GünAzTv: Gürcüstanın xarici işlər naziri Qriqol Vaşadze hesab edir ki, Rusiya bazası, ümumiyyətlə, Cənubi Qafqazın hər üç ölkəsini təhdid edir.

Rusiya prezidenti Dmitri Medvedyevin Bakıya səfərində cavabı axtarılan suallardan biri Moskvanın Ermənistandakı hərbi bazanın dislokasiya müddətinin uzadılması ilə bağlı idi. Bakıda Rusiya tərəfi Azərbaycanı narahat edən bu suala qanedici cavab vermədi. Hətta Mevedyev Gümrüdəki 102 saylı Rusiya bazasını regionda sülh və asayişin təminatçısı kimi təqdim etdi. Sanki bizimlə məzələnirdi.    Təbii ki, heç kim buna inanmadı. Hər halda, son 200 ildə Qafqazın baş bəlası olan Rusiyanın Gürcüstanı əzdikdən sonra sülhdən danışmasına, bölgə ölkələrini təhdid edən Ermənistandakı hərbi bazanın "sülh missiyası" daşıması haqqındakı məzələnməyə inanmaq üçün ən azı sadəlövh olmaq lazımdır.    Gürcüstanın xarici işlər naziri Qriqol Vaşadze hesab edir ki, Rusiya bazası, ümumiyyətlə, Cənubi Qafqazın hər üç ölkəsini təhdid edir. "Rusiyanın Cənubi Qafqazdakı hərbi bazalarının sayının artırılması Gürcüstan üçün, Azərbaycan üçün və daha çox Ermənistanın müstəqilliyi üçün böyük təhlükədir",- deyə o, APA-ya açıqlamasında bildirib.    Vaşadzenin fikrincə, bu hərbi bazanın gücləndirilməsi daha çox Ermənistanın müstəqilliyi üçün böyük təhlükədir: "Çünki bu hərbi baza heç kimə təhlükəsizlik, stabillik və əməkdaşlıq imkanları vəd etmir. Eyni zamanda, bu baza Cənubi Qafqazda mövcud olan münaqişələrin sivil və diplomatik yolla həllinə də şərait yaratmır. Rusiya hərbi bazasının yeganə məqsədi bölgədə gərginliyi gücləndirməkdir. Bu hərbi bazanın Ermənistanda fəaliyyət müddətinin 24 il uzadılması və onun funksiyasının dəyişdirilməsi region üçün böyük təhlükədir".    "Atlas" Araşdırmalar Mərkəzinin rəhbəri Elxan Şahinoğlu isə öz bloqunda yazır ki, Rusiya prezidenti Bakıdakı açıqlamasında Azərbaycan ictimaiyyətini sakitləşdirməyə çalışsa, bu baş tuta bilməz":Medvedyev Ermənistanla imzaladığı hərbi sazişin "nə elə bir əhəmiyyəti, nə də əvvəlki sənəddən fərqi var" desə də, halbuki, yeni sənəddə Rusiyanın Gümrüdəki hərbi bazasının Ermənistanın təhlükəsizlik maraqlarına da xidmət edəcəyi vurğulanıb".    Rusiya-Ermənistan hərbi sazişinin Qafqazda sülh və əmin-amanlığa xidmət etməsi kimi absurd iddiaya gəlincə, Şahinoğluya görə, bunu qeyri-diplomatik dildə belə oxumaq olar: "Biz Ermənistanla hərbi sazişi ona görə yenilədik ki, Azərbaycan işğal altındakı torpaqları hərbi yolla işğaldan azad etməyə həvəslənməsin, əks halda qarşısında bizi görəcək".    Ən gülməlisi isə odur ki, Cənubi Qafqazda barış və əmin-amanlıqdan danışan Rusiya prezidenti Gürcüstanı parçalayaraq separatçıları tanıyıb, onları silah və sursatla təmin edib. Şahinoğlu Rusiyanı strateji tərəfdaş kimi qəbul etməyin əlehinədir. Onun fikrincə, rəsmi Bakı Avropada Adi Silahlar haqqındakı Müqavilədə nəzərdə tutulan kvotanın pozulub-pozulmadığını hesablayacağına dair açıqlamasında israrlı olmalıdır.    Politoloq İlqar Məmmədov isə bildirir ki, Rusiya hərbi bazasının Qafqazda heç bir yeri yoxdur. Medvedyevin bazanın regionda sülh, əmin-amanlıq yaratması barədəki iddiasına gəlincəsə, politoloq qeyd edir ki, əgər belədirsə, müqavilənin vaxtı 2020-ci ildə bitirdi: "Nə tələsiklik var idi? Baza birmənalı olaraq, Azərbaycan, Türkiyə və NATO-ya qarşı, Rusiyanın Cənubi Qafqazda siyasi mövcudluğunu təmin etməyə yönəlib".    Məmmədov bildirir ki, verilən mesajlar praktikada heç bir rol oynamır: "Ordu varsa, bir ərazidə onun hər hansı rolu var. Əgər hərbi fəaliyyətə keçəcəksə, heç kəs mesajları xatırlatmayacaq. Belə məsələlərdə sadəlövh yox, ciddi olmaq lazımdır. Mesajla ordunun mövcudluğu təhlükəsi eyni çəkili deyil".