GünAzTv mətbuat mərkəzinin növbəti müsahibi, 31 saylı Suraxanı II seçki dairəsindən deputat seçilən, Milli Dirçəliş Hərəkatının sədri Fərəc Ulusoydur.

- Fərəc bəy, Milli Azadlıq Hərəkatının tanınmış fəallarından olaraq, neçə düşünürsünüz, “17 Noyabr Dirçəliş Günü” xalqımıza nə verdi?

- Bu sualın bütün olaraq cavabı dirçəliş sözündə öz əksini tapıb. İstər iqtisadi baxımından olsun, istərsə də siyasi cəhətdən, hətta müstəqillikdən sonra da dirçəliş prosesi olmasa o, xalq yaşaya bilməz. Çox şükürlər olsun ki, bu gün Azərbaycanın quzeyində dirçəlişimizi əldə etmişik. Güneyimizdə bu prosesə çatmaq uğrunda ciddi şəkildə mübarizə getməkdədir.

Biz tarixi-coğrafi ərazilərimizi əhatə edən Bütöv Azərbaycan dövlətinin qurulmasının tərəfdarıyıq. Bu ideya bizim ana düşüncə sistemizi təşkil edir.

Son bir əsrdə Güney Azərbaycanda dirçəliş hərəkatı uğrunda böyük mübarizələr gedib, müəyyən zamanlarda xalqımız azadlığını əldə etsədə, bunu axıra kimi qoruyub saxlaya bilmədi. Şəxsən belə düşünürəm ki, quzeydə 17 noyabrda baş verən dirçəliş hərəkatı, XX əsrdən başlayaraq güneydə baş verən oyanış prosesinin məntiqi davamıdır.

- Parlamentdə fəaliyyətiniz dönəmində Güney Azərbaycan məsələsinə nə qədər önəm verəcəksiniz?

- Mən, məsələlərə lokal baxan insan deyiləm. Bu məsələyə strateji baxımından yanaşıram. Hər şeydən öncə xalqımızın ruhən birləşməsinin tərəfdarıyam. Hesab edirəm ki, Borçalı, Dərbənd, Qarabağ, Güney Azərbaycan məsələsi hamımızın problemidir və məsələyə də bu prizmadan baxmaq lazımdır.

Azərbaycan parlamentində Güney Azərbaycan məsələsini daima qaldıracam və xüsusilə, güneydə həbs edilən, işgəncələrə məruz qalan soydaşlarımızın məsələsini beynelxalq insan hüquqları təşkilatlarının diqqətinə çatdıracam.

Eyni zamanda düşünürəm ki, Bütöv Azərbaycan düşüncəsi strateji baxımından ortaya gətirilməlidir.

- Diaspor fəaliyyəti ilə bağlı fikirlərinizi eşitmək maraqlı olardı...

- Bildiyiniz kimi, neçə illər Dünya Azərbaycanlıları Konqresində(DAK) rəhbərlik səviyyəsində təmsil olunmuşam. Məsələ burasındadır ki, mən diaspor üzvlərini vətənimizin parçalanmış insanları olaraq görürəm.

Elə bir münbit şərait yaratmalıyıq ki, xaricdə yaşayan soydaşlarımız azərbaycana bağlı ola bilsinlər. Gələcəkdə də Azərbaycan dövləti ilə xaricdə fəaliyyət göstərən diaspor qurumları arasında əlaqələr mexanizminin qurulması istiqamətində təkliflərlə çıxış edəcəm və məsələni gündəmə gətirilməsi üçün fəaliyyətimizi gücləndirəcəm.

- Qarabağ məsələsinin həlli istiqamətində hansı təkliflərlə çıxış  edəcəksiniz?

- Biz seçki prosesində Qarabağ məsələsi ilə bağlı öz təkliflərimizi elan etmişdik. Sizə onu da deyim ki, həbsdə olarkən münaqişənin həlli ilə bağlı parlamentdə müzakirə olunan 93 təklifdən biri mənim idi.

Bundan sonra da parlamentdə fəaliyyətim dönəmində sistemli, problemin həll edilməsi istiqamətində təklifləri səsləndirəcəm və  daim olaraq bu, məsələ fəaliyyət dövrümüzdə prioritet olacaq.

- Təşəkkür edirik suallarımızı cavablandırdığınıza görə və gələcək işlərinizdə uğurlar arzu edirik.

- Məndə təşəkkür edirəm Güney Azərbaycan Televiziyasına ki, xalqımızın birliyi istiqamətində önəmli işlər görür.Birlik, Bütövlük yolunda sizlərə uğurlar arzu edirəm. Söhbətləşdi: Elnur Eltürk