İran Əsədin Tehrana borcu ilə bağlı rəsmi açıqlama verdi

SON XƏBƏRLƏR

İran Əsədin Tehrana borcu ilə bağlı rəsmi açıqlama verdi

2024.12.18, 11:51

İran Bəşər Əsəd rejimindən qalan və 30 milyard dollar olduğu iddia edilən borcu Suriyanın yeni hakimiyyətindən tələb edəcək

Gunaz.tv

Bu barədə İranın Xarici İşlər Nazirliyinin sözçüsü İsmayıl Bəqayi deyib.

“Suriyada hakimiyyətin keçid dövrünün bitməsini gözləyirik. Ümumiyyətlə, iki ölkə arasında bağlanan müqavilələr və anlaşma memorandumları həmin ölkələr arasındadır və ləğv edilməyəcək. Bu məsələnin ardınca getmək İslam Respublikasının gündəmindədir”, - XİN rəsmisi bildirib.

Bundan əvvəl isə İran parlamentinin keçmiş üzvü Bəhram Parsayi dekabrın 8-də özünün X hesabında paylaşım etmişdi.

O, Suriya və Bəşər Əsədin İrana 30 milyard dollar borcu olduğunu və bunun ölkə konstitusiyasının 80-ci maddəsinə zidd olaraq parlament tərəfindən təsdiqləndiyini yazmışdı.

"Suriyadakı müharibə İran xalqının müharibəsi deyil. Hökumət əvvəlki müharibəyə xərclənən milyardlarla dolların məsələsinə aydınlıq gətirməyib, iranlıların can və malını yeni pusquya salmamalıdır”,- bunu isə parlamentin Milli Təhlukəsizlik Komissiyasının keçmiş sədri Hişmətullah Fəlahətpişə deyib.

Fəlahətpişə bundan əvvəl may ayında da mediaya verdiyi müsahibədə Bəşər Əsəd rejiminin İrana 30 milyard dollar borcu olduğunu bildirmişdi.

İran rəsmiləri isə onun bu fikirlərini "şişirdilmiş iddia" adlandırarq, dolayı yolla Əsədin 30 milyard borcu olmadığını söyləmişdilər.

Qeyd edək ki, bu borcların bir hissəsi SEPAH-ın Suriyaya göndərdiyi neftin Dəməşq tərəfindən bu günə kimi ödənilməyən pullarıdır.

GünazTV

GUNAZ.TV

SON XƏBƏRLƏR