər hər çağırışda 15-17 min gənc xidmətə yola salındığı halda, son illər bu göstərici 11-12 min nəfərə düşüb.

Niyə İran marşrutu seçilib?

Hərbi mənbələrin məlumatına görə, Ermənistan və Dağlıq Qarabağ separatçılarının Azərbaycanın işğal altındakı ərazilərində saxlanılan hərbi qüvvələrinin sayı 25 min nəfərdir. Məlumatlara görə, işğal olunmuş Azərbaycan ərazilərində ermənistanlı çağırışçılarla yanaşı, 3200 muzdlu da xidmət edir. Xaricdəki erməni diasporunun xətti ilə maliyyələşən muzdlu əsgərin hər birinə ayda 300 ABŞ dolları məvacib verilir. Yəni erməni diasporu birinci Qarabağ müharibəsi zamanı olduğu kimi atəşkəsdən sonra da işğal edilmiş əraziləri saxlaya bilmək üçün xaricdən muzdluların cəlb edilib göndərilməsini təşkil etməkdədir. Azərbaycanın isə hərbi potensialı ilə yanaşı insan resursları da Ermənistanla müqayisədə qat-qat üstündür. Belə vəziyyətdə Ermənistanın yeni müharibədə uduzaraq işğal edilmiş ərazilərdən çəkilməli olacağı, nəinki ətraf rayonları, o cümlədən Dağlıq Qarabağı da geri verməli olacağı kifayət qədər real görünür. Erməni diasporunun və xaricdəki varlı ermənilərin həyəcan təbili çalaraq muzdluların kütləvi səfərbərliyinə başlaması da bununla izah olunur. Səfərbər olunan muzdluların müharibə zonasına çatdırılması üçün seçilən marşrut da hər şeyi deyir: İran işğal edilmiş Azərbaycan əraziləri ilə 132 kilometrlik quru sərhədinə malikdir və muzdlu dəstələr təyyarə ilə bu ölkəyə daşındıqdan sonra oradan quru yoluyla Qarabağa keçə bilərlər. Çünki Gürcüstan marşrutu ermənilər üçün o qədər də etibarlı deyil.Birinci Qarabağ müharibəsi zamanı Ermənistan ordusunun sıralarında Azərbaycana qarşı minlərlə muzdlu döyüşürdü və onların arasında xarici ölkələrdən gələn, “ASALA” və digər terrorçu qruplaşmaların düşərgələrində təlim keçən erməni terrorçuları ilə yanaşı digər millətlərin nümayəndələri-əsasən ruslar, serblər, digər slavyan mənşəlilər, habelə xristian ərəblər də üstünlük təşkil edirdi. Həmin vaxt Qarabağa muzdluların daşınması işi Livan, Suriya, ABŞ, Fransa və Rusiyadakı erməni diaspor mərkəzləri tərəfindən təşkil edilirdi. Erməni diasporu təkcə muzdluları cəlb etməklə kifayətlənməyib Ermənistan ordusunun silahla və ərzaqla təchizatını da həyata keçirirdi. Yeni musavat