GünAzTv: Ermənistanda Dağlıq Qarabağın müstəqilliyinin tanınması ilə bağlı fikirlərin səsləndirdiyini deyən M.Əhmədoğlu heç Ermənistanın özünün müstəqil olmadığını bildirib.

Bu gün 2010-cu il avqust ayında beynəlxalq və regional ictimai-siyasi proseslərin yekunları ilə bağlı Siyasi İnnovasiya və Texnologiyalar Mərkəzinin (SİTM) hazırladığı analitik hesabat açıqlanıb. bununla bağlı keçirilən tədbirdə Mərkəzin rəhbəri Mübariz Əhmədoğlu Qafqazda gedən proseslərin həm Rusiya, həm də Azərbaycan üçün təhlükə yaratdığını bildirib.

GünAzTv mətbuat mərkəzinin SİA-ya istinadən yaydığı məlumata görə, Rusiyanın Qafqazda oyun qaydalarını müəyyənləşdirməli olduğunu deyən SİTM rəhbəri hesab edir ki, bu qaydaların müəyyənləşməsi zamanı Cənubi və Şimali Qafqaza eyni gözlə baxılmalıdır. “Rusiya necə olur ki, Dağlıq Qarabağ, Cənubi Osetiya, Abxaziya separatçılarını dəstəkləyir, amma Çeçenistana, İnquşetiyaya deyir ki, müstəqillik mümkün deyil. Ortaq qaydalar burada lazımdır və bu qərarların tədbiqi üçün ən münasib vaxtdır. Rusiyanın gələcək inkişafı Qafqazla bağlıdır”.

Türkiyə, Avropa və ABŞ-ın heç biri Rusiyanın Qafqaz siyasətinin əleyhinə olmadığını deyən SİTM rəhbəri İranın Qafqazda vəziyyəti Rusiya üçün gərginləşdirməyə çalışdığını dilə gətirib. M.Əhmədoğlunun sözlərinə görə, Rusiya hərbi gücü hesabına Qafqazda heç nəyə nail olmayacaq: “Rusiya 20 ildir ki, Qafqaza hərbi variantdan başqa heç nə təklif etməyib. Ancaq Rusiyanın tədbiq etdiyi hərbi metodologiya sıradan çıxıb”.

Azərbaycanin bütün Qafqaz üçün təhlükəsizlik ixracatçısı olduğunu deyən politoloq hesab edir ki, Azərbaycan əlində olan imkanlardan ikitərəfli istifadə edə bilər: “Sovetlər dönəmində Ermənistana dəmir yolu ilə daşınan yüklərin 85 faizi Azərbaycandan keçirdi. Azərbaycanın çox geniş iqtisadi imkanları var. Əgər bu imkanlar Ermənistanın əleyhinə yönəlsə, Ermənistan bundan çox ziyan görəcək. Azərbaycan ordusu bu gün müharubəyə hazırdır. Azərbaycan eyni zamanda iqtisadi müharibəyə hazırdır. Azərbaycan öz iqtisadi imkanlarını dağıdıcılığa yönəltsə, Ermənistanın mövcudluğu sual altında olacaq. Azərbaycan kifayət qədər geostrateji imkanlara malikdir və Ermənistan çalışmalıdır ki, bu imkanlar onun üçün zərərli olmasın. Azərbaycanın ən böyük imkanı Ermənistanın strateji inkişafı ilə bağlıdır”.

Ermənistanda Dağlıq Qarabağın müstəqilliyinin tanınması ilə bağlı fikirlərin səsləndirdiyini deyən M.Əhmədoğlu heç Ermənistanın özünün müstəqil olmadığını bildirib: “Bütün Ermənistanı satsalar belə, Dağlıq Qarabağın müstəqilliyinə kömək etməz”.

Rusiyanın da seçim etməli olduğunu söyləyən SİTM rəhbəri vurğulayib ki, Azərbaycan daha düzgün seçimdir: “Biz Rusiya ilə ən uzaq mənzilli siyasət qura bilərik.Yox əgər Rusiya yaltaqlıq və sonradan xəyanət istəyirsə, Azərbaycan o dövlətlərdən deyil”.

“Azərbaycanın işğal olunmuş ərazilərindəki vəziyyət”lə bağlı qətnamə layihəsinin 9 Sentyabr tarixində BMT Baş Assambleyasında müzakirəsinə də toxunan M.Əhmədoğu müzakirələrin nəticəsinə ümid etdiyini deyib: “Baş Assambleyasının qərarı ilə məsələ BMT-nin Təhlükəsizlik Şurasına çıxarıla bilər. Türkiyənin Şuraya sədlik etməsini nəzərə alaraq deyə bilərik ki, sənədin Təhlükəsizlik Şurasına gedən yolu qısa ola bilər. Daha sonra isə Şuranın növbəti qətnaməsi qəbul olunması real görünür”.