GünAzTv: “Hayastan” fondu vasitəsilə Dağlıq Qarabağa ianə toplamaq getdikcə çətinləşir, xaricdəki varlı ermənilər də Azərbaycanın işğal edilmiş ərazilərinə pul xərcləməkdə xəsislik edir.

GünAzTv mətbuat mərkəzinin “Yeni musavat”-a istinadən yaydığı məlumata görə, Bu həftə dünyanın hər yerindən ermənilərdən Dağlıq Qarabağ üçün ianə toplamaq üçün növbəti illik telemarafon başlayır. Ümumerməni fondu “Hayastan” tərəfindən hər il təşkil edilən , formaca dilənçilikdən başqa bir şey olmayan Dağlıq Qarabağa yardım aksiyası noyabrın 25-də keçiriləcək telemarafonla yekunlaşacaq. ABŞ-ın (Amerika Birləşmiş Ştatları) Los-Angeles şəhərindən yayımlanacaq telemarafona qatılmaq üçün Dağlıq Qarabağdakı separatçı erməni rejiminin rəhbəri Bako Saakyan da ötən həftədən etibarən Birləşmiş Ştatlardadır.

Xəbərlərə görə, o, ABŞ-dakı erməni təşkilatlarında, kilsələrində və erməni siyasi çevrələrində görüşlər keçirir. Görüşlərin məqsədi Amerikadakı varlı ermənilərdən Dağlıq Qarabağ ermənilərinə yardım üçün mümkün qədər çox vəsait toplaya bilməkdir. Ötən həftə Ermənistan prezidenti Serj Sərkisyan da Moskvaya səfəri zamanı Rusiya Erməniləri İttifaqının bu məqsədlə təşkil etdiyi toplantıya Saakyanla birgə qatılmışdı və bu ölkədə yaşayan ermənilərdən Dağlıq Qarabağa daha çox vəsaitin toplanması imkanları müzakirə olunmuşdu. Təşkilatın rəhbəri Ara Abramyan Sərkisyana vəd edib ki, budəfəki telemarafonda Rusiya ermənilərindən 7 milyon dollar toplanacaq. Qeyd edək ki, Serj Sərkisyan həm də “Hayastan” ümumerməni fondunun hamilər şurasının rəhbəridir. Rusiyada yaşayan ermənilərin sayı 1 milyon 600 min nəfər olsa da, ötən il telemarafonda cəmi 5 milyon 290 min dollar ianə toplamaq mümkün olmuşdu.İanə toplamaq üçün təbliğat işi bir neçə həftədir erməni diasporunun güclü olduğu ölkələrdə-Rusiya, Fransa, ABŞ, Livan, Suriya və digər ölkələrdə aparılır. Bu dəfə ümumerməni dilənçiliyinə məşhur fransalı aktyor, ermənilərə simpatiyasını gizlətməyən Jerar Depardye da qoşulub. Fransadakı erməni mənbələrinin xəbərinə görə, Depardye “YouTube” portalında videomüraciət yerləşdirərək bu ölkədəki imkanlı adamları “Dağlıq Qarabağın və Ermənistanın rifahı naminə” “Hayastan” fondunun hesabına vəsait köçürməyə çağırıb. Ermənilərin bu dəfə aksiyaya Depardyeni qoşması təsadüfi deyil. Ötənilki telemarafonda onlarla erməni multimilyonçusunun yaşadığı Fransa da daxil olmaqla, bir neçə Avropa ölkəsindən (Almaniya, Fransa, İngiltərə, Belçika, Hollandiya, İspaniya, İtaliya, Polşa, Avstriya, İsveçrə) cəmi 1.3 milyon avro dilənmək mümkün olub. Halbuki bu dövlətlərdə 12 min 400 erməni ailəsi yaşayır. Bu tendensiya erməni diasporunun güclü olduğu digər ölkələrdə də müşahidə olunur, əvvəlki illərdə Ermənistan prezidentinin və digər rəhbər şəxslərinin aksiyaya şəxsən qoşulmalarına baxmayaraq, toplanan vəsaitlər ilbəil azalır. Məsələn, ötən il “Hayastan” fondu azı 25 milyon dollar toplamağı planlaşdırmışdı, ancaq cəmi 16 milyon dollar toplamaq mümkün olub. Baxmayaraq ki, Moskvada təşkil edilən marafona prezident Sərkisyan və spiker Ovik Abramyan da qatılmışdı. Ancaq onların varlı ermənilərə çağırışları o qədər də effekt verməyib. 2008-ci ildə isə Dağlıq Qarabağ və Ermənistana humanitar yardım üçün diaspor təşkilatları tərəfindən toplanılan məbləğ 35 milyon dollar olub. Halbuki bu rəqəm 2007-ci ildə 54 milyon, 2006-cı ildə 75 milyon, 2005-ci ildə 98 milyon, 2004-cü ildə 112 milyon, 2003-cü ildə 127 milyon, 2002-ci ildə 169 milyon, 2001-ci ildə 178 milyon, 2000-ci ildə 190 milyon dollar təşkil edirdi.Dağlıq Qarabağdakı separatçı rejimin büdcəsinin əsas gəlir mənbələrindən biri də xaricdəki ermənilərdən dilənərək yığılan pullardır. Separatçı rejimin büdcəsi Ermənistan büdcəsindən hər il ayrılan dotasiyalarla, Azərbaycanın işğal edilmiş ərazilərindən maddi sərvətlərin talan edilib satılması ilə və diaspordan yığılan ianələrlə formalaşdırılır. İqtisadiyyatdan isə söhbət gedə bilməz. Separatçı rejimin rəsmiləri özləri də etiraf edirlər ki, hətta xaricdəki ermənilər də Qarabağa investisiya qoymaqda maraqlı deyil. Ermənistanın gələnilki büdcəsində Dağlıq Qarabağa ayrılan dotasiyanın həcmi 100 milyon dollara yaxındır. Ermənistan iqtisadiyyatının acınacaqlı durumda olduğu bir vaxtda bu məbləğ kifayət qədər ağır yükdür. Ona görə də Ermənistan xaricdəki ermənilərdən daha çox ianə toplaya bilmək üçün ən müxtəlif yollara baş vurur. Ancaq bu səylərin gözlənilən nəticəni vermədiyini Ermənistanda etiraf edirlər.Dünya Erməni Fondunun icraçı direktoru Ara Vardanyan toplanan ianələrin ildən-ilə azalmasını şərh edərkən bildirib ki, dünyanın müxtəlif dövlətlərinə səpələnmiş 10 milyon nəfər erməni aylıq gəlirlərini 1 dollar qismində fondun hesabına keçirmiş olsalar, bu ildə 120 milyon dollar vəsait deməkdir. “Çox təəssüf ki, bizlər yüzillər boyu apardığımız dərin təbliğatlar sayəsində bu gün nail olduğumuz Ermənistan və Dağlıq Qarabağı bir ərazi kimi yenidən itirmək təhlükəsi ilə üz-üzə durmuşuq. Hər il Dağlıq Qarabağ və Ermənistandan, eləcə də Gürcüstandan ermənilər dünyanın digər dövlətlərinə kütləvi şəkildə köçüb gedirlər. Mühacirətə gedənlər başqa dövlətlərin vətəndaşlığını almaqla bir daha həmin torpaqlara geri dönməyəcəklərində israrlıdırlar” deyə, Vardanyan şikayətlənib.