"Qarışıq birgəyaşayış"- BBC-nin fars bölməsi Azərbaycandakı etniklərlə bağlı qərəzli yazı dərc edib

SON XƏBƏRLƏR

"Qarışıq birgəyaşayış"- BBC-nin fars bölməsi Azərbaycandakı etniklərlə bağlı qərəzli yazı dərc edib

2024.04.10, 14:26

BBC saytının fars bölməsi "Qarışıq birgəyaşayış; Azərbaycan Respublikasında ləzgilər, talışlar və digər azlıqlar necə yaşayır?" başlıqlı yazı nəşr edib.

Gunaz.tv

Rəhbər heyəti və əməkdaşlarının fars miliyyətçiliyinə meyilli olduğu farsdilli media Azərbaycanda etnik azlıqların necə yaşadığının və təhsili məsələlərinə toxunub, onların durumundan narahatlıq ifadə edən fikirlər dərc edib.

“Azərbaycan Respublikası Dağlıq Qarabağ bölgəsi üzərində nəzarəti möhkəmləndirmək üçün əməliyyata başlayanda orada məskunlaşdırılan erməni sakinlərin dil və mədəniyyətlərinin qorunacağına zəmanət vermişdi. Ancaq az sayda erməni sakin bu vədi sınaqdan keçirməyə qərar verdilər. Ermənilərin kütləvi mühacirəti iki ölkə arasında dərin inamsızlığı göstərməklə yanaşı, həm də Azərbaycanın bu ölkənin bəzi azlıq icmalarının hüquqlarının müdafiəsi sahəsində təcrübəsini ifşa edib”,- sözü gedən məqalənin müəllifi Maqram Zeynalov yazıb.

Məqalədə Azərbaycanda yaşayan müxtəlif azlıqların nümayəndələri kimi təqdim edilən şəxslərin dilindən ölkədə onlara qarşı münasibətin yaxşı olmadığına eyham vuran fikirlər səsləndirilib.

Xatırladaq ki, 20 ildən artıqdır ki, Azərbaycan Respublikası azlıqların dil və mədəniyyət sahəsində hüquqlarının müdafiəsi ilə bağlı beynəlxalq sənədlər imzalayıb.

Dövlətin ana dilində məlumat və təhsil almaq hüququna sadiq olduğu bu hüquqlar sırasında tədris materiallarının və dil dərslərinin təqdim edilməsi də daxildir.

Bu sənədlərə “Yerli və ya azlıqların dilləri üzrə Avropa Xartiyası”, həmçinin “Milli Azlıqların Müdafiəsi üzrə Çərçivə Konvensiyası” daxildir.

Qeyd olunan sənədlər əsasında Azərbaycan Respublikasında etnik və dini azlıqların hüquqları region ölkələri ilə müqayisədə qorunur və inkişaf etdirilir.

Bununla yanaşı Azərbaycan Respublikası Konstitusiyasının 25-ci maddəsi irqindən, milliyyətindən, dinindən, dilindən, cinsindən, mənşəyindən, əmlak və rəsmi vəziyyətindən, məşğuliyyətindən, əqidəsindən, siyasi partiyalara, həmkarlar ittifaqı təşkilatlarına və digər ictimai birliklərə mənsubiyyətindən asılı olmayaraq, hər kəsin hüquq və azadlıqlarının bərabərliyinə təminat verir. İrqi, etnik mənsubiyyəti, dini, dili, cinsi, mənşəyi, əqidəsi, siyasi və sosial mənsubiyyətinə görə hüquq və azadlıqların məhdudlaşdırılmasına yol verilmir. 45-ci maddə hər kəsin öz ana dilindən sərbəst və məhdudiyyətsiz istifadə etmək hüququnu təmin edir.

Maraqlıdır ki, Azərbaycan Respublikasında yaşayan xalqların taleyindən nigəranlıq ifadə edən BBC-nin fars bölməsi bu günə kimi İranda yaşayan xalqların hüquqları ilə bağlı ciddi material dərc etməyib.

Fars miliyyətçiliyini əsas tutan yazıçı və müxbir heyəti İranda yaşayan xalqların, xüsusən Azərbaycan türklərinin milli hüquqları ilə bağlı müraciətlərini görməməzlikdən gəlib.

İran Konstitusiyanın 15-ci maddəsi fars dili ilə yanaşı digər yerli dillərin məktəblərdə tədrisinə təkid etsə də, 45 il ərzində Azərbaycan türkcəsinin tədrisi ilə bağlı heç bir iş görülməyib.

“BBC Farsi” isə ölkənin Konstitusiyasında qeyd olunan maddənin icrasının tələbi ilə bağlı türklərin, ərəblərin, bəlucların və başqa etniklərin keçirdikləri aksiyaları təhrif olunmuş formada qələmə verib.

Adı çəkilən xalqların milli hüquqları ilə bağlı tələblərinə qarşı “BBC Farsi”nin mövqeyi hazırkı və Pəhləvi hakimiyyətinin mövqeyi ilə eyni olub.

İranda yaşayan əhalinin əksəriyyətini qeyri-farsların təşkil etməsinə baxmayaraq, adı çəkilən media orqanı bu günə kimi onlarla bağlı material dərc etməkdən imtina edir.

GünazTV