ABŞ Dövlət Departamenti Kirmanşah zəlzələsində zərər çəkmişlərlə həmdərd olduğunu bildirib

SON XƏBƏRLƏR

ABŞ Dövlət Departamenti Kirmanşah zəlzələsində zərər çəkmişlərlə həmdərd olduğunu bildirib

2021.10.20, 07:36

Gunaz.tv

GünAzTV: ABŞ Dövlət Departamenti noyabrın 26-da bəyanat yayaraq İranın Kirmanşah əyalətində baş vermiş güclü zəlzələsində zərər çəkmişlərlə həmdərd olduğunu bildirib.

Amerika Dövlət Departamentinin “Twitter” səhifəsində paylaşdığı postda bildirilir ki, Amerika hökuməti və milləti İranda zzəlzələdən zərər çəkmiş əhalinin qəminə şərik çıxır: “Biz, İranın qərbində zəlzələ baş verməsi xəbərindən üzüldük, təəssüfləndik. Biz, bu zəlzələdə xəsarət alanlarla və ziyan çəkmiş əhalinin dərdinə şərikik və bununla da İran milləti ilə həmdərd olduğumuzu bildiririk.

Bir daha təkrar edirik ki, Amerikanın İran rejiminə qarşı tətbiq etdiyi sanksiyalar humanitar yardımlara şamil edilmir. Necə ki, hazırda İrana humanitar yardım göndərmək üçün Amerikanın bir neçə qeyri-hökumət təşkilatına rəsmi lisenziya da verilib”.

Qeyd edək ki, Amerika hökuməti bundan əvvəl dəfələrlə bildirib ki, Vaşinqtonun İran rejiminə qarşı tətbiq etdiyi sanksiyalar, humanitar yardımlara, o cümlədən də İrana qida, dərman və tibbi avadanlıq göndərilməsinə şamil edilmir.

Xatırladaq ki, noyabrın 25-i yerli vaxtla axşam saat 20:07 radələrində, İranın Kirmanşah əyalətində Rixter cədvəli üzrə 6,4 bal gücündə zəlzələ baş verib.

İran Seysmoloji mərkəzinin yaydığı xəbərə əsasən, zəlzələ, Sərpol Zəhabın 17, Qəsr Şirinin 18, Gilanqərbin isə 33 kilometrliyində, yerin 10 km dərinliyində qeydə alınıb. Zəlzələ nəticəsində əyalətin bir çox yerlərində sular kəsilib, elektrik xətləri sıradan çıxıb, bir çox evlərdə çatlar və dağıntılar əmələ gəlib. Güclü zəlzələ, İranın Sənəndəc, Həmədan, İlam, Loristan, Qərbi Azərbaycan, Şərqi Azərbaycan, Zəncan, Ərdəbil və Gilan şəhər və əyalətlərində, eləcə də İraq paytaxtı Bağdadda da hiss olunub.

A.M