Fransa Parlamenti: SEPAH terror təşkilatı kimi tanınmalıdır

SON XƏBƏRLƏR

Fransa Parlamenti: SEPAH terror təşkilatı kimi tanınmalıdır

2025.01.31, 11:03

Fransa Milli Assambleyasının nümayəndələri yekdilliklə qətnamə qəbul edərək, Fransa və Avropa Birliyindən İslam İnqilabı Keşikçiləri Korpusu (SEPAH) və ona bağlı qüvvələri, o cümlədən "Bəsic" və Qüds qüvvələrini terror təşkilatları siyahısına salmağı istəyiblər.

Gunaz.tv

Bununla əlaqədar olaraq onlar 2022-ci ilin sentyabr ayından başlayan etirazlar zamanı İran İslam Respublikası hakimiyyət orqanları, xüsusilə də İslam İnqilabı Keşikçiləri Korpusu və "Bəsic" tərəfindən insan haqlarının ciddi şəkildə pozulmasına işarə ediblər.

Qətnamədə, İranda “yaşamaq hüququ, işgəncə və pis rəftardan qorunmaq hüququ, azadlıq və şəxsi təhlükəsizlik hüququ, ədalətli məhkəmə araşdırması və qanuni prosedurlara riayət etmək hüququ, din, ifadə, dinc toplaşmaq və toplaşmaq hüququ, şəxsi toxunulmazlıq hüququ, sağlamlıq hüququ, təhsil hüququ, dolanışıq hüququ və işləmək hüququ”nun pozulduğu vurğulanıb.

Bununla yanaşı, qətnamədə “İranda insan haqlarının pozulması, ölüm hökmünün qorxu yaratmaq aləti kimi geniş şəkildə tətbiqi, rejimin qadınlara və qızlara qarşı ifrat zorakılığı və vəhşiliyi” qəti şəkildə pislənib.

Fransalı nümayəndələr İranda dini rejim tərəfindən həddindən artıq zorakılığın adiləşdiyinə diqqət çəkiblər və bildiriblər ki, Tehran rejimi qətl, zorla yoxa çıxarma, həbs, işgəncə, zorlama və cinsi zorakılığın digər formaları vasitəsilə ayrı-seçkilik siyasətlərini tətbiq edir.

Fransa Milli Assambleyasının 105 üzvü tərəfindən təsdiq edilən qətnamədə, İran rejiminin qadınların azadlıq, həyat və dolanışıq imkanlarını ciddi şəkildə məhdudlaşdıran bir sıra qanun və qaydalar vasitəsilə onlara qarşı sistematik ayrı-seçkilik etməsi pislənilib.

Fransa Milli Assambleyasının nümayəndələri İranda qadınların hərəkatına, həyatına, azadlığına qeyd-şərtsiz dəstəklərini bir daha bəyan ediblər.

Bundan əvvəl Avropa Parlamentinin nümayəndələri noyabrın 28-də İranda "qadınların özbaşına saxlanmasını" pisləyən qətnamə qəbul edərək, İran İslam Respublikası hakimiyyətindən iranlı qadın və qızlara qarşı "ayrı-seçkilik qanunlarını" ləğv etməyi tələb edib.

GünazTV