İran televiziyasında “Heyran Gədiyi” Gilan ərazisi kimi təqdim olunub

SON XƏBƏRLƏR

İran televiziyasında “Heyran Gədiyi” Gilan ərazisi kimi təqdim olunub – VİDEO

2021.10.20, 07:36

Gunaz.tv

GünAz TV: İran Teleradio Şirkəti 1-ci telekanalda Azərbaycan əleyhinə raport yayaraq “Heyran Gədiyi”ni Gilan Əyalətinin ərazisi kimi təqdim edib.

Bundan əvvəl rejimin əlaltıları dəfələrlə Ərdəbil Əyalətində yerləşən “Heyran Gədiyi”ni sistemli şəkildə Gilan Əyalətinin ərazisi kimi göstəriblər, raport bu istiqamətdə aparılan cəhdlərə dəstək vermək məqsədi güdür.

Videoda göründüyü kimi, respondentlər “Heyran gədiyi”ni məqsədyönlü şəkildə “Astara Heyranı” və ya “Gilan Heyranı” adlandırır.

Həmçinin Nəmin tunelindən Astaraya tərəf ərazilər Gilan Əyaləti kimi təqdim olunur. Bundan əvvəl Rəşt məsulları Gilan Əyalətinin giriş darvazası lövhəsini məhz bu məkanda quraşdırıblar.

Raportda “Heyran Gədiyi” ərazisində fəaliyyət göstərən əksər mağaza sahibləri Azərbaycan türkləri olduğu halda, onların qeyri-türk və gilanlı olduqları təsəvvürü yaradılır.

Bundan əlavə “Heyran Gədiyi”ndə istehsal olunan bütün qida məhsulları və hədiyyələr “Gilan” adı ilə təqdim olunur.

Bu məlumat ötən günlərdə İranın 1-ci telekanalında yayımlanıb.

Mart ayında “Heyran Gədiyi” ərazisində bu məntəqənin Gilan Əyalətinə aid olduğunu göstərən çox sayda lövhələr quraşdırılıb. Lakin lövhələrin əksəriyyəti azərbaycanlı fəallar tərəfindən məhv edilib, bir çoxlarında isə Gilan sözü silinərək yerinə Ərdəbil və ya Azərbaycan sözləri yazılıb.

Video:

https://www.youtube.com/watch?time_continue=1&v=wENvw7lgzjM

N.S