Ukrayna İranla hava nəqliyyatı müqaviləsini ləğv etdi

SON XƏBƏRLƏR

Ukrayna İranla hava nəqliyyatı müqaviləsini ləğv etdi

2024.11.09, 12:43

Ukrayna Nazirlər Kabineti İran İslam Respublikası ilə hökumətlərarası hava nəqliyyatı sazişini ləğv edib.

Gunaz.tv

Bu barədə “Ukraynainforum” hökumətin parlamentdəki daimi nümayəndəsi Taras Melniçukun “Telegram” səhifəsinə istinadən məlumat yayıb.

"Ukrayna hökuməti ilə İran İslam Respublikası hökuməti arasında 1993-cü il iyulun 19-da Tehranda imzalanmış hava əlaqəsi müqaviləsinə xitam verilib",- Melniçuk bildirib.

Bundan əvvəl sentyabrın 9-da İranın Ukraynadakı işləri üzrə məsulu Şəhriyar Amuzqar İranın Rusiyaya ballistik raketlər göndərməsi barədə xəbərlərin yayılmasından sonra Ukrayna Xarici İşlər Nazirliyinə çağırılıb.

Ukrayna Xarici İşlər Nazirliyi Tehrana xəbərdarlıq edib ki, ballistik raketlərin İran hökumətindən Rusiyaya ötürülməsi təsdiq olunarsa, bu, Ukrayna və İran arasında münasibətlər üçün dağıdıcı nəticələrə səbəb olacaq.

İran hökuməti bu yaxınlarda beynəlxalq ictimaiyyətin dəfələrlə xəbərdarlıqlarına baxmayaraq, Rusiyaya yüzlərlə ballistik raket göndərib.

İslam Respublikasının Rusiya ilə hərbi əməkdaşlığına cavab olaraq, ABŞ və Avropa Birliyi bu əlaqələrin inkişafında iştirak edən İranlı şəxslər və qurumlara qarşı bir neçə sanksiya paketi tətbiq edib.

“Yeddilik Qrupu”na üzv ölkələrin xarici işlər nazirləri də, sentyabrın 24-də birgə bəyanat yayaraq, İran İslam Respublikasından Rusiyaya ballistik raketlərin ötürülməsini ən sərt tonda pisləyiblər.

Onlar bu bəyanatda qeyd ediblər ki, Rusiya İran silahlarından istifadə edərək Ukrayna vətəndaşlarını qətlə yetirir və ölkənin həyati infrastrukturuna hücum edir.

Qeyd edək ki, Ukrayna 2022-ci il fevralın 24-dən hava məkanını bağlayıb və o vaxtdan bəri ölkəyə müntəzəm mülki uçuşlar dayandırılıb.

GünazTV

GUNAZ.TV

SON XƏBƏRLƏR