GünAzTv: Vladiqafqazda intiharçı-bombardmançının maşını partlatması nəticəsində 16 adam ölüb və yüzdən artıq insan yaralanıb.

Bombardmançı mərkəzi bazarın yaxınlığında öz avtomobilini partladıb.

Hadisə yerində yanmış cəsədlər və maşınlar var. Prezident Dmitri Medvedev deyib ki, bombardmanın arxasında duran monstrları tutmaq üçün bütün qüvvələri səfərbər etməyə çağırıb.

GünAzTv mətbuat mərkəzinin BBC-yə istinadən yaydığı məlumata görə, Şimali Qafqazda son hadisələr vəziyyətin gərginləşdiyindən xəbər verir.

Ramzan Kadırovun istehkama çevirdiyi doğma kəndi Sentoroyda qiyamçıların hərbi əməliyyatı, Şimali Qafqazın ən iri su elektrik stansiyalarından olan İrqanay QES-də partlayış və nəhayət, Vladiqafqazdakı bugün törədilmiş partlayış sözü gedən gərginliyin üzdə olan əlamətləridi.

Halbuki Kreml və Çeçenistan rəhbəri Ramzan Kadırov uzun müddətdir ki, bölgədə qiyamın kökünün əsasən kəsildiyini iddia edirlər.

Görəsən müstəqil müşahidəçilər Şimali Qafqazdakı hazırki durumu necə qiymətləndirir?

Moskvadakı, bölgə üzrə icmalçı Ruslan Martaqov bu suala belə cavab verdi.

Moskva iddia edir ki, bölgədə vəziyyət normaldır və narahatlıq üçün heç bir əsas yoxdur. Moskvanın təbirincə, Şimali Qafqazda yalnız ayrı-ayrı hadisələr baş verir. Əslində isə bu region irimiqyaslı müharibə astanasına yaxınlaşıb. Qafqaz getdikcə Rusiyadan uzaqlaşmaqdadır, Kremlin tabeçiliyindən çıxır. Şimali Qafqazda yerləşdirilmiş Rusiya qoşunları özlərini öz ölkələrindəki kimi yox, sankı işğal olunmuş ərazilərdəki kimi hiss edirlər. Vladiqafqazdakı bugünkü partlayış və bundan əvəlki hadisələr vəziyyətin getdikcə gərginləşdiyindən, Moskva üçün xoşagəlməz istiqamətdə inkişaf etdiyindən xəbər verir.

SUAL: Lakin cəmi 2 ay bundan əvvəl belə təssəvvür yaranmışdı ki, əksinə qiyamçılar arasında parçalanma baş verib. Vəziyyətin qarışıq olduğunu, hətta qiyamçıların informasiya mənbələri də etiraf etməli oldular. Əvvəlcə Doku Umarov qiyamçı hərəkatın rəhbəri vəzifəsindən istefa verdiyini bəyan etdi, bir neçə gündən sonra bəyanatını geri götürdü. Qiyamçı düşərgədə nə baş verir?

Bilirsiz, bu əsasən müqavimət hərəkatının çeçen iştrakçılarının mövgeyinə görə baş vermişdi. İş orasındadır ki, Doku Umarovun rəhbər olduğu dövrdə, Qafqazdakı müqavimət hərəkatı o qədər də fəal deyil idi. Döyüş aksiyaları nadir hallarda keçirilirdi. Çünki yaranmış vəziyyət Doku Umarovu və onun tərəfdarlarını qane edirdi. Kreml faktiki olaraq Çeçenistandan əlini üzmüşdü. İxtiyarı vermişdi Ramzan Kadırova. Umarov üçün isə əsas odur ki, Rusiya Çeçenistanın işinə qarışmasın.Lakin Doku Umarovun yürütdüyü xətlə razı olmayan çeçen döyüşçülərini bu cür vəziyyət qane etmir, ona görə də onlar öz strategiyalarını əməldə göstərməyə çalışırlar.

SUAL: Yəni, belə çıxır ki, Doku Umarov müqavimət hərəkatının mötədil liderlərindəndir, elə deyilmi?

İş orasındadır ki, Doku Umarovdan ayrılmış çeçen döyüşçülərini Çeçenistanda hazırda hökm sürən Ramzan Kadırov rejimi heç cür qane etmir. Doku Umarov isə Çeçenistan problemini özü üçün artıq həll olunmuş sayır. O Çeçenistanda vəziyyətin dəyişməsində, Ramzan Kadırovun Kreml tərəfindən dəyişməsində maraqlı deyil. Çünki belə olsa, onda Çeçenistanda hər şeyi təzədən başlamaq lazım gələcək. Doku Umarovun bucür mövgeyi çeçen döyüşçülərini təngə gətirib.

SUAL: Bəs Moskvanın Çeçenistanda apardığı siyasət, yəni bu respublikanı bolluca maliyyə vəsaitləri ilə təmin etmək, bir növ pulla almaq siyasəti özünü doğruldurmu?

Əgər bu pullar, həqiqətən də xalq tərəfindən seçilmiş hökümətə yönəldilsəydi, onda bu cür siyasət özünü doğruldardı. Amma Kreml Çeçenistana öz adamını xalqın istəyini, xalqın rəyini nəzərə almadan təyin edib. Xalq tərəfindən seçilməmiş, xalqın qarşısında hesabat verməyən rəhbər isə, Kremldən asılı olacaq, və onu pul ilə təmin edən mərkəzə istənilən faiz ilə həmin puldan pay ayıracaq ki - təki yerində qalsın.Aydındır ki, bu cür rejimi xalq dəstəkləməyəcək. Əksinə, getdikcə, narazılıq artacaq. Getdikcə daha çox sayda gənclər müqavimət hərəkatına qoşulacaq, qiyamçılara əhali arasında rəğbət artacaq. Və nəticədə, müqavimət hərəkatı gündən günə güclənəcək.