GünAzTv: ABŞ (Amerika Birləşmiş Ştatları) prezidenti Barak Obama 31 il əvvəl İrana qarşı tətbiq olunan sanksiyalar barədə sənədin qüvvəsini daha bir il uzadıb.

1979-cu ildə prezident Cimmi Karter tərəfindən tətbiq olunmuş sanksiyaların səbəbi Tehranda ABŞ səfirliyinin zəbt olunması və səfirliyin əməkdaşlarının 444 gün girov saxlanılması olub. Bu sanksiyalar ABŞ-dan İrana qida və dərman preparatları daxil olmaqla, bir neçə malların ixracını, eləcə də İrandan Birləşmiş Ştatlara hər hansı malların idxalını qadağan edir.  Son vaxtlar İrana qarşı beynəlxalaq sanksiyalara qoşulan dövlətlərin və şirkətlərin sayının artdığını nəzərə alsaq, Barak Obamanın son fərmanı İrana təzyiq imkanlarını daha da artıracaq. Amma öz ötkəmliyi ilə seçilən Tehran rejiminin bu sanksiyalar qarşısında nüvə proqramından imtina edib-etməyəcəyi hələ dəqiq məlum deyil. Politoloq Fuad Muxtar-Ağbabalının fikrincə, ABŞ-ın sanksiyaları ümumilikdə, İranın iqtisadi və siyasi həyatına ciddi təsir göstərəcək: "ABŞ rəhbərliyi hələlik İranla münasibətlərində hərbi variantı istisna edib. Amerika hazırda əsasən BMT vasitəsilə sanksiyalar tətbiq etməklə İranı diz çökdürməyə çalışır. İranın apardığı fəaliyyət də onu göstərir ki, rəsmi Tehran səmimi deyil və nüvə silahı qazanmağa çalışır. Başda ABŞ olmaqla Qərb isə teokratik bir ölkənin nüvə silahına malik olmasını istəmir. Amerika özünün Yaxın Şərqdəki əsas müttəfiqi İsrail üçün həmişə təhdid görür və bunun qarşısını almağa çalışır. Son dövrlər dünya mətbuatında çıxan analitik yazılar göstərir ki, ABŞ İrana qarşı təzyiqlər məsələsində istəyinə nail olub. Məsələn, belə bir məlumat var ki, İranın İqtisadi İnkişaf Nazirliyindən hazırlanmış məxfi sənəd ali dini lider ayətullah Xamneyiyə göndərilib. Həmin sənəddə İran iqtisadiyyatının çox ağır vəziyyəti təsvir olunub. Ali dini rəhbərlikdən istənilir ki, olduqca vacib tədbirlər görsün, əks təqdirdə İran iqtisadiyyatı tamamilə iflasa uğrayacaq və bu proses qaçılmaz olacaq. ABŞ da bunu görür. İranda vəziyyət gündən-günə pisləşir və İranın daxilində sosial partlayış yetişməkdədir. Sadəcə olaraq, İran aqrar ölkə olduğuna görə, bu çox hiss olunmur. Amma qiymətlərin artmasına təsir edən məqamlar çoxdur. İrandan belə xəbərlər gəlir ki, bahalaşmanın qarşısını almaq üçün süni reydlər təşkil olunur, insanlara pulsuz yeməklər paylayırlar. Hələ İranı Türkiyə, Azərbaycan kimi ölkələr əməkdaşlıq etməklə vəziyyətdən çıxara bilirlər. Artıq dünyanın bp kimi böyük şirkəti, Fransanın, İtaliyanın şirkətləri İrana sərmayə qoyuluşunu dayandırıblar. Bu isə bir neçə ildən sonra ağır nəticəsini verəcək. Sərmayə olmadan da ölkənin neft-qaz istehsalında kəskin enmələr baş verəcək ki, bu da İranın gəlirlərdən məhrum olması ilə nəticələnəcək".Politoloq dedi ki, bütün bu təzyiqlərə baxmayaraq, mövcud vəziyyətin monitorinqi İran rejiminin nüvə proqramından əl çəkməyəcəyini deməyə əsas verir. Xalq cəbhəsi