GünAzTv: Dünən Azərbaycan Mərkəzi Seçki Komissiyası 7 noyabr parlament seçkiləri ilə bağlı yekun protokolu təsdiq edib. MSK bu protokolu hüquqi təsdiq üçün ölkənin Konstitusiya Məhkəməsinə göndərib.

Bu arada isə parlament seçkiləri ətrafında siyasi narazılıq qalmaqdadır. Müxalifətçilər seçki ilə bağlı ümummilli forum keçirməyə hazırlaşır.

MSK-nın dünənki iclası bəzi məntəqələrdə seçki nəticələrinin ləğvi ilə başladı. Komissiya üzvləri 46 məntəqədə səsvermə nəticələrinin ləğvi lehinə səs verdilər.

Lakin bunun seçkinin ümumi nəticələrinə ciddi təsir etmədiyi xəbər verilir. Yəni, yeni parlamentə seçildiyi elan olunmuş şəxslər öz mandatlarını qoruyub-saxlayırlar.

GünAzTv mətbuat mərkəzinin BBC-yə istinadən yaydığı məlumata görə, daha sonra MSK üzvləri ötən seçkilərin dəyərləndirilməsinə keçdilər və onların tam əksəriyyəti 7 noyabr səsverməsini bütünlüklə bəyəndi. MSK sədri Məzahir Pənahov 7 noyabr seçkilərində “müqayisə olunmayacaq dərəcədə irəliləyişin” olduğunu dedi.

Bu rəyə digər komissiya üzvləri də qoşuldu. Və yalınız bir nəfər, komissiyanın Müsavat partiyasından olan üzvü Gülağa Aslanlı səsvermə prosesini tənqid etdi.

MSK-ya daxil olan şikayətlərin araşdırıldığını etiraf edən Aslanlı “bu araşdırmanın obyektiv olmadığını” bəyan etdi. Çıxışının sonunda o, komissiya üzvlərini yekun protokola imza atmamağa səslədi.

Lakin MSK üzvlərinin tam əksəriyyəti protokola səs verdi. Əleyhinə səs verən isə bircə Gülağa Aslanlının özü oldu.Təsdiq edilən yekun protokol isə Konstitusiya Məhkəməsinə göndərildi. Bu instansiyanın təstiqindən sonra yeni Milli Məçlis fəaliyyətə başalaya biləcək.

Bu arada isə yerli mətbuat seçki sonrası baş qaldıran beynəlxalq tənqiddən Azərbaycan iqtidarının məmnun qalmadığını yazır.

Bəzi iddialara görə, seçkiyə verilən əsasən mənfi dəyərləndirməni bir qədər yumşaltmaq üçün beynəlxalq aləmin diqqət mərkəzində olan həssas məsələlərin müsbət çözümünə belə qərar verilir.

Siyasi icmalçı Azər Rəşidoğlu hesab edir ki, ötən həftə azad edilmiş bloggerlər Hacızadə və Milli əslində təsadüfən azad edilməyiblər. “Azərbaycan hakimiyyəti bu addımını Qərbin öz seçki tənqidini yumşaldacağına və rəsmi Bakı ilə münasibətlərində daha mülayim siyasi mövqe tutacağına hesablayır”.

Azər Rəşidoğlu deyir ki, zidiyyətli seçkinin taleyini iki şəxsin taleyi ilə mübadilə etməyə çalışan Azərbaycan rəhbərliyi əslində çox ucuz qiymət ödəməyə çəhd edir. Lakin qeyri-rəsmi anlaşmanın taleyi yenə də Qərbdən asılı olacaq.

Bu arada isə Bakıda seçkilərinin nəticəsindən narazı qalan namizədlərin ümumrespublika forumu keçiriləcək. Yüzlərlə şəxsin qatılaçağı bu tədbirin təşəbbüskarı AXCP-Müsavat blokudur. Forumda həm siyasi partiya nümayəndələrinin, həm də bitərəf namzidələrin iştirakı gözlənilir.

7 noyabr seçkilərinin nəticələrini tanımayan və yeni seçki tələb edən müxalif qüvvələr bu forumda özlərinin bundan sonrakı siyasi xəttini müəyyən etməyə çalaşacaq.